23
Nan Miyanom an Tugun
1 Wada ay di mangayag ay he"ah nan nabagtuy haadnan tagu ta me"an'an hiya
ya nomnomom ta ipaphodmuy atom an mangan.
2 At ta"on hi un'a na'ahhinaangan ya mahapul an ane'nongom di onom.
3 Ya adim ilomo' an pun'iya'an hinan mumpolhat an indadaana ti mid mapto' ya un hay pampongnan he"a.
Nan Miyapitun Tugun
4 Adim idugah an paligaton di odolmun muntamu an gapuh nan pamhodmun umadangyan.
At nomnomom an henen atom ya bo'on hiyay aptan.
5 Ti nan inadangyan ya un himbumagga ya na'ubah an paddungnay napaya'an,
at mumpangatayapda an ayda agila.
Nan Miyawalun Tugun
6 Adi'a umuy me"an hinan tagun nunheglay ukuhna,
ya adim amnawan nan mun'aphod an ma'an hi abungna an indadaana.
7 Ya ta"on hi unna alyon ay he"ay, “Ma'a ta uminum'a ya nangan'a!”
mu henen inalina ya bo'on hay nalpuh nomnomnan un pohod ti hay nonomnomona ya nan ananginan nan ma'an an indadaana.
8 At munha'it di punnomnommuh unmu innilaon an nabalbaliyan'a,
at mid mapto' ya pohdom an utaon nan inanmu, ya mi'id hulbin goh nan nangalyam ay hiyah, “Salamat ta pinangana'!”
Nan Miyahiyam an Tugun
9 Adiyu tugunon nan tagun nakudang di nomnomna
ti pihulona damdama nan maphod an itugunyu.
Nan Miyapulun Tugun
10 Adiyu anon nan batun imbatno' din a'apuyuh din penghanan igad
ta ipahligyu nan lutayu unu polhonyu nan lutan nan nguhu
11 ti hi Apo Dios an mamaliw ay dida ya nidugah di abalinana,
at Hiyay mangiballoh hinan atonyu, at moltaon da'yu.
Nan Miyapulu ta han Ohan Tugun
12 Ihamadyun unudon nan maphod an mitudtudun da'yu,
ya pa'addonglonyuy hapiton nan nanomnoman.
Nan Miyapulu ta han Duwan Tugun
13 Adiyu higanan an mangilat hinan ung'ungngan imbaluyyu
ti gulat ta huplitonyu at adina iyatoy.
14 Ti henen atonyu ya ta way atonan man'ug hinan nappuhin ma'at an lummuh atayan.
Nan Miyapulu ta han Tulun Tugun
15 He"an imbaluy'u ya gulat ta manomnoman'a ta nahamad di pangatmu
at nidugah di pun'am'amlonga'.
16 Ya iyal'allanay amlong'uh un hay immannung di hapihapitom hi anomnoman.
Nan Miyapulu ta han Opat an Tugun
17 Adi'a umamoh an me'yat hinan nun'appuhin ato'aton nan tatagu
ti od'odolnah unmu ihamhamad an gun mange'gon ay Apo Dios.
18 Ti umat ay hinay atom at maphod di ma'at ay he"ah udum di algaw,
at nan namnamaom hi ma'at ya adi mabahbah.
Nan Miyapulu ta han Leman Tugun
19 He"an imbaluy'un lala'i ya ihamadmun donglon tun tugun'u ta manomnoman'a,
ya adim layahan di aatmu ta nan maphod an pangatmuy inaynayunmu.
20 Ya adi'a mitnud hinan tatagun mabubutong ya nun'a'uklung hi ma'an
21 ti awni ya mawotwotda,
ya gapu ta malmalo'dah a'alga'algaw at hay pumbalinandah umangunuh ya hay ilubungda ya nan nun'apa"in lubung. * Waday udumnan verses eten Liblu an Proverbs an mangituduh aat nan bumatong: Prov. 23:29-35; 26:9; 31:4-7.
Nan Miyapulu ta han Onom an Tugun
22 Donglom nan itugun amam ti hiyay dumalat ya un'a wada,
ya ta"on hi un na'in'innah inam ya adim pihulon.
23 Maphod hi un'a manomnoman ta innilaom di nahamad ya mumpatudu'a,
ya ta"on hi unmu anuhan ta engganay mawadan amin daten he"a ya halimunam ahan ta adida mami'id.
24 Umipa'amlong ay amana nan nanomnoman an lala'i
ti nan nahamad an pangatnay mangipadenol ay hiya.
25 At olom man ya ipa'amlongmu nan o'ommodmu,
ya namama ay inam ti hiyay nangitungaw ay he"a.
Nan Miyapulu ta han Pitun Tugun
26 He"an imbaluy'un lala'i ya abulutom ahan ta ha"in di mangituduh atom,
ya gunmu nomnomon nan pangat'u ta hiyay eng'enghom.
27 Nan puta ya umat hi maluhung an bitu,
ya nan umilugtap an babai ya umat hi bubun.
28 At du'gom dida ti ay ihunay unda mumbota' an humod'ap hinan way balbaliyanda,
at hiyaat unda dumo'ol di linala'ih mumpangilugtap hi a'ahawada.
Nan Miyapulu ta han Walun Tugun
29 Hay inilayuh ngadan di maligligatan?
Ya ngadan danen tatagun mi'id amlongdah nitaguanda,
ya mi'hongngelda goh,
ya ma'allilida,
ya mun'alunggidan di odolda ti mi'papattoyda,
ya bumubutag di matada?
30 Hay ngadanda ya nan mabubutong ti uminu'inumdah numbino'ob'on an bumutong!
31 At elanyu ta adi ayu mabalbaliyan hinan ma'inum
an ta"on hi un mumbolah,
ya ma'a'amnawan di tigawnah nan bahu,
ya munlameeh an ma"aphod di tamtamna an umiknu'iknul di bagangmu.
32 Ya manu ay alyo' hene ti awni ta mabiggat at nidugah an nappuhiy punle'nam
an ay da'a inalat hinan ulog an waday habidungna.
33 Ti wa ay ta mabutong'a ya nat'on di pannigmuh un way amangom,
ya maluman goh di nomnommu,
ya hinnat'on di hapitom.
34 Ya hay punle'nam ya umat hinan umuta'utan nunlugan hinan pupul an wah nan baybay an punhinnigion di puo'.
35 Ya alyom di, “Goh ya unna' nin nunhudpa', mu mi'id di munha'it!
Ya nunhaplata' nin, mu agguy'u enelan!
Goh ta mi'id olog'un bumangon ta way ato' goh an umuy uminum?”
*23:21 Waday udumnan verses eten Liblu an Proverbs an mangituduh aat nan bumatong: Prov. 23:29-35; 26:9; 31:4-7.