12
Hay Nambal Job ay Zophar
1 Ya tembal goh Job an inalinah nan ligwanay,
2 “Anakkayah an immannung an nala'eng'a an nen impa'innilam udot an amin!
Nunhegla hi un'a matoy ti mi'id di udum an taguh nala'eng!
3 Mu ha"in ya wada goh di nomnom'un umata' ay he"a!
Undan alyom un nakudang di inila' ya un he"a?
Undan way agguy nanginnilan dane?
Ha"in man goh ya inila' hanan inalim!
4 Ad ugwan ya gunna' aba'abatlan hinan liligwa'
an ta"on hi un mi'id numbahola'.
Mu din hopapna ya wa ay ta mi'hapita' ay Apo Dios
ya mabalin an abulutona nan iluwalu' ay Hiya.
5 Ya hay nomnom nan tagun mi'id di ligatna ya undaat goh bainon nan tagun ta"on un agogohgoh,
ya minamada ta enggay matu"inda.
6 Mu mi'id di al'alih nan pi'taguan nan mumpangakaw ya nan adi mangita'ot ay Apo Dios
an hay bulul di pange'ehdolandah dayawonda.
7 Ya gulat ta pohdom an innilaon
at umuy'ah nan hamuti ya hinan a'animal at ituduwan da'a,
8 unu hinan habhabung an nitanom hitun luta,
unu hinan ekan hi baybay ta ituduwan da'ah nan anala'engda.
9 Ti undan way ohan didah agguy nanginnila
an hi Apo Dios di nangat ay danen amin?
10 Ya hi Apo Dios goh di manalimun an amin hinan limmuna,
ya Hiya goh di nangdon hi ataguan an amin nan tatagu.
11 Ya Hiya goh di nangiyammah timid ta panamtam hi ma'an,
ya umat hi ingan mangngol hi hapit.
12 Din tataguh penghana ya numanomnomda,
ya nan tatagun ma'alla'ay ya na'alla'engda.
Mu hi Apo Dios ya nidugdugah di anala'engna ya abalinana.
13 Ya nan nun'ala'ay ya madadawoh di atondan manginnila,
mu hi Apo Dios ya inyal'allanan madadawoh,
at ahan di atonan manginnila,
ya abalinanan mangat hinan pohdonan aton.
14 Ya gulat ta way pa"ion Apo Dios ya adi mabalin an mipabangngad ta miyamma,
ya gulat ta ibaludna nan tagu ya mi'id ahan di way abalinanan mangipabuhu'.
15 Ya gulat ta adi ipa'udan Apo Dios at mabtel tun luta,
ya gulat goh ta ipa'alin Apo Dios di udan at mundatong hitun luta,
ya nalbong.
16 Hi Apo Dios ya ma'abbi'ah ya mangam'ameh,
ya Hiyay okod hinan bumalbali ya hinan mabalbaliyan an tatagu.
17 Ya pumbalinona nan nun'ala'eng ya nun'anomnoman an a'ap'apuh mi'id di inilada,
18 ya impa'aanay haad nan a'alih nan pumpapto'anda,
ya numbalinona didah baal an ayda himbut.
19 Ya nun'aanay haad nan papadi
ya nan nun'abagtuy haadnan mumpapto',
20 ya pogpogona nan nun'ala'eng an muntugun an pangedenolan nan tatagu,
ya guluwonay nomnom nan nun'ala'eng.
21 Bainona nan nun'abagtun haadda,
ya pinogpognay abalinan nan mumpapto'.
22 Ya pumbalinona nan helong an wadan di natoy ta pumatal
an ta"on un nidugah an pa'ahhelong.
23 Ya pabi'ahona nan tataguh nan ohan babluy,
mu awni damdama ya impa'abakna dida.
Ya impado'olna goh nan tatagu,
mu awniat iwa'atna dida.
24 Ya pumbalinona nan mangipangpanguluh ay mi'id di nomnomda,
ya ingnganuyna dida,
at mi'id di iniladah atondan umat hinan tagun na'utaw hinan mapulun.
25 An ay paddungnay unda wah nan helong an ahi'ap'apu'ap,
ya ayda nun'abutong an munhinaggaw.”