Habakkuk
Hay Aat Ten Liblu
Hay Nangitudo' eten Liblu: hi Habakkuk.
Hay Nangitud'an Habakkuk eten Liblu: nan Hudyud Judah.
Hay Pohdon nan Ngadan ten Liblun Ibaga: ngadan di ohan kalahin di nitanom hi galden.
Hay Gutud hi Nangitud'anan ten Liblu: hidin 605 B.C. nin.
Hay Teman ten Liblu: hay aligatan tu'un mangulug ay Apo Dios hi un way nidugah an problema tu'u.
Hay Outline ten Liblu:
Hay NUNLILIAN Habakkuk ay Apo Dios (1:1—2:20)
Manu ay nunlilih Habakkuk ti agguy impawan Apo Dios nan nappuhi (1:1-11)
Manu ay nunlilih Habakkuk ti inabulut Apo Dios nan pangabakan nan iBabylon hinan Hudyu (1:12—2:20)
Hay NANGEHDOLAN Habakkuk ay Apo Dios (3:1-19)
Manu ay enehdol Habakkuk hi Apo Dios an ta"on hi un way nidugah an problemana ti dimmalat nan abalinan Apo Dios (3:1-16)
Manu ay enehdol Habakkuk hi Apo Dios an ta"on hi un way nidugah an problemana ti dimmalat nan anabagtun Apo Dios (3:17-19).
1
1 Hiyah te impa'innilan Apo Dios ay ha"in an hi Habakkuk* Heten ngadan ya bo'on hapit di Hudyu ti hapit di iBabylon, ya hiyah ne ngadan di ohan kalahin di nitanom hi galden. Ya hidin amataguna ya agguy ni' inabak nan iBabylon nan iJudah, at hay nunhulbianan Apo Dios nin ya hidin 610-597 B.C. an propeta.
Hay Hopap di Nunlilian Habakkuk ay Apo Dios
2 Ya inali' di,
“O Apo Dios, anaad ahan ta uya'a ya adi da'mi badangan?
Ti ta"on ahan un'u ikiyol an mangali an nunheglay ato'atondan da'mi mu adi dami ahan baliwan?
Ehwang ni' da'mi ta adi ami mapatoy!
3 Anaad anhan ta iyabulutmun titiggo' hatun nun'appuhin ma'ma'at ta omod unda agogohgoh nan tatagu?
Ya bo'on hana ya anggay di titiggo' hi ma'ma'at ti bumahibahda goh,
ya numpapattoy di udumnah nan tatagu,
at hiyanan munhahannuda ya mumbobohholda!
4 At un mah mi'id di hulbin nan Uldin an adi ma'unud
ti nan maphod an pamanuh ya adi mipa'annung?
Ti paddungay inipit nan nun'appuhiy pangatdan tatagu nan makulug di pangatda,
at hiyanan hunnionda nan maphod an pamanuh!”
Nan Nambal Apo Dios
5 Ya tembal Apo Dios an inalinan ha"in di,
“Tigonyu adya hanan abablubabluy hinan nunlene'woh hinan wadanyu,
at manoh'a ayun mannig hinan ato' hi ad ugwan an ataguyu!
Ya henen ato' ya ta"on unda ipa'innilan da'yu ya adiyu damdama kulugon.† Ac. 13:41.
6 Mu Ha"in ya pundadaano' nan iBabylon‡ Nan iBabylon ya inaba'abakda nan Pumpapto'an nan i'Assyria hidin 626 hi engganah din 605 B.C. hinan numbino'ob'on an gubat, ya hidin 605 B.C. ya diday nangabak mahkay. Ya ninaynayun di numpapto'andah engganah din 539 B.C. (ti heden tawon ya inabak nan iPersia dida).
ta pumbalino' an nidugah di abalinandan mangabak an amin hinan abablubabluy.
Dida ya mun'abungotda,
ya mid ogondan manakup an amin hinan babluy an bo'on lutada.
7 Ya dumalat di amabungotda at hiyanan nidugah an ta'tan nan tatagu dida,
ya nidugah an mumpahiyada ti an amin nan pohdonda ya hiyay ma'unud.
8 Ya nan kabayuda ya mabi'bi'ah ya un nan lepard,§ Nan lepard ya umat hinan o"ongol an puha, ya mabi'ah ahan an tumagtag.
ya nidugah goh an atata'otda ya un nan wolves an ayda ahuh inalahan hinan mahdom.
Ya nan numpungkabayu ya malpuh nan adagwin babluy,
ya umatdah nan tumayapan nan bannug an unda dag'uhon an dapopon nan ononda.
9 Ya umalidan mangat hinan na"appuhi
an un himbumagga ya nidatongda ta pungkaphulda nan tatagun ibaludda
an umat hi ado'ol di panag an adida mabilang.
10 Ya ngongohhoyondan hinhannulon nan a'ali ya nan u'upihyalda,
ya ngongohhoyonda nan nihamad an allup nan abablubabluy ti tababondah luta nan puun di allup
ta hiyay pange'wandan manggop hinan babluy ta kaphulonda nan tataguh di.
11 Ya himbumaggaan nakakda an umat hi tuyup,
at danen nappuhiy pangatdan tatagu ya nan amabi'ahday pangedenlanda an ay hiyay diosda.”
Hay Pidwan di Nunlilian Habakkuk ay Apo Dios
12 Ya himmapita' goh ay Apo Dios an inali' di,
“O Apo Dios, wagwada'a tuwalih din penghana ta enggana!
He"ay Dios an na'ahhamad,
ya adim iyabulut an mapogpog ami ti He"ay umat hinan batun punhi'uganmi!
Ya indatmuy biyang nan iBabylon ta diday manumalyan da'mi
an dumalat hinan nidugah an numbaholanmi!
13 Na'ahhamad ahan di aatmu ti adim pohdon nan nun'appuhi!
At anaad udot ta iyabulutmu nan na"appuhiy pangatdan gun bumalbalih nan tatagu
ta diday mangabak ay da'min manghan di baholna ya un dida?
14 Unmu mah ibilang nan tatagum hi umat hinan ekan
unu nan nalmuh nan baybay an mi'id ah ap'apudah mangipapto' ay dida?
15 Unmu mah iyabulut nan iBabylon ta pumbungwitan da'mi,
ya nunhidu' da'min pundopap an ay ami ekan an pun'alada,
ya ahida goh udot tum'u' hi umamlonganda?
16 Ya onnganda nan hidu'da an gohbonda nan maphod di hunghungna an incense
ti heden hidu'day dimmalat hi nangidat hi inadangyanda,
at mahawal di mun'aphod an ononda.
17 Ya unmu mah iyabulut an gunda iyal'allan mumpamatoy
hinan tataguh nan abablubabluy an mi'id ah homo'da?”
*1:1 Heten ngadan ya bo'on hapit di Hudyu ti hapit di iBabylon, ya hiyah ne ngadan di ohan kalahin di nitanom hi galden. Ya hidin amataguna ya agguy ni' inabak nan iBabylon nan iJudah, at hay nunhulbianan Apo Dios nin ya hidin 610-597 B.C.
†1:5 Ac. 13:41.
‡1:6 Nan iBabylon ya inaba'abakda nan Pumpapto'an nan i'Assyria hidin 626 hi engganah din 605 B.C. hinan numbino'ob'on an gubat, ya hidin 605 B.C. ya diday nangabak mahkay. Ya ninaynayun di numpapto'andah engganah din 539 B.C. (ti heden tawon ya inabak nan iPersia dida).
§1:8 Nan lepard ya umat hinan o"ongol an puha, ya mabi'ah ahan an tumagtag.