8
Nan Paddungnay Nipa'enap an Nalum an Bunga
1 Wada goh di impattig Apo Dios an na'abbagbagtun ha"in. At hay tinnig'u ya han bahkit an napnuh din nun'alum an bunga. 2 Ya inalinan ha"in di, “Amos, ngadan di tinnigmu?”
Ya inali' di, “Nan bahkit an napnuh nan nun'alum an bunga.”
Ya inalin Apo Dios di, “Manu ay ya nadatngan mahkay di amoltaanyun tatagu' an holag Israel. Ti mipaddung ayuh nan nalum an bungan di ayiw an nadatngan nan amoltaanyu ti adi' mahkay bayagon an aton. 3 At henen algaw an a'atana ya mumbalin nan kantah nan Timpluh kantan mikantah nan way matoy. Ti do'ol di tatagun matoy, at awakilatda an mi'id di al'ali!”
4 At inali' di,
“Da'yun mangipaligligat hinan mahmo' an nun'awotwot
5 ya iyahupanyuy alpahan di Behtan di Akayangan nan Bulan ya nan udum an behta
ta umuyyu goh lugion dida ti usalonyuy agguy immannung di lukudnan kiluan!
6 Ya ta"on un nan adi maphod an bogah ya ila'uyun dida,
ya nan nawotwot an adi pa'alla'uh ohah palis hi hapatusna ya hubutonyu ta mumbalindah himbutyu!”
7 Mu hi Apo Dios ya inalinay,
“Adi' ahan al'alliwan nan nun'appuhin inatda an ta"on unda ipahiyay aatdan Ha"in!
8 At hiyanan waday mabi'ah an alyog ta tuma'otdan amin ti nidugah an miwogot tun lutan
umat hinan Wangwang an Nile an nidugah di dalluyuna,
9 Ya henen algaw an gutud† Nan Punligatan di Tatagu nin. di pangipattiga' hi bohol'u,
ya humelong di luta an ta"on un hinan muntongay algaw,
ya umanal'algaw di helong.
10 Ya pumbalino' nan umamlonganyun mumbehtah lungdaya,
at ta"on un nan kantayu ya umipakila.
At munlubung ayuh langgut,
ya mumpamukmuk ayu an umat hinan aton di natoy di oh'ohhan imbaluyna
ti nidugah ahan di ma'at enen algaw.”
11 Ya inalin goh Apo Dios an na'abbagbagtuy,
“Henen agtudana ya ta"on un ahan pohdon nan tatagun donglon nan Tugun'u ya nihimung an mi'id mahkay,
an umatdah nan tagun na'uwaw ya nahinaangan ahan,
mu mi'id di ah'upandah ma'an ya ma'inum.
12 At humanagwangan nan tataguh abablubabluy an munhapul hi humapita',
mu mi'id nongkay.
13 At ta"on un nan mina'ma'ilog ya mun'a'ulawda ya mun'a'uwawda
an dumalat di panapulandah humapita'.
14 Mu naladaw an bo'on Ha"in di dinayawdah ad Samaria, ya ad Dan, ya ad Beersheba,‡ Bahaom nan footnote di II Sam. 3:10 ta innilaom di aat nan lugal ad Dan ya ad Beersheba.
at hiyanan nipaddungdah nan mihubag an mid olognan bumangon.”
*8:8 Atawotawon hinan timpun di umudananad Cush (unu ad Ethiopia) hi awadan nan te"an di Wangwang an Nile ya mundatong, at nan do'ol an danum hinan wangwang ya mumpa'uy ad Egypt ta bumuhu' hinan Baybay an Mediterranean. Mu unat goh dumatong hinan nundotal ad Egypt at malbong, ya tinawon an gun dumo'ol nan danum hinan wangwang hidih duwampulu ta lemay umpi (feet). Mu palpaliwan ya ma'nad goh nan danum, at mumbangngad hinan aatna tuwali. At hay tigaw nan Wangwang an Nile eden timpu ya umat hinan miwogot.
†8:9 Nan Punligatan di Tatagu nin.
‡8:14 Bahaom nan footnote di II Sam. 3:10 ta innilaom di aat nan lugal ad Dan ya ad Beersheba.