6
Hay Nahhun hi Inalin Job ay Eliphaz
1 Ya tembal Job an inalinay,
2 “Gulat ta makilu tun ligat'u ya tun holholtapo'
3 ya madamdamotda ya un nan panag hinan pingit di baybay.
At adi ayu manoh'ah un anaad ta umat hituy panaphapit'u
ti ha"in ya adi' nomnomon di hapito' ya hinapit'u.
4 Nan panan Apo Dios ya paddungnay ne'nan ha"in,
ya nunhawang hi odol'u,
ya niwa'at hi odol'uy habidungna.
Ya paddungna goh unna hinonhonod nan numbino'ob'on an atata'ot an ma'at ay ha"in.
5 Un mah mi'id di biyang'un munlili?
Ta"on nan dongki ya baka ya mungngoo'dah un mi'id di holo' hi ononda!
6 Ya undan way mamhod an mangihdah nan mihdan mi'id di ahina?
Wada mah di polhat nan mumpaha' hinan itlog?
7 Ha"in ya adi' pohdon an onon di umat hinan ma'an ti lummuh dogoh'u!
8 Anaad nin ta adi idat Apo Dios nan odowo' ay Hiya?
Ya anaad nin ta adina abuluton nan inluwalu' ay Hiya?
9 Ti hay pohdo' ya abulutona ta unna' ni' ubahon,
at nonong ya pinatoya'.
10 Un adya inila' an patayona' ay Hiya at nunheglay amlong'u
an ta"on hi un nidugah di ligat'u
ti inila' an agguy'u ahan imbahhaw din inyuldina an na'ahhamad an Dios.
11 Ya mi'id mahkay bi'ah'u, at hay namnamao' mah?
Ya anaad ta ma'ud'udman tun pi'tagua'
an ten mi'id damdamay maphod hi hahalimido'?
12 Undan umat hinan batuy bi'ah'u,
unu umat hinan gambang di odol'u?
13 Ha"in ya ten mi'id di bi'ah'u,
at adi' abalinan an mamadang hi odol'u,
ya ten mi'id goh di mabalin hi ay'u pumpabadangan.
14 At un adya makulug an ligwa' da'yu,
at mabalin an badangana' hitun nidugah an ligat'u
an ta"on unyu alyon hi un'u din'ug nan na'abbagbagtun Dios?
15 Mu da'yun liligwa' ya adia' mundenol ay da'yu
16 ti umat ayuh nan ginnaw an wa ay ta ma'anang nan dalallu ya mundatong,
17 mu wa ay ta nan gutud di ugaw ya natdu' an ma'ammaganan.
18 Ya umat ayu goh hinan himpamulog an mumbaat
an ehegweday pange'wandan dumalat di panganapandah danum hi inumonda,
at mi'id poto' di le'dondah nan mapulun,
at la'tot ya nun'atoyda.
19 Mun'anap hi danum din mumbaat an nalpud Tema ya ad Sheba,
20 mu gapu ta mi'id di inah'upandah nan ginnaw an mamaga
at mi'id ahan di namnamada.
21 Da'yu ya umat ayuh na ti mi'id ibadangyu
ti hidin nanniganyuh tun holholtapo' an ligat'u
ya immogyat ayuh ta'otyu.
22 Undan way nun'adawa' hi nangalya' hi idatana' ay da'yu?
23 Unu undan way inali' hi bayadanyuy binuhul'u ta way ato' an mabaliwan?
24 Ya undan way nibahhaw hi inat'uh nappuhi?
Ibaagyu ta way ato' an duminong!
25 Nan nahamad an panapit an gumilat ya munha'it hi donglon,
mu nan panaphapityu ya layah,
at mi'id di hulbina!
26 Ya anaad ta alyonyuh unyu andongon tun hapito' an munligligat,
ya inaliyuh un umat hi tuyup nan hinapit'un un maluh ya anggay?
27 Ya da'yu ya iyu'nuhyu ta way atonyun mangawit hinan nguhu,
ya ta"on nan ligwayu ya inihbutyu ta mumbalindah baal ta nan hubutday umadangyananyu!
28 Mu ad ugwan ya ihamhamadyu ni' an mannig ay ha"in!
Undan waday nunlayaha' ay da'yu?
29 Nidugah nan gunyu ipa'leh an nappuhin ha"in!
Hay maphod ya ipogpogyu,
ya adia' pabaholon ti ha"in ya mi'id di numbahola'.
30 Undan waday nappuhih hinapit'u?
Mid mapto' ya unyu nin alyon di un'u adi immatunan di aat nan maphod ya nan nappuhi!”