1 Yo be l'afa, kwe Ása ụkporo afa l'afa iri l'ishingu; k'ọphu ọ dụberu bụru eze; Baasha, bụ eze ndu Ízurẹlu abya etso ndu Júda ọgu. Yo je akpụa mkpụkpu Ráma; yo shihu ike; k'ọphu bụ l'ẹ to kwedu t'o nweru onye e-shi l'ẹke iya kẹ Ása, bụ eze ndu Júda lụfu alụfu; m'ọ kwanu bahu abahụ.

2 Tọ dụ iya bụ; Ása ewota mkpọla-ọcha; mẹ mkpọla-ododo, shi l'ẹku, nọ l'eze-ụlo Nchileke; mẹ ọphu, nọ l'ufu-eze wojeru eze ndu Áramu, bụ iya bụ Bénu-Hadadu lẹ Damásukọsu; bya asụ iya: 3 “Tẹ nggu l'iya tụgbanu bụru nanụ; ẹge ono, nna iya yẹle nna ngu shi tụgba ono. Lekwa mkpọla-ọcha yẹle mkpọla-ododo, ya wotaru ngu. Tụgbukwaa je emebyia atụgba ono, nggu lẹ Baasha, bụ eze ndu Ízurẹlu tụgbaru ono; k'ọphu ọo-parụ iya haa.”

4 Tọ dụ iya bụ; Bénu-Hadadu anata iphe ono, eze, bụ Ása kfuru ono. Yo zifu ndu ishi ndu sọja iya; ẹphe ejeshia ọgu lẹ mkpụkpu, nọgbaa l'alị Ízurẹlu. Ẹphe alụta ndu Ịjọnu; lụta ndu Dánu; lụta ndu Ébẹlu-Memu; mẹwaru iphe, bụ mkpụkpu ẹke aakwakọbeje iphe l'alị Náfutali l'ọ ha. 5 Baasha anụlephu iphe, meru nụ; parụ ọkpu mkpụkpu Ráma t'o shihu ike haa; gwọbe ozi, o gude l'ẹka. 6 Ya ndono; eze, bụ Ása achịta ndu Júda l'ẹphe ha; ẹphe eje evua mkpuma yẹle oshi ono, Baasha shi gude l'akpụ Ráma t'o shihu ike ono. Yọ bụru iya bẹ Esa gude kpụa Géba; mẹ Mízupa; yo shihu ike.

7 Yọ bụru teke ono bẹ Hanani, bụ onye aphụje àphụ̀ byakfutaru Ása, bụ eze ndu Júda bya asụ iya: “Keshinu ọphu i dakoberu eze ndu Sayiria; tị dakobe Ojejoje, bụ Nchileke ngu; bẹ ndu sọja eze ndu Sayiria ono gbafụakwaru ngu l'ẹka. 8 Ndu Itiyópiya; mẹ ndu Líbiya; ?tọ bụdunua ẹphe chị ikpoto ndu sọja; chịru igweligwe ụgbo-ịnya; mẹ ndu agba iya nụ byaru ngu ọgu. Ọbu; ?tọ bụdunua l'ị dakoberu Ojejoje meru; yo woru ẹphe ye unu l'ẹka. 9 Ẹnya Ojejoje bụkwa o-jedzuru-ụwa. Ọonoduje l'achọ ndu woru obu ẹphe l'ọ ha yeru iya t'o mee t'ẹphe kabaa oshihu ike. I mewaru umere onye eswe. Ọo ya bụ lẹ tsube nta-a kwasẹru bẹ ọgu a-nọdu etso ngu.”

10 Tọ dụ iya bụ; Ása avọru ọku ghụa ẹhu l'ẹke onye ono, aphụje àphụ̀ ono nọ; gude iya tụ-chia l'ọka mkpọro; k'iphe ono, o kfuru ono. Yo nweru ndu ono ndu ọphu Esa wataru ọkpa ẹhu lẹ teke ono.

11 Iphe, Ása mekotaru; shita l'ishi jeye lẹ ngvụcha b'e dekotaru l'ẹkwo ndu eze ndu Júda; mẹ kẹ ndu Ízurẹlu. 12 Yọ bụru l'afa, kwe Ása ụkporo afa l'afa iri lẹ tete, k'ọphu ọ dụberu bụru eze; bẹ iphe-ememe melahaaru iya l'ọkpa. Iphe-ememe ono abya aka njọ. Mbụkponu teke ono, iphe ono eme iya ono b'ẹ tọ chọkwa Ojejoje. Yọ bụru ndu l'eme ọgvu b'ọ chọ-chiaru t'ẹphe yeru iya ẹka. 13 Tọ dụ iya bụ; Ása abya anwụhu lakfushia nna iya phẹ. Yọ bụru l'afa, kwe iya ụkporo afa labụ l'afa lanụ, k'ọphu, ọ wataru ọbu eze b'ọ nwụhuru. 14 Ẹphe elia ya l'ili, ọ tụru doberu onwiya lẹ Mkpụkpu Dévidi. Ẹphe eye iya l'igbe-odzu, a wụru manụ, dụ iche iche, eshigbaa kwẹkwekwe. Ẹphe akpọbe ọku, enwu phophopho gude kwabẹ iya ugvu.