17
1 Ya intuluy Job an himmapit an inalinay,
“Ha"in ya ma'allungdayaa' ti un nahnot di nitagua',
ya nan lubu' ya nidadaan an mamannod ay ha"in.
2 Ya ten lini'uba' hitun mamohol ay ha"in,
ya titiggo' didan pahapahalona'.
3 O Apo Dios, ibaliwa' ni' ahan ay He"a ta ibaagmun mi'id di bahol'u
ti mi'id di udum hi mangibaliw ay ha"in!
4 Nan nomnomda ya hinaniam,
at hiyanan adida ma'awatan,
at nan atondan ha"in ya adim ni' ahan iyabulut an ma'at.
5 Gulat ta han tagun malagbuan ta pabaholonay ligwana
ya nan moltan den tagu ya miyewel hinan imbabaluyna.
6 Mu hi Apo Dios ya inyabulutnay pangul'ulgudan nan tataguh apahiwa',
at nuntukpaanda tun angah'u.
7 Ya dumalat tun nidugah an punlungdayaa' ya adi tummig tun mata',
ya tun odol'u ya un tungal ya anggay.
8 At nan mangalih un mi'id di inatdah nappuhi ya manoh'ada,
ya nan mangalih mi'id baholda ya alyonday un mi'id di Dios'u.
9 Ya nan mangalih un nahamad di aatda
ya iyal'alladan mangiyamlah nan anahamadda.
10 Mu gulat ta umalidan amin hinan way hinagang'u
at mi'id di ohan didah alyo' hi nala'eng.
11 Nagtud tun algaw'u,
ya agguy nipa'annung din ninomnom'uh ato' hitun atagu',
at mi'id di namnama'.
12 Ya daten liligwa' ya ta"on hi un helong ya inalidah un mapatal,
ya ta"on hi un hehellong ya inaliday na'uy an pumatal!
Mu ha"in ya inila' an immannung an wagwadaa' hinan helong.
13 Hay hodhodo' hi namnamao' ya nan lubu' an paddungnay babluy nan nun'atoy
ta hidiy ihina' an molo' hinan munhehellong.
14 Gulat ta alyo' di nan lubu' di hi ama'
ya gulat goh ta alyo' di nan begeh di hi ina' unu a'agi'
15 at undan mah nin way nahamad hi hehemlo'?
Gulat ta wada at hay mangibaag nin?
16 Ya undan mitnud ay ha"in henen hehemlo' hidin gutud di ataya'?
Adi, ti ma'ubah hi unna' matoy!”