2
Ndu Ízurẹlu gharu Nchileke azụ
1 Ojejoje abya ekfuru yeru iya; sụ iya: 2 “Tẹ ya je araaru iya ndu Jerúsalemu arara; sụ ẹphe:
“ ‘Lẹ ya nyatakwarua ẹge o shi
evube unu evuvu ome
iphe dụ iya mma;
teke unu shi bụkwaduru ụnwu-okorọbya.
Teke ono; bẹ unu shi yeru
iya obu l'ọ bụ nwanyi,
a lụru k'ọphungu.
Unu shi etsoje iya
l'eswe l'echi-ẹgu;
mbụ je eswee l'alị ono,
ẹ-ta adụdu iphe aakọje iya ono.
3 Ndu Ízurẹlu shi dụru Ojejoje nsọ.
Yọ bụru ẹphe bụ akpụru
ọdungu, ya vuru ụzo kpata
l'iphe ya kọru l'okfu iya.
Iphe bụ ndu chọru ẹphe okfu;
bẹ ya nmawaru ikpe;
ẹjo mkpaka-ẹhu a-dakfuta ẹphe.’ ”
Ono iphe Ojejoje ekfu ndono.
4 Unu nụa iphe Ojejoje ekfu; unubẹ ọnu-ụlo Jékọpu; mẹ unubẹ ọnu-ụlo ndu ikfu Ízurẹlu! 5 Ọwaa iphe Ojejoje ekfu ndọ-ọ:
?Bụ ngụnu bẹ ndiche unu
phẹ sụru lẹ ya meru ẹphe, meru;
ẹphe ahaa ya jemihu?
Ẹphe eje awata otso ntẹkpe,
ẹ-ta adụdu uru, ọobaru ẹphe;
shi ẹge ono ghọo
'ọ-ga-lẹ-mkpa ẹphebedua.
6 Ọphu ẹphe 'ajịdu: ?Bụ awe b'ọ nọ;
mbụ Ojejoje, bụ iya
dufutaru ẹphe lẹ Íjiputu;
bya edua ẹphe dughaa
echi-ẹgu, ẹ-ta dụdu iphe nọ iya nụ;
dughaa ẹphe alị ono,
bụ eveve yẹle iduma
bụ iphe nọ iya nụ ono;
mbụ alị ẹjo mkpọ-anwụ;
mẹ l'ẹkpuru-ọchi;
mbụ alị, ẹ-ta dụdu onye
eshije iya eshishi;
tọ dụ onye bu iya ebubu?
7 Ya duru unu dubata l'alị,
emehuje iphe e meberu iya
tẹ unu rije akpụru iphe amị
iya nụ yẹle ẹku, kụru iya nụ.
Obenu l'unu bataru iya
bya atụrua alị iya;
mee òkè-iphe iya ono;
yọ bụru akpamara.
8 Ọphu ndu achịjeru Nchileke ẹja ta jịdu:
?Bụ awe b'ọ nọ; mbụ Ojejoje?
Ndu eme kẹ ekemu ta madu onye ya bụ;
ndu bụ ishi ekwefuru iya íkè;
ndu nkfuchiru abụru Bálụ;
bẹ ẹphe ekfuje iphe o kfuru;
iphe ẹphe etso abụru ntẹkpe,
ẹ-ta dụdu uru, ọoba.
9 Ọwaa iphe Ojejoje ekfu. Ọ sụru:
“Lẹ ya e-do iphe unu meru iya;
kpua unu.
Ya edoo iphe ụnwu
nwanwa unu meru iya;
kpua ẹphe.
10 Unu ghabua bahụ
Ikfuli Sáyipurọsu je
elekpoduaphu ẹnya!
Unu eye madzụ t'o jerua
Kéda je egbua ya igo ọhuma;
unu amawarụru;
m'o nweru ẹke egbe iphe ono mejeru.
11 ?O nweru ọha, gbajẹru agwa ẹphe inwe;
e guderu l'ẹ to nwedu iphe
ono ọphu nweru iphe ọ bụ.
Obenu lẹ ndibe iya
gbanweru yẹbe onye dụ akpabiri
je anata iphe ẹ-ta dụdu uru, ọ baru.
12 Nggụbe igwe;
tẹ iphe-a nyịkwaa ngu ishi ẹdzu;
t'ị kpọ-yiaru iya ukuvu.”
Ono iphe Ojejoje ekfu ndono.
13 “Ndibe iya mewaru ụzo iphe dụ ẹji labụ.
Ẹphe gbadowaru iya;
mbụ yẹbe ọ̀gbà mini, anụ ndzụ.
Ẹphe gvushiwaru onwẹphe okpuru.
Okpuru ono abụru okpuru,
gbashịru ọru,
ẹ-ta adụjedu ike gude mini.
14 Ízurẹlu ?ọ bụ ohu tọo.
Mbụ; ?a mụru iya;
yọ bụru ohu tọo?
?Nanukwanu ẹge e meru;
a kwalahaa ya ọkwata?
15 Ndu ọhogu iya etsuru
iya ẹka l'ọkpoma;
tụkowa iphe nọ l'alị iya mebyishia.
Mkpụkpu, nọkota iya nụ
l'ọ ha b'a tụkotawaru ọku;
yọ dabuwaru ochobo.
16 Ọdo bụ lẹ ndu Mẹ́mufisu;
yẹle ndu Tapénesu kpụwaru unu ishi.
17 ?Tọ bụdu unu meru iya onwunu;
keshinu unu jịkaru Ojejoje, bụ Nchileke unu
teke oodu unu eje l'echi esu-ụzo?
18 Nta-a; ?bụ ole bụ k'oje
Íjiputu ọngu mini, shi lẹ Ẹnyimu Shihọ?
?Bụ ole bụ k'oje alị Asiriya
ọngu mini, shi lẹ Ẹnyimu Yufurétusu?
19 Ẹjo iphe unu eme bụkwa
iya e-mekochaa hụ̀a unu àhụ̀hù.
Yọ bụru azụ ono, unu ala
ono a-gbọru ngu ụja.
Unu rịnua ya arịri maru
ẹge ọ dụ-beru unu ẹji;
mẹ ẹge ọotsu-beru unu l'ẹhu
l'unu jịkaru Ojejoje, bụ Nchileke unu;
mbụ unu ta atsụ iya egvu ililekpọ.”
Ono kwa iphe Nnajiufu ekfu ndono; mbụ Nnajiufu, bụ Ọkaribe-Kakọta-Ike.
20 “Ọ bụru teke tehawarụru
ẹnya bẹ unu nyakafụru ishi,
shi swegbabe unu l'iya;
bya anyakafụ ẹgbirigba,
e shi gude segbabe unu l'iya.
Unu asụ: ‘L'unu te ejehekwaru iya ozi;’
wata ọgwa nte l'iphe bụ ugvu, ha l'eli;
mẹ iphe bụ oshi, nọnu.
21 Ya kọwaru unu l'ọ bụ onye
kọru okfu ọkpobe vayịnu,
karu ukfu bya adụebe mma.
?Nanụkwanu ẹge e shiru;
unu aghakọbe bya aghọoru
vayịnu-ẹgu, e merushiru emerushi?
22 Ẹ tọ dụkwa m'o -ruhuru;
unu gude ọkanwa saa onwunu;
bya efua onwunu ncha
fugharu iya ẹka;
bẹ ikpe ono, nmaru unu ono
rakụlerukwaruphu unu
l'ẹhu ẹge ọ rakụru iya.”
Ono kwa iphe Nnajiufu, bụ Ojejoje ekfu ndono.
23 “?Nanụ ẹge unu e-shi sụ l'ẹ te merukwa unu;
unu ta gbaru tsoru agwa ono;
mbụ Bálụ?
Unu lewaru ẹnya l'egbe umere,
unu meru lẹ nsụda ono!
Unu gbunua igo l'egbe
umere, unu meru l'ẹke ono.
Iphe unu bụ bẹ bụkwa
nyee ịnya-ivu, ebu nggada
karagidimu karagidimu.
O -buru shia ọwaa;
yo buru shia ọphu; l'achọ okee ya.
24 Nyee nkakfụ-ịgara-ọswa,
echi-ẹgu kwọwaru ẹhu,
akpọ phẹrephere furumu furumu;
l'ẹke oje l'okee;
te nwedu onye anọ-chije iya ụzo.
Okee ya, achị iya nụ;
bẹ mkpa kẹ ọgba ọso nshinu ta nọduru;
kẹ l'ọ -byade iya echichi;
b'ọ phụwaru-a ẹke ọ nọ.
25 Ya asụ t'unu ba gbashị ọso
jeye teke ọkpa a-swashịhu unu;
ẹkpiri akpọshia unu nkụ.
Obenu l'unu sụru:
‘?Bụhunu kẹ ngụnu?
Agwa ndu ọhodo bẹ unu yeru obu.
Yọ bụru iya bẹ unu a-nọdu agba etso.’
Aa-hụ̀ ẹphe àhụ̀hù
26 “Ọ kwa ẹge eekpuje onye iphura ifu lẹ ntụ m'e gude iya bụ ẹge e kpuru ọnu-ụlo Ízurẹlu ifu lẹ ntụ. Ẹphebedua; mẹ ndu eze, achị ẹphe; ndu ishi ẹphe; ndu achịjeru Nchileke ẹja; mẹ ndu nkfuchiru Nchileke ẹphe. 27 Ẹphe sụru oshi: ‘L'ọ bụ iya bụ nna ẹphe;’ bya asụ mkpuma: ‘L'ọ bụ iya bẹ mụru ẹphe.’ Ẹphe ghawaru iya azụ; ẹphe ta ghahẹduru iya ifu. Ọle ọobujekwanu iphe-ẹhuka dakfuta ẹphe; ẹphe arashịa: ‘Tẹ ya bya adzọo ẹphe!’
28 “?Nanụhunu agwa ọbu, unu gwọshiru onwunu ọbu? T'ẹphe byanụ m'ọ -bụru l'ẹphe a-dzọta unu teke unu nọ l'iphe-ẹhuka; kẹ l'ọ bụ ẹge unubẹ ndu Júda nweberu mkpụkpu l'igweligwe bụ ẹge agwa unu habekwaphu l'igwe. 29 ?Nanu ẹge e gude unu ekfu l'o nweru iphe ya meru unu? Unu tụkookwa l'unu ha kwefukotaru iya íkè!” Ono kwa iphe Ojejoje kfuru. 30 Iphe ya chiru ụnwu unu bụkwa iphe-mmanu; keshinu ẹ-tọ bụdu l'ẹphe eye ọnu k'omezi iphe ẹphe mesweru emeswe. Unu gudewa ogu-mbeke sụa ndu nkfuchiru unu pyaapyaa ẹge agụ, alajashịje iphe o guderu alajashị.
31 Unubẹ ọgbo elenu; t'ẹnya runua unu l'iphe Ojejoje ekfu, sụru: ?Ya bụjeru ndu Ízurẹlu echi-ẹgu tọo; tẹ ya bụjeru ẹphe alị ẹkpuru-ọchi? ?Nanụhunu ẹge ọ dụ bẹ ndibe iya ekfu: L'ẹphe nọwaru onwẹphe. Tọ bụhe l'ẹphe abyakfutakwadu iya ọdo. 32 Nwamgbọko; ?ọozahaje ụkpoto iya? Tẹ nwanyi, ala nji; ?ọozahaje ọba, o gude ala nji? Obenu lẹ ndibe iya zahawaru iya ugbo olemole, ẹ ta agụtadu agụta. 33 Unu lewaru ẹge unu gude achọ-be n-yemobu! Mbụ lẹ nwanyi, katsụkpo ẹji; bẹ unu ziakwaru iphe unu eme. 34 Ọ bụ l'uwe unu bẹ ndiphe aphụje mee ndu, ẹ te nwedu ẹge ọ haru ẹphe meru; l'ẹ ba abụ l'unu guderu ẹphe l'ẹke ẹphe etsuka ụlo unu. Unu mebetsua; 35 unu asụ: L'ẹ tọ dụkwa iphe unu meru. L'ẹhu te eghukwa iya eghughu l'ẹke unu nọ. Ọbule ya e-kpekwanụ unu ikpe; keshinu unu sụru: L'ẹ tọ dụdu iphe unu meru. 36 ?Nanu ẹge e meru; unu etsoru l'aghaphe l'achọ ẹge unu e-shi gbanwee ụzo unu? Ọ kwa ẹge ẹ tọ dụdu iphe ndu Asiriya dụru ike meeru unu bụ ẹge ẹ to nwedu iphe ndu Íjiputu a-dụ ike emeru unu. 37 Unu e-shikwa l'ẹke ono gbaru ẹka lata; kẹ l'iphe bụ ndu ono, unu chịru obu yeru ono bẹ ya jịkakotawaru; ọphu ẹphe 'eyekwaru unu ẹka.

© 2014 WBT