78
Ẹ́vù, Ásafu raru
1 Ndu mu; unu ngabẹ nchị;
tẹ mu zia unu iphe!
Unu ngabe nchị;
nụa okfu, shi mu l'ọnu!
2 Mu e-gude ẹtu ẹtu
vọshiaru unu iphe,
e shi keshinu ndiche
domiaru unu edomi.
3 Iphe ono bụ iphe ayi nụhawaru;
bụru iphe ayi mahawaru;
mbụ iphe nna ayi oche phẹ
shi akọjehawaru ayi.
4 Ayi te edomikwaru iya
ụnwu ayi iphe biribiri;
mẹ iphe-ọphulenya,
Ojejoje mekotaru;
jeye l'iphe ndu ọphu e gude jaa ya ajaja.
Ayi a-kọru iya ndu ọgbo
ọphu nọkwadu l'ifu.
5 O doberu ụnwu Jékọpu nsọ,
ẹphe e-tsoje;
bya atụa ekemu dobe;
yọ ngụru angụru l'alị Ízurẹlu;
bya asụ ndiche ayi phẹ
t'ẹphe zikwaa ya ụnwegirima ẹphe;
6 k'ọphu ọgbo ọphu abya nụ
a-maru iya;
a-maru iya;
mbụ ndu ọphu e te gbe amụdua.
Ẹphebedua egudekwa
iya phụ zia ụnwu nk'ẹphe.
7 E shi ẹge ono; ẹphe akpọru
obu yeru Nchileke;
k'ọphu ẹphe ta azahadụ iphe o meshiru;
ẹphe edobedzua ekemu iya l'ọ ha.
8 Ẹphe taa adụhedu l'ọ bụ
nna ẹphe oche phẹ,
shi bụru ndu ẹjo ọkpoma;
bụru ndu, kwefuru Nchileke íkè;
mbụ ọgbo, ẹ ta adụdu teke
ẹphe wozitajeru onwẹphe
alị l'ẹke Nchileke nọ;
t'e gude ire ẹphe ẹka l'ẹke Nchileke nọ.
9 A makwaru-a l'unwoke
Ífuremu gude akfụ kwaa
onwẹphe ngwa-ọgu.
Obenu l'ọgu dalẹruphu;
ẹphe eye ọkpa l'ọso; gbalashịa.
10 Ẹphe dakaru ndzụ, ẹphe lẹ
Nchileke gbaru;
jịka ome iphe ọ tụru ẹphe l'ekemu.
11 Ẹphe zaharu iphe Nchileke meshiru;
mbụ iphe dụ biribiri,
o meshiru koshi ẹphe.
12 O meshiru iphe dụ biribiri
l'ifu nna ẹphe oche l'ẹgu
Zowanu lẹ Íjiputu.
13 Eze Ẹnyimu b'o meru;
yọ bọkahu ẹbo.
Yo dua ẹphe;
ẹphe awụ-sweta.
ẹphe awụ-sweta.
Yọ bya emee mini;
yọ kpụa nmororo l'ọ bụ ụpho-mkpuma.
14 Iphe o gude dua ẹphe l'eswe bụ urukpu;
bya egude iphoro ọku dua
ẹphe l'ẹnyashi mbọku-mbọku.
15 Agbara-mkpuma b'ọ
gbajahụru ẹbo l'echi-ẹgu;
mini eshi iya nwufuta
l'enwu dụkuduku l'ọ bụ eze ẹnyimu.
16 Yọ bụru ẹke mkpuma
gbaru ọru b'o meru;
mini atsọshihu; tsọlahaa l'ọ bụ nggele.
17 Obenu l'ẹphe emelee iphe dụ
ẹji l'ẹke Nchileke nọ.
Ẹphe nọlee l'echi-ẹgu ono;
kwefuleru-a
Ọkaribe-Kakọta-Nụ íkè.
18 Ẹphe lebezikpooru ẹnya
wata ọdata Nchileke;
mbụ kebekpelephu l'ọ
nụ-futaje ẹphe iphe agụebe ẹphe.
19 Ẹphe kfuru Nchileke ẹjo okfu: sụ:
“?Bụ kẹ nri, Nchileke a-dụ ike
nụ ẹphe l'echi-ẹgu tọo?
20 Teke ọ kụru iphe lẹ
mkpuma ono; bẹ mini,
shi iya nụ tsọlahaaru l'ọ bụ nggele.
Ọlobu; ?ọo-nụ-ghe ẹphe nri tọo?
L'ọo dụ ike nụ ẹphe anụ, ẹphe a-ta tọo?”
21 Ojejoje anụle iya phụ;
vọru ọku ghụa ẹhu;
gude ọku ẹhu-eghughu iya
kpọberu ndibe Jékọpu;
bya eworu ẹhu-eghughu
iya byiberu ndu Ízurẹlu;
22 kẹ l'ẹphe te kwetadu kẹ Nchileke;
ọphu ẹphe 'ekwetakwaphu
l'ọo-dụ ike dzọfuta ẹphe.
23 Obenu l'o kfuru akpamigwe iphe oo-me;
bya agụhashia ụzo imigwe;
24 bya achịaru ndu Ízurẹlu
mana ono l'ọ bụ mini.
Yọ bụru akpụru iphe
shi l'igwe b'ọ nụru ẹphe ẹge ono.
25 Madzụ eria nri, ụnwu ojozi-imigwe erije.
Ọ nụru ẹphe nri;
ẹphe eria ẹge ọ gụru ẹphe.
26 Phẹrephere, eshije l'ụzo
ẹnyanwu-ahata, bụ yẹbedua
tụharu iya ụzo imigwe.
Yọ wata ephephe.
Ẹge ono kwaphu b'o gude
ike iya nwufuta ọphu eshije
l'ụzo ọhuda.
Yọ wata ephephe.
27 Anụ, aata atata b'ọ chịru
ẹphe l'ọ bụ mini;
yoo tsu gbigbigbi l'ọ bụ udzu, nọ l'alị.
Ụnwenu, ephe l'eli b'o nwuru nụ ẹphe;
yọ ghakashịhuru ẹphe l'ọ
bụ ẹja, kụru l'iku ẹnyimu.
28 O meru ẹphe; ẹphe
ephebatsua l'ọdu ẹphe.
O shi anọduje ephephe
l'ụlo-ẹ́kwà ẹphe mgburumgburu.
29 Ẹphe eria nri jeye ẹpho eji ẹphe;
kẹ l'ọ nụru ẹphe iphe agụ ẹphe.
30 Ọle t'ẹphe kwaa rigee nri ono,
mbụ l'ẹphe kpụkwadu iya l'ọnu;
31 Nchileke atụ-koshilahaa ẹphe
oke ẹhu-eghughu iya.
Yo woru ndu ọphu ike ka l'ẹphe gbushia;
tụko iphe bụ ndu
k'okorọbya ndu Ízurẹlu mebyishia.
32 E metsua; ẹphe emelee iphe ẹphe eme.
Yo meshitsua iphe-ọphulenya ono;
ẹphe te ekwekwa kẹ Nchileke.
33 Ọo ya meru iphe ọogbaje
ndzụ ẹphe kwoo;
gude iphe-ẹhuka wofu ndzụ ẹphe.
34 Yọo bụje teke Nchileke
haru ẹphe gbushia;
ndu ọphu phọduru nụ achọlahaa ya.
Ẹphe ataa onwẹphe ụta
iphe ẹphe meru;
kfulahaa l'anụ iya.
35 Teke ono; ẹphe anyata
l'ọo Nchileke bụ
agbara-mkpuma ẹphe;
nyatakwaphụ l'ọo Nchileke ono,
bụ Ọkaribe-Kakọta-Nụ ono
bụ onye gbafụtaru ẹphe.
36 Ọle ọ bụ ajaja eli-ọnu;
bẹ ẹphe ajajẹ Nchileke;
mbụ l'ire-lanụ ta anọjedu
ẹphe l'ọnu lẹ phuu.
37 Obu ẹphe ta anọjedu l'ẹke ọ nọ;
ọphu ẹphe edobejedu ndzụ, ẹphe l'iya gbaru.
38 Obenu lẹ Nchileke
anọdujele-ẹ l'aphụru ẹphe imiko.
Ọogujeru ẹphe nvụ k'iphe
dụ ẹji, ẹphe meshiru
ọphu o mejedu t'ẹphe bụru kpurupyata.
Tekenteke bẹ ọonoduje ata nshi;
too meje ẹphe iphe ẹge o ghutaberu iya.
39 Ọonyataje l'ẹphe bụ madzụ mmanu;
l'ẹphe dụ l'ọ bụ phẹrephere,
abụje: o -pheswewa;
too phelatahedu azụ.
40 Ugbo olemole; bẹ ẹphe
kwefuru iya íkè teke ẹphe nọ l'echi-ẹgu;
kpatsua ya iwe l'alị, ono,
daburu swanmangu ono.
41 Tekenteke; bẹ ẹphe shi
anọduje adata Nchileke adata.
Ẹphe shi anọduje akpatsu
onye dụ nsọ kẹ ndu Ízurẹlu ẹhu-eghughu.
42 Ẹphe ta anyatahẹdu ike iya ono;
mbụ ike ono, o gude
gbafụta ẹphe l'ẹka ndu ono,
shi emegbu ẹphe emegbu ono;
43 bụ iya bụ mbọku, o meru;
a phụ iphe dụ biribiri,
o meshiru lẹ Íjiputu;
mẹ iphe dụ egvu, o meshiru l'ẹgu Zowanu.
44 Iphe bụ ẹnyimu ẹphe b'o meru;
yọ ghọkota mee;
to nwehe mini, ẹphe phụru k'angụngu.
45 Ọ chịru ijiji ye;
yọ bya anụa ẹphe chịkikfuu;
bya achịru mbara ye;
yo mebyishia alị ẹphe.
46 Iphe ẹphe kụru l'alị
b'ọ chịru ọ́vú ye;
yo je atapyashịa ya;
bya achịru igube yeru ndu
ọphu mịru amịmi;
yọ tapyaa ya.
yọ tapyaa ya.
47 Oshi sikamo ẹphe;
b'o gude aka-mini tụpyashia;
bya egude iji mebyishia
akpụru vayịnu ẹphe.
48 Eswi ẹphe b'o gude ẹjo
aka-mini tụ-gbushikota;
bya egude egbe-igwe
tugbushikota elu ẹphe l'ọ ha.
49 Ọ chịkoru oke ẹhu-eghughu
iya l'ọ ha byabẹ ẹphe;
chịta ẹjo
ụnwu ojozi-imigwe ye
t'ọ je anụa ẹphe aphụ.
50 Ẹ tọ tuzedu ẹka
l'ẹhu-eghughu iya;
ọphu o dobedu ẹphe ndzụ.
O woru ẹphe haaru
ẹjo iphe-ememe ono
t'o meghee ẹphe emeghe.
51 Iphe bụ ndu, bụ ọkpara
lẹ Íjiputu b'o gbukotaru l'ẹpha ha;
mbụ iphe bụ nwa ọdungu ẹphe l'alị Hamu.
52 Obenu lẹ ndibe iya b'ọ tọru
nwẹhu ruta ẹge eerutaje atụru;
bya echee ẹphe chịriru
lẹ werere gude swee
echi-ẹgu ono.
53 O duru ẹphe domangu lẹ
rimangu t'ẹphe ba atsụ egvu.
Obenu lẹ ndu ọhogu iya;
bẹ eze ẹnyimu rigbushikotaru.
54 Yo shi ẹge ono;
dua ẹphe durua ẹke,
bụ ókè-alị iya, dụ nsọ;
mbụ durua ẹphe l'ugvu ono,
o gude ike k'ẹka iya lụta ono.
55 Ọ chịshiru ẹphe iphe bụ
mbakeshi, nọ-chiru ẹphe ụzo;
bya eworu alị ẹphe keeru
ndu Ízurẹlu t'ọ bụru òkè-iphe ẹphe.
Ọ chịru ndu ikfu Ízurẹlu ye
t'ẹphe buchishia alị ẹphe ono.
56 Ọle e megeeru;
ẹphe abya adata Nchileke;
kwefulerua
Ọkaribe-Kakọta-Nụ íkè;
mekota iphe bụ iphe ọ sụru t'ẹphe be eme.
57 Ọ bụ ẹjo ọkpa, nna ẹphe
tsoru bẹ ẹphe tsochitaru;
bụkotaru ndu ẹ te gudedu ire ẹphe ẹka.
Onye dakoberu ẹphe dụ l'ọ
bụ onye dakoberu okpete.
58 Ẹphe gude ẹke ẹphe agwajẹ
iphe ẹphe doru l'ẹkemeke;
kpatsua Nchileke iwe;
yo kolahaaru ntẹkpe,
ẹphe pyịshiru okopho.
59 Teke Nchileke phụru iya;
bẹ ẹhu ghuru iya eghughu nshinu.
Yo gude k'ono jịka-ghee
ndu Ízurẹlu teteretengu.
60 Ọ gwọberu ụlo-ẹ́kwà iya
ono, nọ lẹ Sháyilo ono;
mbụ ụlo-ẹ́kwà ono,
ọ kpọberu; bua l'ẹke, madzụ bu ono.
61 Ọ haru ndu ọhogu; ẹphe evuta
Okpoko Ọgba-ndzụ iya;
mbụ Okpoko Ọgba-ndzụ,
bụ iya ekoshije
ẹge ike iya habe nshinu;
bụkwaruphu iphe ekoshije
ẹge ọ dụ-be biribiri
b'ọ paru haaru ndu ọhogu iya.
62 Ọ paru ndibe iya haa;
e gbushia ẹphe;
kẹle ndu nk'iya ono meru;
ẹhu eghulahaa ya eghughu.
63 Ụnwu-okorọbya ẹphe
b'e gbugeru l'ọgu.
Ụnwu-mgbọko ẹphe akwashịa;
tọ dụ onye a-lụ ẹphe.
64 Ndu achịjeru ẹphe ẹja;
b'e gbushiru;
ọphu unyomu ẹphe 'aradụ m'ọo ẹkwa ẹphe.
65 A -nọnyaa; Nnajiufu ezilihu
l'ọ bụ onye shi eku mgbẹnya;
mbụ kwolihu l'ọ bụ onye
ngụru mẹe t'o phohuwa iya l'ẹnya;
66 bya achịa ndu ọhogu iya ichifu;
mee ẹphe iphe-iphere,
bụ 'azaha azaha.
67 Eri Jósẹfu l'ọ ha b'ọ jịkakotaru;
tọ fọta ndu ikfu Ífuremu.
68 Obenu l'ọ fọtaru ndu ikfu Júda;
bụ iya bụ Ugvu Záyọnu
ono, o yeru obu ono.
69 Yọ bya eworu ụlo iya,
dụ nsọ kpụa;
yọ ha l'ọ bụ eze ugvu;
mbụ kpụa ya;
yọ dụ l'ọ bụ alị, o meru;
yọ bụru iphe a-nọ jeye lẹ tutu yoyo.
70 Ọ fọtaru nwozi iya, bụ Dévidi;
dufuta iya l'ẹke ọ nọ
l'ọdu-atụru.
71 O dufutaru iya l'ẹke ooche atụru
t'ọ bya eleta ndibe iya,
bụ iya bụ ụnwu Jékọpu ẹnya;
mbụ t'ọ kpọ-zijeru ụnwu Ízurẹlu,
bụ òkè-iphe iya ụzo.
72 Dévidi gudekpelephu obu,
gụru iphoro leta ẹphe ẹnya;
gude ọkpobe mmamiphe chịkota ẹphe.