21
1 Hi Apo Dios di mangiyewel hinan punnomnoman nan ali
an ay wangwang an eyewelnay owonah nan pohdonan pangipa'wan.
2 Mabalin an waday tagun hay nomnomona ya makulug an amin di ato'atona,
mu hi Apo Dios ya hamadonay dumalat hi pangatan di taguh nan atona.
3 Nan pangatan hi nahamad ya nan amaphod di ugaliy hiyay umipa'amlong ay Apo Dios
ya un nan e'nong an midat ay Hiya.
4 Nan mumbagtu ya nan mangiyamlong hi odolna
ya hiyah ne pangimmatunan hi unda numbahol.
5 Nan tagun hamadonah mahhun nan pohdonah ma'at ya unna aton ya umannung an waday gungunahna,
mu nan tagun un nonong ya inatnay ninomnomna ta mibahhaw di ma'at at hay umangunuh ya hiyay mi'id di gungunahna.
6 Nan inadangyan an un hay layah di dalatna ya ag'agan ma'ubah
an umat hinan ahu' an ag'agan ma'ubah, ya hiya goh di lummuh atayan.
7 Nan tagun niyay'ayan unda mi'hongngel ya mi'pattoy ya hay umangunuh at henen atonday lummuh a'ubahanda
ti adida ahan pohdon an aton di maphod.
8 Hay pangat nan tagun nabaholan ya nahihinnuy gunna aton,
mu nan mi'id ah baholna ya ma'andong di gunna aton.
9 On'onaynah unta umuy miyohhan munhituh nan abadyaw
ya unta mi'hituh nan ahawan tumutututut.* Prov. 25:24.
10 Nan nabaholan an tagu ya nun'appuhiy wah nomnomna
ti ta"on nan heneggona ya adina hom'on dida.
11 Nan nakudang di nomnomna ya matugun hi unna tigon nan pumihupihul an tagun mamolta,
mu nan nanomnoman an tagu ya matugun hi un way manugun ay hiya.
12 Hi Apo Dios an na'ahhamad ya titiggona nan nun'appuhin ma'ma'at hinan numpunhituwan nan tatagun nappuhiy pangatda,
ya Hiya goh di mangubah ay dida.
13 Nan tagun adi mammo' hinan nawotwot an mumpabadang ay hiya
ya umat goh hinay ma'at ay hiyah awnih un mumpabadang ti mi'id goh di mammo' ay hiya.
14 Nan adaw an midat an adi mipattig hi do'ol an tatagu
ya uyahonay bungot di tagun nidatana.
15 Wa ay ta mihamad di aton nan mumpapto' an mumpanuh hinan tatagu at mun'am'amlong nan nahamad di ugalida,
mu hiyah ne umipata'ot hinan tatagun nappuhiy pangatda.
16 Nan tagun adi mangunud hinan nahamad an mitugun ay hiya
ya hiyay lummuh atayana.
17 Nan tagun un hay odolnay pa'amlongona ya hay umangunuh at mawotwot,
ya nan mamamhod goh hinan nun'anginan bumutong ya nan mumpolhat an nanginan ma'an ya immannung an adi umadangyan.
18 Nan tagun mamaligat hinan mangulug ay Apo Dios ya hay umangunuhna
at mumbalin ta hiyay a'atana an mipaligat goh.
19 On'onaynah unta umuy miyohhan munhituh nan nibataan an lutan mi'id ah nunhitu
ya un henen mi'hitutah nan ahawan tumutututut ya mabmabbungot.
20 Nan tagun nanomnoman ya minaynayun an wagwaday numbino'ob'on an na'angnginan gina'una,
mu nan nakudang di nomnomna ya ingalawngawnay gina'una, at ag'agan mapuh.
21 Nan tagun maphod di pangatna ya ma'ahhimo' ya dumu'du"oy di pi'taguana,
ya pumhod di nitaguana, ya e'gonan goh di tatagu hiya.
22 Nan nala'eng an ali ya abalinanan mumpapto' hi titindaluna ta hogponda nan babluy nan mun'abi'ah an tatagu,
ya nuntu"inda ta mun'apa"i nan nihamad an allup an e'ehdoldah abaliwanda.
23 Nan tagun mangane'nong hi hapitona ta adi nonongan himmapit
ya immannung an melwang hi gulu.
24 Nan tagun ma"appihul, ya mumbagtu, ya mumpahpahiya
ya ma'innilah nan panaphapitna.
25 Nan tagun humigan muntamu ya mi'id tanudna,
at ma'ulat ti unna yoyo'non di ngamayna,
26 ya uma'amnaw ta ma'udman di gina'una.
Mu nan tagun nahamad di ugalina ya ma'an'aniddat an adi ma'ma'ukuh.
27 Umipabohol ay Apo Dios nan e'nong di tatagun mangamangat hi nappuhi,
ya namamah un nan iyuydan epe'nong ya nappuhiy dumalat hi pangatanda!
28 Nan munlayah an ihtigu ya immannung an mamoltah pidwa,
ya nan mangabulut hinan pangihtiguna ya mapa"i goh.
29 Nan tagun nappuhiy pangatna ya ipattigna kud di maphod,
mu nan tagun maphod di pangatna ya ihamadnan nomnomon hi mahhun ya unna aton.
30 Ta"on hi un alyon di taguy nanomnomanda ya nala'engda ta olom ya abakondah Apo Dios
mu mid hulbina ti hi Apo Dios damdamay mangabak.
31 Nan tatagu ya idadaanday do'ol an kabayuh puntakayandan umuy mi'gubat,
mu gahin damdamay un iyabulut Apo Dios ya unda mangabak.