57
1 Ya inali' goh an hi Isaiah di,
“Wa ay ta mun'atoyda nan mun'aphod di ugalidan tatagu,
ya mi'id di munnomnom ay dida.
Ya manu ay umat hinay ma'at ya ta elwang Apo Dios didah nan nun'appuhin ma'at.
2 Mu nan maphod di ugalidan tatagu ya diday malenggop,
at mun'eblaydah unda matoy.
3 Ti inalin Apo Dios di,
Da'yun mumpumba'i ya mabaholan ayu an umat ayuh nan puta,
at umali ayu ta mahumalya ayu.
4 Undan hay layalayahanyu ya henglahenglaon?
Undan bo'on ngohoy hanan gunyu aton an mumpunlayah?
5 Ya waday pun'elo'yuh nan hiluk di ayiw an oak hi pundayawyuh bulul,
ya gohbonyu an e'nong nan imbaluyyuh nan way liyang an neheggon hinan ginnaw.
6 Ya umala ayuh nan ul'ulidammuh an batuh di,
ya inonnganyu.
Ya umihiit ayuh nan Onong an Ma'inum hi e'nongyun dida,
ya indatanyu goh didah nan Onong an Ma'an.
Ya undan hay inilayu ya umamlonga' ay danen ato'atonyu?
7 Ya hidih nan tulid di duntug di umayanyu goh hi pun'onngan
ta way pangelo'anyuh nan binabai.
8 Ya nun'itutubyun nun'ihina nan lumihog an bululyuh nan abungyu,
ya inaliwana',
ya din'uga',
ya numpumbolad ayun umuy hinan o"ongol an olo'anyun ibbayu
nan linagbuanyun elo' ta ipa'amlongyuy odolyuh di.
9 Ya munlana ayu,
ya den'olyuy bangbangluyu an umuy mundayaw ay Molek.* Hiyay bulul di i'Ammon.
Ya nunhonag ayuh umuy munhapul hi bulul an dayawonyuh nan adadagwin babluy
an ta"on hi un hinan babluy di nun'atoy.
10 Ta"on hi un ayu ma"ablay an umana'anap hi udum hi dayawonyu
mu adiyu damdama idinong.
Ti hay inilayu ya idat nan dayawonyuy bi'ahyu,
at adi ayu mablay.
11 Hay ngadan danen bulul an mana'ta'atot ay da'yu
ta omod hi unna' at goh ilangkakan ya inaliwan ay da'yu?
Undan dumalat hi dumidinnga' ya hiyay adiyu pange'gonan ay Ha"in?
12 Hay ninomnomyu nin ya ma"aphod nan ato'atonyu,
mu awniat pun'ibaag'uy aatyu,
ya mid abalinan nan bululyun mamadang ay da'yu.
13 Ya wa ay ta kumila ayun mumpabadang ya nan bululyuy pumpabaliwanyu,
mu mun'iyaddibda.
Mu nan mange'kod hi nitaguanan Ha"in ya diday mamnoh hinan babluy'uh
ad hakup hinan me'gonan an duntug.”
Nan Intulag Apo Dios hinan Nun'abaholan
14 Ya inalin goh Apo Dios di,
“Pun'aanyu nan way humalibud hinan kalata
ta midadaan hi dalanon nan mumbangngad an tatagu'.
15 Ha"in di na'abbagbagtu ya me'gonan an Dios an matattaguh enggana,
ya mihinaa' hinan na'abbagbagtu ya me'gonan an lugal.
Mu mihinaa' goh hinan tatagun mumpa'ampa ya muntutuyuh nan baholda,
at ipaphod'uy punnomnomanda.
16 Ya adi' inaynayun an pabaholon nan tatagu'
unu bumungot ay dida an limmu' ta adida ma'ubah.
17 Ma'abbungota' hinan mumpunghan an tatagu!
Hiyanan minolta' ya din'ug'u dida,
mu undaat goh inyal'allan nanganangat hi pohpohdonda.
18 At tinnig'u nan gunda inat an nun'appuhi,
mu ta"on ya iyadaog'u ya badanga' dida ta itudu' di atonda.
19 Ya palenggopo' nan nun'iyadagwi unu nun'iheggon,
ya nun'ipa'adaog'u goh dida.
Ha"in an Dios di nanapit ete.
20 Mu nan nun'appuhiy pangatda ya umatdah nan mabi'ah an dalluyun hinan baybay
an adi dumindinong an gun mangilewong hinan ginalubut ya pito'.
21 Ti Ha"in di mangalih nan mangamangat hi nappuhiy
mi'id di lumenggopanda.”