18
Okwu Bildad
1 Mgbe ahụ Bildad onye Shua zara sị:
2 “Ruo ole mgbe ka ị ga-ekwubi okwu ndị a ị na-ekwu?
Nwee ezi uche ka anyị kparịtaa ụka.
3 Gịnị mere i ji were anyị dịka anụ ọhịa,
gụọ anyị dịka ndị na-enweghị uche nʼanya gị?
4 Gị onye na-eji iwe adọkasị onwe gị,
a ga-ahapụ ụwa nʼihi gị?
Ka a ga-enupu oke nkume nʼọnọdụ ha?
5 “A na-afụnyụ oriọna nke onye na-emebi iwu;
ire ọkụ ya ga-akwụsịkwa inwu enwu,
6 ìhè nke dị nʼime ụlọ ikwu ya na-abụ ọchịchịrị,
oriọna nke dị nʼakụkụ ya na-anyụkwa.
7 Ike agakwaghị adị na nzọ ukwu ya;
atụmatụ ya onwe ya ga-atụda ya nʼala.
8 Ụkwụ ya na-eduba ya nʼọnya;
ọ na-akpagharị na-adaba nʼime oghere.
9 Ọnya na-ejide ikiri ụkwụ ya,
ọnya ahụ na-ejidesi ya ike.
10 E zobere ya ụdọ ọnya igbudu nʼala,
ihe e ji ejide ya na-echere ya nʼụzọ ya.
11 Ihe egwu na-emenye ya ụjọ nʼakụkụ niile,
na-agbasokwa nzọ ụkwụ ya niile.
12 Ịla nʼiyi na-achọsi ya ike;
mbibi nọkwa na njikere na-eche mgbe ọ ga-ada.
13 Mbibi na-eripịa akụkụ anụ ahụ ya;
ọkpara ọnwụ na-eripịa ahụ ya niile.
14 Esi na nchekwa nke ụlọ ikwu ya dọpụta ya
duru ya jekwuru eze nke ihe egwu niile.
15 Ọkụ na-ebi nʼime ụlọ ikwu ya;
a ga-efesasị nkume na-enwu ọkụ nʼebe obibi ya.
16 Mgbọrọgwụ ya na-akpọ nkụ nʼime ala,
alaka ya ga-akpọnwụ nʼelu.
17 A gaghị echeta echiche ya nʼụwa ọzọ,
o nweghị onye ọbụla na-echetakwa aha ya.
18 A na-esite nʼìhè chụba ya nʼọchịchịrị,
otu a kwa, a na-achụpụkwa ya site nʼụwa.
19 O nweghị ụmụ, o nwekwaghị ụmụ ụmụ nʼetiti ndị ya,
ọ dịghị onye fọdụrụ nʼebe o bi na mbụ.
20 Ọnọdụ ya na-eju ndị si nʼọdịda anyanwụ anya;
oke egwu na-ejidekwa ndị si nʼọwụwa anyanwụ nʼihi ya.
21 Nʼezie, otu a ka ebe obibi nke onye ajọ omume dị,
ee, bụ onye ahụ nke na-amaghị Chineke.”