43
Hay Luwalun nan Napilit an Niyuy hinan Udum an Babluy* Hinan Biblian di Hudyu ya nalammung nan Psalm 42 ya Psalm 43 ta ma'ohhay psalm.
1 O Apo Dios, ipa'innilam ni' hinan tatagun adi kumulug ay He"a an mi'id di bahol'u,
ya baliwana' hinan ahilalayah an tatagun nappuhiy pangatda!
2 Ti He"ay Dios an baliw'u, mu anaad ta din'uga'?
Ya anaad ta gunna' paligligaton hinan buhul'u ta omod unna' lumungdalungdaya?
3 Ipa'alim di patal ya nan makulug an pumpapto'mun ha"in
ta ipadutu'a' an mumbangngad hinan wadam hinah nan Duntug an Zion an wadan nan Timplun punhituwam.
4 Ya ta umalia' hinan pun'onngan ay He"a, Apo Dios, an Dios'un mangidat hi nidugah an amlong'u,
ya pagangho' nan alpah pangipagbagtua' ay He"a, Apo Dios an Dios'u.
5 Ya anaad nin ta munlungdayaa'?
Ya anaad goh nin ta numanomnoma'?
Mu He"a, Apo Dios, damdamay pundenola' ya ipabagbagtu'
ti He"ay bumadang ay ha"in,
ya He"ay baliw'u ya Dios'u.† Psa. 42:5-6a, 11.