1 Donglom bahan tun dasal'u an mumpahpahmo' i he''a Apu Dios.

Innila' an nipto' di pangatmu ya adim ibahhon aton di ibagam ot hanat boddangana' bahan.

2 Ya hanat adiya' bahan humalyaon an baalmu ot innila' an ma''id ha taguh agge numbahul i he"a.

3 Hanadan mi'buhul i ha''on ya tinnutinnuda' ta ingganaot abakona'.

Ot paddungnay eya' ibalud i han munhihillong an awadan di numpun'ate.

4 Ta hiya nan amod on'u iwalong di nitaguwa' te ay hanan ma"id mahan mo ha namnama'.

5 Ya nomnomnomo"e din imme'immen tawon ya mipanomnom an namin nadan ina'inatmu.

6 Ta hiya nan intagge' di ta'le' ot mundasala' te he"ay mahapul'u an umata' hinan na'magannan an luta an hihimlonay umudanana.

7 Ot agam bahan Apu Dios ta tobalom di dasal'u te tuwe mahan mo tayyan ma"id ha namnama'.

Ot adiya' bahan iwalong te iwalonga"e ya ma"id ha bahhonan mateya'.

8 He"ay pundinola' ot hanat hinan amawimawi"it ya ipanpanomnommu nan ongal an pamhodmu ya hanat itudduwana' hi nipto' hi ato'.

9 He''a Apu Dios di paddungnay ihi"uga' ot hanat ihwanga' bahan hinadan binuhul'u.

10 Ya he''a an dayawo' ya hanat itudduwana' ta hanadan pohdom di ato'.

Ya hanat ipapto'a' hinan ma'ulen Espiritum ta malinggop di pi'taguwa'.

11 Hanat ipa'annungmu nan imbagam an ihwanga' ta boddangana' bahan hitun punligata' ot innila' an maphod di pangatmuh tatagum.

12 Ya hanat gapuh nan munnananong an pamhodmun ha''on ya dadagom nadan mi'buhul i ha"on an baalmu.