1 L'afa eze ndu Asiriya; mbụ Sagọnu ziru onye ishi sọja iya t'o jeru ndu Asurẹlu ọgu; lụta iya; 2 bẹ Ojejoje gude Azáya Emọzu kfua okfu. Iphe o kfuru abụru: “Yefu uwe-aphụ ono, i yeru ono; nggu eyefu akpọkpa ono, i yeru ono!” Yo yefu iya; gbaru ẹhu ọtu; gbaru ọkpa ọtu l'aghaphe. 3 Tọ dụ iya bụ; Ojejoje asụ: “Ọ bụ ẹge ono, nwozi mu, bụ Azáya gba ẹhu ọtu; gbaru ọkpa ọtu ghaphee afa ẹto ono; yọ bụru iphe-ọhubama yẹle iphe dụ biribiri, e meru ndu Íjiputu yẹle ndu Kúshi ono; 4 bụ ẹge eze ndu Asiriya a-kpụ ndu Íjiputu yẹle ndu Kúshi lẹ ndzụ; yeshia ẹphe uwe; gbabẹ ẹphe ọkpa ọtu kpụru ẹphe lashia; nwata mẹ ọgurenya; ike e-ghekotaru ẹphe ọnu t'ọ bụru iphe ee-gude mee ndu Íjiputu iphe-iphere. 5 Ndu tukoberu ndu Kúshi ishi; bya egude ndu Íjiputu eku onwẹphe bẹ egvu e-gude; iphere abụru nk'ẹphe. 6 Mbọku ono bẹ ndu bu l'iku eze ẹnyimu-a a-sụ: ‘Unu phụduduphu iphe meru ndu ono, ayi shi túkòbe ishi ono; mbụ ndu ono, ayi shi gbaru obu yeru l'ọo ẹphe a-gbaaru ayi mkpu; dzọo ayi l'ẹka eze ndu Asiriya! ?Nta-a; nanụ ẹge ayi e-shi nahụ?’ ”