14
Nan Nidugah an Batel ad Judah
1 Hidin ami'id di udan ya inalin goh Apo Dios ay ha"in di,
2 “Nidugah di punlungdayaan nan iJudah ti mun'alangun amin nan wah nan babluy,
ya ta"on nan wad Jerusalem ya umbundah nan luta an ahikikilan mumpabadang.
3 Ya nan adadangyan ya honogonda nan baalda an humagub hinan bubun,
mu mi'id di danum,
at mangiw'iwadyadan mumbangngad.
At nidugah di lungdayada ya bainda an punhophopanday uluda.
4 Ya ta"on nan mumpumpayaw ya nidugah di numanomnomanda,
ya punhophopanda goh di uluda ti mun'anga' nan luta.
5 Ya ta"on goh nan ulha ya taynanday imbaluydah nan inalahan
an dumalat di ami'id di holo' hi ononda.
6 Ya nan dongkih inalahan ya nidugah di ngahingahda an umatdah nan jakal,
ya la'tot ya adi mittig di matada ti mi'id di holo' hi ononda.”
7 At alyon nan tatagun Apo Dios di,
“Apo Dios, nidugah di numbaholanmin He"a,
at mahapul an mamolta ami.
Mu badangan da'mi ni' ay He"a ta way panginnilaan nan tataguh nan anabagtum.
8 Anggay He"ah ehdolmin holag Israel,
ya He"a goh ya anggay di bimmadang ay da'mi.
Mu anaad ta ad ugwan ya un'a ay mangilih tun babluy an numbaat
an un umiyan hi ohay mahdom ya anggay?
9 Un'a dan umat hinan tagun manoh'a eten nidugah an na'at?
Undan mid abalinam an managun da'mi an ta"on un'a wah tun babluy?
Da'mi ya mibilang amih tatagum,
at adi da'mi ni' ahan du'gon!”
10 Mu hay nambal Apo Dios ya inalinay,
“Da'yun tatagu' ya hay pa'appohdonyu ya umadagwi ayun Ha"in ta adia' unudon.
At hiyanan ad ugwan ya adi' da'yu mahkay abuluton hi tatagu',
at moltao' da'yun dumalat nan do'ol an nappuhin ina'inatyu.”
11 Ya inalin Apo Dios ay ha"in di, “Adim mahkay iluwaluan danen tatagu. 12 Ti ta"on hi unda munlangdu an munluwalun Ha"in ya adi' dongdonglon di pumpahpahmo'anda. Ya ta"on goh unda e'nong ay Ha"in nan Onong an Moghob ya nan Onong an Ma'an ya adi' damdama abuluton. Mu un'uat pun'ipapatoy didah nan gubat, ya hinan batel, ya hinan nidugah an dogoh.”
13 Mu inali' di, “Apo Dios an na'abbagbagtu, nan numbino'ob'on an propeta ya gunda alyon hinan tatagu an mi'id anuy ipa'alim hi gubat ya batel! Ti hay pawadaom anu eten babluy ya hay lenggop ya anggay!”
14 Ya inalin Apo Dios ay ha"in di, “Hanan propeta ya layah di gunda impa'innila an ta"on hi unda alyon an Ha"in di nangali. Agguy'u ahan hennag dida, ya mi'id di inal'ali' ay dida! At nan alyondan paddungnay enenapda ya bo'on ahan Ha"in di nalpuwana, at mi'id hulbin nan gunda ipa'innila ti un hay ninomnomda. 15 At hiyanan Ha"in an Dios ya moltao' danen propetan munlayah ti alyonday mi'id di gubat ya batel! Mu ibaga' an mi'yatoydah ipa'annungan nan gubat ya batel! 16 Ya nan tatagun nangipa'innilaandan dane ya mun'iwalitang di odoldah nan kalatad Jerusalem an dumalat nan gubat ya batel ti mi'id di ang'angon nan gubat ya batel hinan pamilyadah mangilubu' ay dida. Ti iballoh'u ay dida nan nun'appuhin ina'inatda.”
17 Ya inalin Apo Dios di ibaga' hinan tatagu nan numanomnoma' ay dida, at inali' di,
“Dumalat nan ma'at ay da'yu an paddungnay himmalom an nogod ya hiyanan gun'u ikilay ha'it di nomnom'u.
At abigabigat ya amahdomahdom ya gunna' lumuwaluwalu
18 ti an amin di limmane'le'da' eten babluy ya awalitang di nun'a'atoy an tatagu an dumalat nan gubat,
ya hidin immaya' hinan nun'a'allup an babluy ya nun'a'atoyda goh damdama nan tatagun dumalat di hinaangda.
Ya nan papadi ya propeta ya hihidyan gunda aton di tamuda,
mu mid papto'ananda.”
Hay Luwalun Jeremiah
19 At ha"in an hi Jeremiah ya nan i'ibba' ya inalimin Apo Dios di,
“Undan ahan din'ug da'mi mahkay an iJudah?
Ya undan abohlam nan iJerusalem?
Nidugah an paddungnay himmalom di nanggodmun da'mi an adi ahan mapoyanan?
Hinahalimidmiy lumenggopan,
mu mi'id,
ya hehennodmiy umadaoganmi,
mu mi'id an un at goh hay tumata'tanmi.
20 Apo Dios, abulutonmin ongol di numbaholanmin He"a
an umat amih din o'ommodmi.
21 Mu nomnomom di ipabagtuam ta adi da'mi ni' ahan inganuy,
ya adim ni' iyabulut an pa"ion nan mi'buhul nan ma"aphod an Timplum.
At nomnomom din inalim ay da'mi ta adim ibahhaw.
22 Ti undan nan bulul di mangipa'alih udan?
Ya adi mabalin an nonongan immudan ti engganay unmu ipa'ali!
Ya He"a, Apo Dios, ya anggay di pangiyokodanmih bumadang ay da'mi
ti He"a ya anggay di mabalin an mangat ay date!”