85
Hay Luwaluh Pumhodan nan Tatagu
Hete ya psalm an intudo' nan linala'in holag Korah, ya hay intud'anda ya nan ap'apun di muntudtuduh kanta.
1 Impattigmuy homo'muh tun lutam, Apo Dios,
ya binadangam goh nan holag Jacob ta pinumhod di aatda mahkay.
2 Ya inaliwam an amin di nappuhin inat nan tatagum,
at hinaniam an amin di baholda.
3 Ya inaliwam din nidugah an bungotmu,
ya pinogpogmu din boholmu goh ay dida.
4 At haggungon ni' da'mi, Apo Dios an baliwmi,
ya idinongmu ni' an bumobohhol ay da'mi.
5 Unmu mah inaynayun di bungotmun da'mih enggana?
Unmu mah ahan adi pogpogon ya adi idinong nan bungotmun da'mih enggana?
6 Un da'miat ni' idatan hi bi'ahmi ta ipa'amlongmu nan tatagum
at nonongnan ulgudonmiy amaphodmu?
7 At ipattigmu nan nidugah an pamhodmun da'mi, Apo Dios,
ya baliwan goh da'mi!
8 Ya inhamhamad'un dengngol din inalin nan Ap'apu an Dios
ti intulagna an mi'id ah al'alih nan tatagunah unda inaynayun di pangunudandan Hiya.
At hiyanan adi tu'u mahkay aton di nappuhi.
9 At immannung an dedennonan mamaliw hinan tatagun mange'gon ay Hiya,
at hay maphod di ma'ulgu'ulgud hitun babluy tu'u.
10 Ya mun'unnudan ay nan pamhod hinan nahamad an pangat
at hay ma'at ya mihamad di ugali, ya waday lenggop.
11 At nan makulug an pangat ya hitun lutay attigana,
ya nan nahamad an pamanuh ya malpud abuniyan.
12 Immannung an hi Apo Dios ya ipaphodna tun nitaguanmi,
at pumhod di bungan nan itamumih tun babluymi.
13 Ya nan nahamad an ugalinay ipattigna,
at nahamad di itudunah unudon tu'u.