80
Egvu-ọma, Ásafu deru nụ onye ishi egvu; t'e gude olu egvu “Okfukfulike Ọgba-ndzụ” gụa ya
1-2 Ngabẹnuru ayi nchị;
nggụbe onye eche Ízurẹlu
l'ọ bụ onye eche atụru;
bụru onye anọduje achị
ndibe Jósẹfu l'ọ bụ onye
chị igwe atụru l'eje nri.
Tẹ nggụbe onye ono,
sụgaru lẹ cherobimu ono
chinua l'ọ bụ anwụ l'ifu
ndu ikfu Ífuremu;
mẹ kẹ ndu Bénjaminu yẹle kẹ ndu Manásẹ!
Byiko rụkotanu ike ngu bya adzọfuta ayi!
3 Dobephunu ayi azụ l'ọnodu ayi;
nggụbe Nchileke!
Mụnuaru ayi ọnu-ọchi;
k'ọphu aa-dzọfuta ayi.
4 Nggụbe Ojejoje;
nggụbe Nchileke,
bụ Ọkaribe-Kakọta-Ike;
?bụkpo teke ole; bẹ ẹhu
e-ghuberu ngu eghughu;
kẹ t'ẹ b'ị nụje ekfukfu,
ndibe ngu ekfu anụ ngu?
5 Nta-a b'i mewaru ẹphe;
ẹnya-mini abụru ẹphe nri;
mee ẹphe; ẹphe angụa ẹnya-mini,
jiru njaka-ọnu.
6 I mewaru; ndu obutobu ayi;
ẹphe aja ayi ewena;
mee ndu ọhogu ayi l'achị ayi ọchi.
7 Dobephunu ayi azụ l'ọnodu ayi;
nggụbe Nchileke,
bụ Ọkaribe-Kakọta-Ike!
Mụnuaru ayi ọnu-ọchi;
k'ọphu aa-dzọfuta ayi.
8 Ọ bụ nggu shi lẹ Íjiputu
gbuta vayịnu wolata;
bya achịko ndu ọhodo
chịshia l'alị ẹphe; woru iya dzabẹ.
9 Ọ bụ nggu gude ẹka ngu
gbuchashia ẹke ị dzabẹru iya.
Yọ bya agbaa ọ́gbaragba,
chịkoru alị ono l'ọ ha jegbaru.
10 Yọ jaa ajaja jachikota iphe bu ugvu;
mbụ l'ẹkali iya halẹphu l'eli
l'ọ bụ eze oshi sida.
11 Ẹkfukala iya jeruru eze ẹnyimu.
Ọ́gbaragba iya atụko
ẹkemeke ọbule dzuru;
mbụ jeye lẹ
Ẹnyimu Yufurétusu.
Ẹnyimu Yufurétusu.
12 ?Nanu ẹge ọ dụ;
b'i fọkashiru mgbabu iya;
k'ọphu iphe bụ onye esweta nụ
ejeje je awọ akpụru iya ege ọ dụ iya?
13 Ezi-ọswa, shi l'ẹgbudu
awukfuta iya bya atakwoshia ya.
Ụnwu anụmanu abụru iya;
bẹ ẹphe gude azụ onwẹphe.
14 Latanụ azụ lakfuta ayi;
nggụbe Nchileke,
bụ Ọkaribe-Kakọta-Ike!
Shinu l'imigwe lee ẹnya
phụkpoduaphu iphe amụ nụ.
Byiko letanu vayịnu ngu-a ẹnya;
15 mbụ vayịnu, bụ nggụbedua
gude ẹka ngu dzabẹ iya;
mbụ nwata nwoke,
bụ nggụbedua gude ẹka ngu zụa ya zụfuta.
16 Vayịnu ngu ono; b'e gbutsuakwaru.
Ọku dzụkotaakwaru iya.
Mba, ị baru ndibe ngu
meekwaru t'ẹphe laa l'iyi.
17 Kwakọbenu nwoke ono,
bụ nggụbedua gude ẹka ngu fọta iya ono;
mbụ onye ono,
bụ nggụbedua gude ẹka
ngu zụfuta iya ono.
18 Ọo ya bụ k'ọphu ayi ta aghadụru ngu azụ.
Menua tẹ ndzụ bụru nk'ayi;
ẹge ayi a-wata oku ẹpha ngu ọdo.
19 Dobephunu ayi azụ l'ọnodu ayi;
nggụbe Nchileke,
bụ Ọkaribe-Kakọta-Ike!
Mụnuaru ayi ọnu-ọchi;
k'ọphu aa-dzọfuta ayi.