48
Nan Ngohoy di Holag Israel
1 Ya inalin goh Apo Dios di,
“Da'yun holag Jacob an mungngadan hi Israel ya donglonyu tun alyo'.
Da'yuy nangali an gapu ay Apo Dios ya munhulbi ayun Hiya an dayawon tu'un holag Israel.
Mu layahyu ti un manuh panapitanyu ya adiyu ipa'annung.
2 Manu ti da'yuy numpunhituh nan ma'al'alin babluy an ad Jerusalem,
ya inaliyu goh di hi Apo Dios an nidugah di abalinanan dayawon tu'un holag Israel di pange'kodanyu.”
3 Ya inalin goh Apo Dios hinan holag Israel di,
“Nete"a tuwalih din penghana ya gun'u impa'innilay ma'ma'at hi udum hi algaw,
ya ten ad ugwan ya himbumagga ya impa'annung'u.
4 Ti inila' an nangohoy ayu,
at umat ayuh nan gumo' ya gambang an naligat hi mahiu'.
5 At hiyanan ina'alli' nongkay hatuh din penghana ya un ma'at,
ya ta adiyu alyon hi un nan bululyu an ayiw unu gumo' di nangat.
6 At dengngodengngolyu din impa'innila',
ya ten ad ugwan ya tigonyun nipa'annung,
mu adiyu ahan abuluton an Ha"in di nangat!
At mete"ad ugwan ya hay ipa'innila' mahkay ay da'yu
ya nan agguyyu dengdengngol.* Hay ma'at ya ma'abak nan iBabylon (verse 14) ya mibo'tan nan Hudyun ay balud hidi ta umanamutda (verse 20).
7 Ya hana ya ad ugwan ya anggay di pangngolanyu
ta adiyu alyon hi unyu i'innila tuwali.
8 Ti da'yu ya nihimung an unyu adi pohdon an donglon di alyo'
ti nete"a tuwalih din a'ung'ungngayu ya nidugah an nangohoy ayu.
9 Mu dumalat di nabagtun aat'u ya nan adayawa'
ya enedpol'u nan nidugah an bungot'un da'yu
ta agguy'u da'yu inubah an amin.
10 Ya tinapnga' da'yuh nan punligatan
an umat hi atanagan di silver ta mamahmah.
11 Mu hay pohdo' di hiyay ma'at ta adia' mabainan,
unu adi mabalin an ipabnoh'uy anabagbagtu'
ti Ha"in ya anggay di madayaw.”
Hay Nakakan nan Holag Israel hi ad Babylon
12 Inalin goh Apo Dios di,
“Da'yun holag Jacob an mungngadan hi Israel an pento"uh tatagu'
ya donglonyuy hapito' ay da'yu.
Ha"in an mi'id di te"ana ya mi'id di pogpogna ya anggay di Dios,
13 ya Ha"in di nangiyammah nipabunan tun luta,
ya Ha"in goh nangibe'lag ad daya.
Ti hidin nangalya' hi malmuda ya na'at.
14 At ma'amung ayun amin ta donglonyu tun alyo'!
Undan wadan daten bulul di nangipa'innilan daten ma'at?
Mu Ha"in ya waday pento"uh mangat hinan ninomnom'un apa"ian ad Babylon ya nan tataguh di.† Henen tagun nangubat hi ad Babylon ya hi Cyrus an alid Persia.
15 Ti Ha"in di namto' ay hiya,
ya indat'uy abalinanan mangat hinan pohdo' an ma'at.
16 At umali ayu nongkay ta meheggon ayun Ha"in ta donglonyu tun alyo'.
Ti nete"a tuwalih din hopapna ya impa'innila' hi nahhun an amin di ma'ma'at
ya un mipa'annung.”
Nan Tagun Mangunud ay Apo Dios
Ya ad ugwan ya hi Apo Dios an nidugah di abalinana
ya impiyodolna nan Na'abuniyanan an Lennawan ha"in,
ya hennaga' ta ipa'innila' heten hinapitna.
17 Hi Apo Dios an Baliw ya me'gonan an dayawon tu'un holag Israel,
ya inalinay,
“Ha"in an Diosyu di mangitudtudun da'yuh nan ma"aphod,
ya umat goh an Ha"in di mangipangpangulun da'yuh nan makulug an pange'wanyu.
18 Ya gulat ahan hi unyu inunud nan immandal'u at do'ol di wagah'un da'yun
umat hi danum hinan adi matmatdu' an wangwang.
Ya olom goh ya abakonyu nan buhulyu an umat hinan aton di dalluyun hinan baybay.
19 Ya olom goh ya dimmo'ol di holagyu an umat hi ado'ol di panag,
ya olom at ni' ya agguy'u inyabulut di nun'atayanda.”
20 Mu mapogpog di ihinanyud Babylon ta taynanyu nan iBabylon,
at awniat pun'it'u'yuy umamlonganyu.
Ya awniat ipa'innilayuh nan abablubabluy hitun luta
an hi Apo Dios ya imbaliw da'yun holag Israel an baalna.
21 At umat hidin nangitnudan Apo Dios hinan tatagunah nan mapulun an mi'id di danum,‡ Ex. 13:21-22.
mu binhina nan batu ta nawaday danum hi ininumda.§ Ex. 17:6; Num. 20:11.
22 Mu inalin Apo Dios di,
“Mu nun'appuhiy wah nomnomda,
ya mi'id anuy lenggop di nitaguanda.”