23
Hay Hopap di Inulgud Balaam
1 Ya inalin Balaam ay Balak di, “Iyammam di pituh pun'onngan hitu, ya inyalim di pitun manilhig hi baka ya pitu goh an buta'al an kalnilu.” 2 At impiyamman Balak henen inalin Balaam hi atona. Ya enepong da Balak ay Balaam an ene'nong di hinohhah baka ya kalnilu eden pun'onngan.
3 Ya inalin Balaam ay Balak di, “Tumata'dog'ah tun awadan di e'nongmu ta umuya' ta olom man ya umalih Apo Dios an mi'hapit ay ha"in. Ya hay alyonan ha"in di hiyay alyo' goh ay he"a.” At immuy hinan ata'nang an duntug an mapulun.
4 At hidiy nanamuwan Apo Dios ay Balaam, at inalin Balaam di, “Indadaan'uy pitun pun'onngan, at ene'nong'uy hinohhah baka ya kalnilu.”
5 Ya intudun Apo Dios ay Balaam di hapitonan alyonay, “Mumbangngad'a ay Balak, ya hiyah te ibagam.”
6 At numbangngad hi Balaam, ya wagwah dih Balak an nunnanong an timmata'dog hinan awadan di ene'nongna. Ya ni'ta'dog goh ay hiya nan a'ap'apun di iMoab. 7 Ya himmapit hi Balaam an inalinay,
“Hi Balak an alin di iMoab di nangipa'ayag ay ha"in ad Aram
hinan aduntuduntug hi appit di buhu'an di algaw an alyonay,
Umali'a ta ipa'idut'un he"a nan holag Israel,
ya numpihulmu dida.
8 Mu hay ato' an mangidut ay didah un agguy inidutan Apo Dios,
unu hay ato' an mamihul ay didah unda agguy napihul?
9 Ya hidih nan way tulid di duntug ya inuhdunga' dida,
ya tinnig'u dida,
ya hay pannig'un dida ya nilahhindan tatagun adida pohdon an middum hinan abablubabluy an hakup di Hentil.
10 Ya undan udot waday way olognan manguyap hinan holag Jacob?
Ti ta"on di godwan nan uyapda ya mi'id ologdan mangyap!
Ya hay pohdo' hi unna' matoy ya umata' ay danen tatagun mi'id baholda,
ya hay angunuh di itagua' hi ataya' ya maphod hi unna' umat ay dida!”
11 Ya inalin Balak ay Balaam di, “Anaad ta umat hinay inatmun ha"in? Hay nangipa'ayaga' ay he"ah tu ya ta idutam nan binuhul'u! Mu nat'on di inatmu ti unmuat goh winagahan dida!”
12 Ya tembalnan inalinay, “Ma'ahhapul ahan an emayaa' di hapito' ta ammuna nan inalin Apo Dios di hiyay alyo'.”
Hay Pidwan di Inulgud Balaam
13 Ya inalin Balak ay Balaam di, “Mitnud'a ni' ay ha"in ta umuytah nan ohan lugal ta hidiy pangamangam hinan holag Israel, mu adim tigon didan amin ti un anggay nan wah nan pingitna. Ya ta olom man ya hidiy pangidutam ay dida.” 14 At initnudnah Balaam ta immuydah nan payaw hi ad Zophim hidih nan way nundodottal hinan tulid di Duntug an Pisgah. Ya inyamman goh Balak di pitun pun'onngan, ya enepongna goh an ene'nong nan manilhig an baka ya buta'al an kalnilu.
15 Ya inalin goh Balaam ay Balak di, “Tuma'dog'ah tun awadan di ene'nongmu ta umuya' hidi an mi'hapit ay Apo Dios.”
16 Ya dinamun Apo Dios ay Balaam, ya inalinay, “Itudu' di hapitom, at mumbangngad'an Balak.”
17 Ya numbangngad hi Balaam, ya tinnignah Balak an wagwah din timmata'doganah nan awadan din ene'nongna. Ya ni'tata'dog goh ay hiya nan a'ap'apun di iMoab. Ya inalin Balak ay hiyay, “Hay inalin Apo Dios ay he"a?”
18 Ya himmapit hi Balaam an inalinay,
“Ihamadmu, Balak an imbaluy Zippor,
ta donglom heten alyo'.
19 Hi Apo Dios ya adi umat hi tagu ti Hiya ya adi munlayah,
ya bo'on goh imbaluy di tagu,
at adina hukatan di ninomnomna.
Undan way intulagna ya agguyna impa'annung?
Ya undan way inalina ya agguyna inat?
20 Ya hay intugunan ha"in ya unna' munwagah,
at winagahana ay ya adi' abalinan an lumonon!
21 Ya mi'id di tinnignah nappuhih aat Jacob,
ya mi'id goh tinnignah numbaholan di holag Israel.
Ya hi Apo Dios an dayawonda ya wagwadan dida,
ya ibugawda an Hiyay alida.
22 Ya Hiyay nangekak ay didad Egypt,
at nunheglay bi'ahdan mipaddung hinan atap an baka.
23 Ya mi'id di olog nan pumalliw an mamalliw ay Jacob unu mane'om ay hiya,
ya mi'id goh olog nan halupe ya duhong an ba'in mama"ih nan holag Israel.
At hay alyondah aat Jacob ya nan holag Israel ya inaliday,
Tigonyuy inat Apo Dios an mid al'alin dida!* Nan translationah English hinan King James Version ya, “What hath God wrought!” Ya hiyah te nalpuwan nan hopap ya nundengwan hapit an intelegraph Samuel F. B. Morse (1791-1872) hi morse code hi awadanah nan kuwaltun di Supreme Court hinan Congress ad Washington D.C. hi ad America hidin May 24, 1844 A.D., ya hay negpongan nan wirena ya ad Baltimore, Maryland hi ad America.
24 Emayaanyu ti mabi'ah daten tatagu an umatdah nan layon,
ya atata'otdan umatdah nan layon an adi duminong ta engganah unna aminon an ihda nan dempapna,
ya ininumnan amin di dalan nan pinatoyna!”
25 Ya inalin Balak ay Balaam di, “Adim ay dida idutan ya adim goh wagahan dida!”
26 Mu tembal Balaam an inalinay, “Un'u dan agguy inalin he"a an hay ibagan Apo Dios di hiyay ato' ya anggay?”
Hay Miyatlun Inulgud Balaam
27 Ya inalin Balak ay Balaam di, “Umali'a ta itnud'u he"a ta umuytah nan ohan lugal ta olom ya hidiy pangiyabulutan Apo Dios hi pangidutam ay dida!” 28 At initnud Balak hi Balaam ta inyuynah nan tulid di Duntug an Peor an hay ma'amang ya nan mapulun.
29 Ya inalin Balaam ay Balak di, “Ipiyammam goh hituy pituh pun'onngan, ya inyalim di pituh manilhig an baka ya pitu goh hi buta'al an kalnilu.” 30 Ya impiyamman Balak an amin nan inalin Balaam, at enepongnan ene'nong di hinohhan baka ya kalniluh nan pitun pun'onngan.
*23:23 Nan translationah English hinan King James Version ya, “What hath God wrought!” Ya hiyah te nalpuwan nan hopap ya nundengwan hapit an intelegraph Samuel F. B. Morse (1791-1872) hi morse code hi awadanah nan kuwaltun di Supreme Court hinan Congress ad Washington D.C. hi ad America hidin May 24, 1844 A.D., ya hay negpongan nan wirena ya ad Baltimore, Maryland hi ad America.