10
Ojejoje e-leta ndu Júda ẹnya
1 Unu kfuru Ojejoje t'ọ chịaru unu mini l'oge mini-ọdungu. Ọ kwa Ojejoje emeje tẹ igwe rua eruru. Ọo ya ayọjeru ụnwu eliphe mini; bụkwaru iya phụ emeje tẹ iphe nọ l'ẹgu onyemonye l'aja pulapula. 2 Ọgvu agwọta bụ atukporoko; ndu njibya aphụje iphe ẹ ta bụdu ezi-okfu; l'ezeje nrọ, ẹ te medunu. Ike, ẹphe adụ madzụ abụru ọchi; bẹ ẹphe achị onye ọbu. Ọ bụ iya kparu iphe madzụ gbakashịhuru l'ọ bụ atụru, ẹ te nwedu onye, eleta iya ẹnya.
3 Meji adakwa iya kitikitii l'okfu ẹhu ndu eche atụru ono. Ya a-nụkwanu ndu ishi ono aphụ; kẹle Ojejoje, bụ Ọkaribe-Kakọta-Ike e-letaa atụru iya, bụ iya bụ ọnu-ụlo Júda; mee ẹphe t'ẹphe dụ l'ọ bụ ịnya, dụ ugvu l'ẹke e gude iya alụ ọgu. 4 Ọ bụ lẹ Júda; bẹ mkpuma, bụ itso, gude ụlo e-shi lụfuta; bụru iya; bẹ nggu, gude ụlo-ẹ́kwà e-shi; bụru iya; bẹ akfụ, e gude alụ ọgu e-shi; bụkwaru iya phụ; bẹ iphe bụ ndu a-bụru ishi e-shi lụfuta. 5 Ẹphe a-tụgbabe bụru nanụ l'ọ bụ ndu ike-ka-l'ọgu, nọ l'ọgu. Ẹphe e-gude ọkpa dzọo ẹpoto, nọ l'echi-ụzo tọlitoli l'oge ọgu. Ẹphe a-lụ ọgu; chịkaa ndu gude ịnya l'alụ; kẹle Ojejoje nọ swiru ẹphe.
6 “Ya e-me t'ọnu-ụlo Júda shihu ike;
bya adzọo ọnu-ụlo Jósẹfu.
Ya e-me t'ẹphe laphu azụ l'ọnodu ẹphe;
kẹle ya a-phụru ẹphe imiko.
Ẹphe a-dụ l'ọ bụ ndu
ya te shidu jịka ajịka;
kẹ l'ọo yẹbedua bụ Ojejoje;
bụru Nchileke ẹphe;
Ya a-zajẹ ẹphe oku.
7 Ndu Ífuremu e-mekochaa
dụ l'ọ bụ ndu ike dụ l'ọgu.
Ẹhu a-nọdu atsọ ẹphe ẹna
l'ọ bụ ndu ngụru mẹe.
Ụnwu ẹphe a-phụ iya;
tee ẹswa.
tee ẹswa.
Ẹhu awata ẹphe ọtso ẹna l'ime Ojejoje.
8 Ya e-meru ẹphe ẹka; gude chịbata ẹphe.
Ishi iya abụru lẹ ya gbafụtaje ẹphe;
ẹphe abya aha igwe ẹge ẹphe shi hahawa.
9 A makwaru-a lẹ ya chịkashiru ẹphe;
ẹphe atụko ẹkemeke dzuru;
ọle ẹphe e-shitsua ẹke,
teru ẹnya nyata iya.
Ẹphebedua; ẹphe
l'ụnwegirima ẹphe a-wafụ; latashia.
10 Ya e-shi lẹ Íjiputu je chịlata ẹphe;
shi lẹ Asiriya rukobe ẹphe.
Ya a-chịru ẹphe lata lẹ
Gíledu; mẹ Lébanọnu;
k'ọphu bụ l'ẹ to nwehedu
ẹke e-dzu ẹphe anọdu.
11 Teke ẹphe a-nọdu eswe
eze ẹnyimu iphe-ẹhuka ono;
bẹ ya e-me t'eyii-mini ono dazita;
èbò Ẹnyimu Náyịlu l'ọ ha atashịhu.
Ekuku ono, ndu Asiriya
eku onwẹphe ono adapyahụ;
mgbọro ono, shi bụru ike
ndu Íjiputu ono abụru chaphungu.
12 Ya e-me; ike adụ ẹphe l'ime Ojejoje.
Yọ bụru ẹpha Ojejoje; bẹ ẹphe e-gude eje.”
Ono iphe Ojejoje ekfu ndono.