8
1 Ya inalin goh Apo Dios di, “Henen gutud ya pun'ibughul nan buhul di nilubu'an nan a'ali, ya nan u'upihyal ad Judah, ya nan papadi, ya nan numbino'ob'on an propeta, ya an amin din iJerusalem ta pun'ibuhu'da nan tungalda. 2 At mun'iwa'at di tungalda ta mihapuydah algaw, ya bulan, ya bittuan an gunda dinayaw, ya nunhulbian, ya numpabadabadangan hidin ataguda.* Manu ay ipa'at Apo Dios hene ta mipattig an mid ah hulbin nan dinayaw nan iJudah ti mid ah abalinan nan algaw, ya bulan, ya bittuan an managun dida. Ya minaynayundan miwa'at ta engganah unda mumbalin hi ay allugit ta tumgon tun luta. 3 Ya nan adi mi'yatoy an iJudah ya miyuydah udum an babluy ta hay punle'nadah di ya odolnay unda matoy. Ha"in an Dios an nidugah di abalinanay nanapit eten ma'at hi pidwa ay da'yun nappuhiy pangatnan tatagu.”
Nan Bahol ya nan Molta† A'alga'algaw an Ab 9 (unu July-August) ya ibahan nan Hudyuh himba'anday Jer. 8:13-9:24 ta panginomnomandah ustun algaw hidin napa"ian nan Timplun Apo Dios ad Jerusalem hidin 586 B.C. ya hidin 70 A.D.
4 Inalin Apo Dios ay ha"in di,
“Jeremiah, alyom hinan tatagu di,
Undan nunlu'bub ayu ay ya adi ayu mala"uy?
Ya nibahhaw ayu ay goh hi nange'wanyu ya undan adiyu ibangngad ta nan nepto' an owon di pange'wanyu?
5 Anaad mah ta ta"on hi unyu inila an immadagwi ayun Ha"in an Dios ya adiyu nomnomon an mumbangngad?
Ya anaad ta adiyu idinong an munhulbih nan udum an madayaw ta mumbangngad ayun Ha"in?
6 Inhamad'un dengngol nan inali'aliyu,
mu mi'id ah nangabulut ay da'yuh un numbahol.
Ya mi'id ah ohah nuntutuyuh baholna ta indinongna
ti un at goh way ohaan nan nun'appuhiy iyal'allanan aton‡ Heten hapit an iyal'allanan aton hinan hapit di Hudyu ya numpaddung ahan hinan hapitda an nibahhaw (verse 4), ya ibangngad (verse 4), ya immadagwi (verse 5), ya mumbangngad (mapidwah verse 5) an ta"on un nob'on di pohdondan ibaga. At hiyah ne ohah kalahin di hanul nan Hudyu.
an umat hinan kabayun nitakayan di umuy mi'gubat an taganah tagtag.
7 Od'odolnaat goh nan hamuti an stork, ya balug, ya swift, ya thrush
ti iniladah un nadatngan di pumbaatandah udum an babluy,
ya wa ay ta nadatngan di pumbangngadanda ya mumbangngadda goh an amin.§ Hanan kalahin di hamuti an wah nan udum an tungnin an babluy an umat ad Canada ya USA ya pahiwonday timpun di tungnin, at makakda ta umuydah nan adi tungnin an babluy. Ya wa ay goh madatngan di tungnin hinan immayandan babluy at makakda ta umuydah din babluy an nalpuwanda ti hiyah ne timpun di mun'ohab hidi.
Mu da'yun tatagu' ya adi umat hina ti nan pohdo' hi unudonyu ya adiyu aton.
 
8 Alyonyuy nanomnoman ayu ti wadan da'yu nan Uldin'u,
mu un at goh linuman nan muntudtudun da'yuh layah!
9 Gulat ta nanomnoman ayu at inabulutyu nan Uldin'un Dios,
mu agguyyu, at undan nanomnoman di umat hina?
Mu madatngan di algaw an miyuy ayuh udum an babluy
ta mabainan ayun dumalat di baholyu.
10 At nan ahawayun binabai ya midat hi udum,
ya ta"on un nan lutayu ya midat hinan buhulyu.
Ti an amin ayu an ta"on un nawotwot unu adangyan ya ma"am'am hi bagiona,
at hiyanan munhinkukuluk ayu.
Ya ta"on un nan numbino'ob'on an propeta ya papadi ya umat goh hinay aatda damdama.
11 Ti ipadahdan ipadenol nan tatagu' an ta"on un paddungnay himmalom di hugatdan alyonday,
Mi'id di ita'ot tu'uh pumatoy.
Mu layahda!
12 Ti gulat at ya nidugah di bumainandah nan nappuhi ahan an ato'atonda,
mu mi'id iniladan bumain.
At hitun pummoltaa' hinan tatagud Judah ya ta"on un dida ya middumdan mi'yatoy.”
Hiyah ne hinapit Apo Dios.
 
13 “Ti agguyda inunud nan inali' hi atonda at umatdah nan nitanom an greyp ya figs an mi'id di bungada,
ya na'leng di tubuda,
at hiyanan iyabulut'un mami'id an amin nan indat'un dida.”
Hiyah ne hinapit Apo Dios.
 
14 “At hitun ipa'annungan nan ibagabaga' ya munhahapitda nan iJudah an alyonday,
Umat ay hina ya ma ayuat* Heten hapit an ma ayuat ya neheggon hinan duwan hapit di Hudyuh verse 13 an mami'id ya indat'u, at hiyah te goh di ohah hanul di Hudyu. mah ta umuy tu'uh nan nihamad di allupnan babluy ta hidiy umuy tu'u atayan!
Ti makulug damdama an matoy tu'u an ay ditu'u ipa'inuman ay Apo Dios hi bininu an dumalat nan numbaholan tu'un Hiya!
15 Ti nunhohood tu'uh lumenggopan tu'u,
mu un at goh nan nidugah an atata'ot di nawada.
16 Ti ad ugwan ya dimmatongda mahkay nan buhul hinan babluy ad Dan hi appit hi iggid hi un hagangon di buhu'an di algaw,
At an amin tu'un tatagud Judah ya wumogwog tu'uh ta'ot tu'u.
Ti na'uyday nungkakabayun gumubat,
at umannung an pa"ionda tun babluy tu'u,
ya pumpatoy ditu'un amin an tatagu!”
 
17 Ya inalin goh Apo Dios di,
“Daten ipa'ali' an mamatoy ay da'yu ya ayda ha'u'u an adida ma'amu.”
Hay Limmugwaan Jeremiah hi Punnomnomanah nan iJudah† Bahaom nan footnote di Jer. 8:4 hi aat nan algaw an Ab 9.
18 Ya ha"in an hi Jeremiah ya inali' di,
“Apu, nidugah ahan di ha'it di nomnom'u ya nan punlungdayaa'
19 ti nan i'ibba' an niyuy hi himpapangili ya madngol di kiladan alyonday,
Undan ingnganuy mahkay Apo Dios di ad Jerusalem?
Ya undan mahkay bo'on Hiyay Alih di?”‡ Mattig an ipa'innilan Jeremiah nan adi ma'awatan nan iJudah hi dalat di apa"ian nan babluyda an ta"on hi un inali'alin Apo Dios ay diday gapuna.
 
Mu hi Apo Dios ya inalinay,
“Anaad ahan un nan udum an madayaw ya bulul an inyamman di tataguy dinayawyu
ta omod unna' impabungot ay da'yu?”
 
20 Ya inalin goh nan tataguy,
“Uya'a an ten nalpah di tiyalgaw ya ahiboto'
ya adi da'mi ahan hom'on ay Apo Dios ta baliwan da'mi!”
 
21 Ya ha"in an hi Jeremiah ya inali' di,
“Dumalat nan nidugah an ipaligligatan nan tatagu'
ya nidugah goh di ha'it di nomnom'u an ten munlungdayaa'!
22 Hi Apo Dios ya din'ugna nan tataguna ta adida pumhod
an paddungnay un mi'id ahan di mabalin hi agah ya duktul hi ad Gilead!Ӥ Ad Gilead di nalpuwan nan do'ol an tubun di ayiw ya oho' an ma'usal hi iyammadah agah.

*8:2 Manu ay ipa'at Apo Dios hene ta mipattig an mid ah hulbin nan dinayaw nan iJudah ti mid ah abalinan nan algaw, ya bulan, ya bittuan an managun dida.

†8:3 A'alga'algaw an Ab 9 (unu July-August) ya ibahan nan Hudyuh himba'anday Jer. 8:13-9:24 ta panginomnomandah ustun algaw hidin napa"ian nan Timplun Apo Dios ad Jerusalem hidin 586 B.C. ya hidin 70 A.D.

‡8:6 Heten hapit an iyal'allanan aton hinan hapit di Hudyu ya numpaddung ahan hinan hapitda an nibahhaw (verse 4), ya ibangngad (verse 4), ya immadagwi (verse 5), ya mumbangngad (mapidwah verse 5) an ta"on un nob'on di pohdondan ibaga. At hiyah ne ohah kalahin di hanul nan Hudyu.

§8:7 Hanan kalahin di hamuti an wah nan udum an tungnin an babluy an umat ad Canada ya USA ya pahiwonday timpun di tungnin, at makakda ta umuydah nan adi tungnin an babluy. Ya wa ay goh madatngan di tungnin hinan immayandan babluy at makakda ta umuydah din babluy an nalpuwanda ti hiyah ne timpun di mun'ohab hidi.

*8:14 Heten hapit an ma ayuat ya neheggon hinan duwan hapit di Hudyuh verse 13 an mami'id ya indat'u, at hiyah te goh di ohah hanul di Hudyu.

†8:17 Bahaom nan footnote di Jer. 8:4 hi aat nan algaw an Ab 9.

‡8:19 Mattig an ipa'innilan Jeremiah nan adi ma'awatan nan iJudah hi dalat di apa"ian nan babluyda an ta"on hi un inali'alin Apo Dios ay diday gapuna.

§8:22 Ad Gilead di nalpuwan nan do'ol an tubun di ayiw ya oho' an ma'usal hi iyammadah agah.

© 2018 WBT