7
Hay Punnomnoman hi Aat di Nitaguan
1 Mu nan maphod an pangat ya na'ahhamad ya un nan nanginan bangbanglu,
ya nan algaw an atayan ya nahamhamad ya un nan algaw an nitungawan.
2 Onaynah un nan abung an wadan di natoy di ayan ya un nan abung an do'ol di nidadaan hi ma'an
ti nomnomnomon tu'u an nan matagu ya matoy damdama!
3 On'onaynay lumungdayaan ti waday pumhodan ya un nan umaba'abatlan
ti ta"on hi un way lumungdayaan mu waday pumhodan.
4 Nan nanomnoman an tagu ya nonomnomonay aat di atoy,
mu nan manangpah an tagu ya hay umamlonganay nonomnomona.
5 On'onaynah un tu'u donglon di paningal nan nanomnoman an tagun ditu'u
ya un nan pangipahiyaan nan manangpah ay ditu'u.
6 Nan abatol nan mumpanangpah ya ay budi' di apuy,
at mi'id di hulbina.
7 Nan nanomnoman an tagun umam'am ya nipaddung hinan manangpah an tagu,
ya nan mili"ud an lagbu ya hiyay pumuhiana.
8 On'onaynah nan pangelpahan hinan way ma'at ya un nan pangete"an,
ya on'onayna nan madpol ya un nan mumpahiya.
9 Madpol tu'u ta adi tu'u mabanbannungot
ti hay wagwadah nomnom nan manangpah ya bungot.
10 Adi tu'u alyon di,
“Anaad ta hidin penghana ya on'onaynay na'na'at ya un ad ugwan?”
Ti nakudang di nomnom nan mangalih umat hina!
11 Nan nanomnoman an tagu ya ay ihunay nidatan hi banoh,
at on'onayna hiya ya un nan udumna.
12 Nan ananomnoman ya do'ol di ibadangna an umat hi pihhu,
mu hay inyap'aphod di ananomnoman ya papuutana ta badanganay nitaguan nen tagu.
13 Ya adya nomnomon tu'uy aat di inat Apo Dios,
at undan waday abalinan tu'un mangandong hinan pinikuna?
14 Ya wa ay ta mi'id al'alih nitaguan ya waday amlong,
mu wa ay ta dumatong di ligat ya nomnomon tu'u an hi Apo Dios di nangiyabulut ay dane.
At mi'id ah taguh nanginnilah nan aat di mehnod hi ma'ma'at.
15 Hiyatuy tinnig'un ten paddungnay mi'id hulbinan nitagua' an numanomnoma'
ti anaad ta nan maphod di pangatnan tatagu ya ungadaan natoyda,
mu hanan adi maphod di pangatda ya ma'alla'ayda ya unda matoy?
16 Adi gahin un ihamhamad di pangat tu'u ya ananomnoman tu'uh pangipattigan tu'uh aat tu'u,
at anaad ta paligaton tu'uy odol tu'u?
17 Mu pohdonyu ay an ag'agan ma'agag
ya agayu ta iyal'allayun pumuhi ya lumayalayah.
18 Mu onaynah un ano'nongon di aton
ti nan tagun mangulug ay Apo Dios ya waday maphod hi pumbalinan an amin di atona
an umat hinan kiluan an mahapul mumpaddung ta adi do'do"ol di oha ya un nan oha.
19 Nan nanomnoman an tagu ya nidugdugah di abalinana
ya un nan himpulun a'ap'apuh nan babluy.
20 Ya mi'id ah ohah taguh tun luta an hay maphod di gunna aton
an adi ahan mumbahbahol.* Psa. 14:3; 53:3; Rom. 3:12.
21 Ya adi tu'u dumongodongol hinan hapihapiton nan tatagu
ti la'tot ya waday nappuhih donglon tu'uh inulgud nan tagala tu'u.
22 Ti nomnomon tu'u an ta"on un ditu'u
ya waday gun tu'u namadngolan hinan udum an tatagu!
23 Ya hinamad'un inat an amin nan inali' ti hay inila' ya luma'enga'.
Mu unat goh impadah'u ya adi' abalinan!
24 Hay aat nin di la'eng?
Ti ta"on un nan nanomnoman an tagu ya mi'id abalinanan manginnilah aatna!
25 At nimmomnonomnoma' ya himmanhahanhana' ta innilao' di nahamad hi aat nan la'eng ya nan ma'ma'at,
ya ta innilao' goh di anaad ta nappuhiy ato'aton nan manangpah ya nan munlayah.
26 Ti wada han umagay'ay an babai an nan pamhodna ya nidugdugah ya un nan atoy,
ya nan umat hinan babai ya umat hi bitun a'naan.
Ya nan ta'laynan iyawalna ya ay bangkeleng an odnan da'a,
mu adina abalinan an odnan nan lala'in umipa'amlong hinan Dios.
Nan nabaholan an lala'iy ag'agan ma'na.
27 Mu ha"in an Manudtudu ya gun na'udma'udman di inadal'u,
ya manoh'aa' hi nanginnilaa'
28 an ta"on un hinlibun linala'i ya un ohay maphod di aatna,
mu mi'id hinan binabai.
29 Ya umat hituy aat di ininnila' an ditu'un tatagu ya limmun Apo Dios an ma"aphod di aat tu'u.
Mu nihimung an ditu'uy nangulat an nunnomnom hinan numbino'ob'on an nappuhin ma'ma'at.