1 “Unu yekwa ụpyoku l'ọnu; kẹ l'udele bekwaru l'eli ụlo Ojejoje; yọ bụru iphe kparu iya nụ bụ lẹ ndu Ízurẹlu mebyiwaru ọgba-ndzụ mu l'ẹphe; bya ekwefu íkè l'ẹphe te emedu ekemu mụbe Ojejoje. 2 Ndu Ízurẹlu echiku iya lẹ mkpu; sụ: ‘Nggụbe Nchileke ayi; ayi maakwaru ngu-a!’ 3 Obenu lẹ ndu Ízurẹlu jịkawaru iphe dụ mma. Yọ bụru onye ọhogu e-mekochaa chịa ya ọso.

4 “Ẹphe afọtaje ndu a-bụru ẹphe eze; ẹphe ta achị-koshi mu idzu iya. Ẹphe afọta ndu a-bụru ẹphe ishi; ẹphe te eme tẹ mu maru. Ẹphe egudeje mkpọla-ọcha; mẹ mkpọla-ododo akpụshiru onwẹphe nte; shi ẹge ono emetaru onwẹphe ọ-la-l'iyi. 5 Unu tufakwaa nte nweswi unu ono; unubẹ ndu Samériya; kẹ l'o ghuakwa iya eghughu l'ẹnya! ?Bụ teke ole; bẹ ndu Ízurẹlu a-nọ-bebe; tẹmanu ẹphe adụ ike dụ-gee mma l'ifu iya? 6 Ọ bụ lẹ Ízurẹlu b'o shi; mbụ nweswi ọbu, bụ iphe ndu eme nka meru. Ẹ tọ bụdu Nchileke b'ọ bụ. Ọ bụ iphe aa-kụkposhi ibiribe ibiribe; mbụ nweswi ndu Samériya ono. 7 Ẹphe akọje phẹrephere l'ọ bụ okfu. Ẹphe -kpatadẹ iya akpata; ẹphe akpata iya ọku-maa. Akpe ẹ-ta patadu okpoko; ta mịtakwa nebyi. Ọ -mịtakpoonu nebyi amịta; bụkwa ndu ọhodo e-ri iya. 8 Ndu Ízurẹlu b'e lemiwaru. Nta-a; bẹ ẹphe nọtsuwa l'iphe bụ mbakeshi l'ọ bụ iphe ta dụdu mkpa, ọoga; 9 kẹ l'ẹphe tụgburu jeshia Asiriya l'ọ bụ nkakfụ-ịgara-ọswa, aghaphe nkịnyi iya. Ndu Ífuremu; bẹ butawaru ndu ẹphe l'ẹphe a-nọdu eshi ọnya ebuta, 10 A makwaru-a l'ẹphe je ebukoo ndu ọnya l'iphe bụ mbakeshi; ọbu lẹ ya byalẹrua bya achịkobe ẹphe ọdo; tẹ ọkaribe onye eze ono kpụa ẹphe ishi.

11 “A makwaru-a lẹ ndu Ífuremu kpụshiru ẹnya-ngwẹja, ha igweligwe, ẹphe a-nọduje egwo ẹja l'enwefu iphe dụ ẹji, ẹphe meru. Obenu l'ẹnya-ngwẹja ono gbe bụhukwaruphu ẹke aanọduje eme iphe dụ ẹji. 12 Mu abya edeeru ẹphe ẹkwo; kfuaru ẹphe iphemiphe ọbule, mu tụru l'ekemu. Ẹphe ewoleru iya-a l'ọ bụ iphe shi l'ọhodo. 13 Ẹphe -gwaa iphe e gude bya iya anụnu; ẹphe eworu anụ iya taa; obenu lẹ Ojejoje; bẹ iphe ẹphe eme ta adụdu mma. Nta-a; bẹ ọo-nyata iphe dụ ẹji, ẹphe eme; hụ̀a ẹphe àhụ̀hù k'iphe dụ ẹji ẹphe. Mbụ l'ẹphe e-mekochaa lashia azụ lẹ Íjiputu.

14 “Ndu Ízurẹlu zahaawaru onye meru ẹphe; bya akpushia ụlo ndu eze. Ndu Júda egudewa ụpho-mkpuma; kpụ-phee mkpụkpu, dụ igwe mgburumgburu. Obenu lẹ ya e-gude ọku tụfu mkpụkpu ẹphe ono; yọ dzụfu iphe ono ẹphe gude metsua mkpụkpu ẹphe; yọ bụru ọkpo-mgbinyiku ono.”