11
Nan Holag Jesse ya nan Pun'ap'apuwana
1 Nan holag di a'apun David ya umat hinan tungod di nali'oy an ayiw
an la'tot ya himmalepeng* Hiyah ne ohan ngadan Jesu Kristu (bahaom nan footnote di Mat. 2:23).
ti nan balbalun mun'alih udum hi algaw ya malpuh holag David.
2 Ya miyodol ay Hiya nan Na'abuniyanan an Lennawan Apo Dios
ta idatnay ananomnomana ya la'engna
ta abalinanan mun'ap'apu ya muntugun hinan tataguna.
Ya inilana nan pohdon Apo Dios an atona ta Hiyay daydayawona.
3 Ya hay iyamlongna ahan ya nan pangun'unudanan Apo Dios.
Nahamad di pun'ap'apuwana ti bo'on nan mattig an aat di taguy tigona,
ya adina edenol hinan ibagan di tatagu.
4 At nahamad an nepto' di atonan mangipanuh hinan nun'awotwot
ya nan mi'id di abalinana.
Ya hana ay an tatagun nun'appuhiy ato'atonda
ya moltaona dida an un anggay di humapitana ya mun'a'atoyda.
5 Ti na'ahhamad di atonan mun'ap'apu
an mi'id di ibahhawana.
6 Ya henen a'atana ya mabalin an mitnud nan ahuh inalahan† Unu wolf. hinan imbaluy di kalnilu,
ya mabalin an me'yelo' nan gandeng hinan lepard.
Ya ta"on un nan layon ya mabalin an me"an hinan baka,
ya hay mangipapto' an manalimun ay dida ya nan ung'ungnga.
7 Ya ta"on un nan baka ya bear ya mundellohdan mangan,
ya ta"on un nan imbabaluyda ya munlalammungda goh an molo'.
Ya nan layon ya umatdah nan bakan mangandah holo'.
8 Ya mabalin an mun'ay'ayamda nan ung'ungungngah nan way abung di ha'u'u‡ Unu cobra.
unu dapoonda nan abungda ti adida umalat.
9 At mi'id di nappuhi unu pumatoy hidih nan ma'alin duntug Apo Dios§ Hay ibalinan ten hapit di Hebrew an duntug Apo Dios ya bo'on ohan duntug ya anggay mu an amin nan babluy ad Israel (Ex. 15:17).
ti an amin di tataguh tun luta ya innilaondah Apo Dios.* Hitun umalian Kristu an mun'ap'apu ya adida mahkay mata'tan nan atap an animal. Ya umat goh hinan tatagun maphod di pun'u'unnudanda.
10 Ya henen gutud† Ma'at hinan Hinlibuy Tawon. ya pohpohdon di tataguh abablubabluy nan mun'ali an holag David, at ma'amungdan amin nan tataguh nan babluyna, ya mid al'alin dida.‡ Rom. 15:12. 11 Ya henen gutud goh di pangibangngadan Apo Dios hinan tatagunan wad Assyria, ya ad Egypt, ya ad Pathros,§ Ohan babluy ad Ethiopia an neheggon hinan igaddad Ethiopia. ya ad Ethiopia, ya ad Elam,* Unu ad Iran. ya ad Babylon, ya ad Hamath,† Ohan babluy ad Aram (unu ad Syria). ya nan wah pingit di baybay, ya hinan babluy an nigagwah nan baybay. At pidwanah ne hi pangibangngadanad Israel hinan tatagunan niwa'at.‡ Nan nahhun ya hidin numbangngadan nan Hudyud Canaan an nalpud Egypt (verse 16).
12 At hiyay dumalat ya ma'amungda nongkay nan tatagunan i'Israel ya iJudah
an niwa'at hi abablubabluy hitun luta.
13 At nan i'Israel ya adida mahkay aguhan nan iJudah,
ya umat goh hinan iJudah an adida mahkay abohlan nan i'Israel.
14 Ta undaat himbabadang an mangubat hinan iPhilistia an numpunhituh appit hi alimuhan di algaw,
ya immuyda nun'ala nan gina'un nan tataguh appit hi buhu'an di algaw.
Ya himbabadangda goh ta abakondad Edom, ya ad Moab, ya ad Ammon ta diday mun'ap'apuh di.
15 Ya tud'on Apo Dios nan Mumbolah an Baybay,§ Unu Red Sea.
ya impiyuynay lumahu an tuyup,
at ta"on un nan Wangwang an Euphrates ya matdu' ta mumbalin hi pitun ginnaw,
at mabalin an bad'angon di tagu.
16 At nan na'angang an tatagun Apo Dios hi ad Assyria
ya waday maphod an kalatan dalanonda
an umat hidin inat din o'ommodah nalpuwandad Egypt.
*11:1 Hiyah ne ohan ngadan Jesu Kristu (bahaom nan footnote di Mat. 2:23).
†11:6 Unu wolf.
‡11:8 Unu cobra.
§11:9 Hay ibalinan ten hapit di Hebrew an duntug Apo Dios ya bo'on ohan duntug ya anggay mu an amin nan babluy ad Israel (Ex. 15:17).
*11:9 Hitun umalian Kristu an mun'ap'apu ya adida mahkay mata'tan nan atap an animal. Ya umat goh hinan tatagun maphod di pun'u'unnudanda.
†11:10 Ma'at hinan Hinlibuy Tawon.
‡11:10 Rom. 15:12.
§11:11 Ohan babluy ad Ethiopia an neheggon hinan igaddad Ethiopia.
*11:11 Unu ad Iran.
†11:11 Ohan babluy ad Aram (unu ad Syria).
‡11:11 Nan nahhun ya hidin numbangngadan nan Hudyud Canaan an nalpud Egypt (verse 16).
§11:15 Unu Red Sea.