26
1 Adi maphod hi un dumalalluh nan tiyalgaw unu umudan hinan gutud di ahi boto',
ya umat goh hinan nakudang di nomnomna an adi goh maphod hi un way mange'gon ay hiya.
2 Mid hulbinah un way mangidut hinan tagun mi'id di baholna ti adaogna an adi mepto' an mipa'annung ay hiya
an umat hinan ato'aton nan hamutin un muntaytadyapan an adi mun'ohop.* Hay ohah mangitigan eten proverb ya nan Alin hi David ti hi Shimei ya inidutanah David. Mu agguy timma'ot hi David hinan idutna ti inilana an mid ah inatnah nappuhi, at adi mipa'annung ay hiya (II Sam. 16:5-14).
3 Nan latigo ya panuplit hinan kabayu ya nan gumo' di mipiyamel hinan dongki ta way atondan mangunud hi pohdon,
ya waday ipaddunganda ti hay manugun hinan tagun nakudang di nomnomna ya nan haplat.
4 Wa ay ta ipadahmuy abalinam an mambal hinan malgom an hapiton nan tagun nakudang di nomnomna
at hiyay panginnilaan an numpaddung ayun duwa.
5 Ya gulat ta mi'id hulbin di ibagana ya enyengngohmuh nan inatna at hay pambalmu ya mi'id goh di hulbina,
at immannung an bainom hiya ta ma'awatanay aatna an manangpah.
6 Gulat ta nan tagun nakudang di nomnomnay pumpaadan ya mi'id hulbina
an umat hinan tagun nonong ya pinutulanay hu'ina, unu nonong ya imminum hi bininu.
7 Mid goh di hulbin di tugun nan tagun nakudang di nomnomna
ti umat hinan napilay an hu'in adi ma'usal.
8 Mid hulbina goh hi un way mange'gon hinan tagun nakudang di nomnomna
ti umat hinan aton an mangipaut hi batun mipapan hinan kallat di paldi'it.
9 Umipata'ot hi un way nakudang di nomnomnan mangipadah an manugun hinan tatagu
an umat hinan nabutong an ino'odnanay pagal an nahbitan.
10 Umipapuhiy ma'at hi un way tagun mumpatamuh nan malgom an maluh,
ya namamah un hiya ya manangpah ti hay nipaddungana ya nan tagun un malgom di panaona.
11 Nan nakudang di nomnomna ya gunna ipidwapidwan mangat hi nappuhi
an nipaddung hinan ahun immuta, ya binangngadnan onon.† II Pet. 2:22.
12 Nan tagun mangalih un hiya ya nala'eng an ta"on un manangpah
ya on'onaynay tagun nakudang di nomnomna ya un hiya.
13 Nan tagun napayad ya do'ol di pangalina ti alyonay,
“Ini ya waday layon an mihahawan hinan dalan, at adia' makmakkak!”‡ Prov. 22:13.
14 At nan humigan muntamu ya ammunah un gun bumanalliballin hinan nolo'ana
ti umat hinan tangob an un gun mibughul ya nipabangngad an mitangob.
15 Waday udum hi tatagun nunheglay anapayadda
ti ta"on un ah umiduhandaan higananda!
16 Mu ta"on un umat hinay aat nan napayad ya hay punnomnomana ya hiya ya nala'la'eng
ya un nan pitun linala'in ma"aphod di panugunda.
17 Nan tagun mid biyangna mu alyona damdamah nomnomna an mi'bibiyang hinan way munhohongngel
ya nipaddung hinan mampap hinan ahun maluh an hay inganay pangedonana.
18-19 Nan tagun munlukuh nan ibbana ya awniat alyonay, “Hene ya un'u pananhanul ay he"a!”
ya nipaddung hinan nabongang an tagun mangipapdu' hi paltug unu nan panan pumatoy.
20 Nan apuy ya madop hi un adi matunguwan,
at umat hina goh di ma'at hi un duminong nan munhohongngel an humudohudol
21 ti nan uleng di mangipabala ya nan tunguy mangipabi'ah hinan apuy.
At umat hinay nipaddungan nan bumahbah an humudohudol an tagu ti hiyay dumalat hi punhahannuan di tatagu.
22 Nan nappuhin pamahiwda ya umat hinan mumpolhat an ma'an an nalakah ma'u'mun
ti immannung an hiyay pa'appohpohdon nan tatagun pa'addonglon.
23 Nan tagun un pohod di hapitona mu agguy immannung nan wah nomnomna
ya nipaddung hinan nagalatto' an tibung hi penentolanda an hay tigawna ya al'alidammuh.
24 Nan udumnan tagu ya nidugah di pahiwda,
mu unda e'edpol ti ma"aphod di bumuhu' hi timidda.
25 Ya ta"on un ma"aphod di panapitda ya adim kulugon
ti numbino'ob'on an nappuhiy wah nomnomda.
26 Ya ta"on hi unda adi ipattig nan pumbaholada mu ma'innila damdama
ti dumalat nan gunda aton an nappuhi.
27 Nan tagun munnomnom hinan atonan nappuhih nan ibbana ya hiyay a'atana,
ya nomnomona ay an mangubah hinan udumnan tagu ya hiyay ma'ubah.
28 Nan munlangkak ya immannung an boholonay ibbanan tagun pa"iona,
ya makulug goh an nan mangipabagtuh odol di ibbana ta olom ya mabalbaliyan,
ya mapa"iy pangehdolan nan ibbanan hiya.