1 Ot alyon bon Apu Dios i ha''on di, 2 He"a Ezekiel ya nganney innilam hi numpaddungan nan wakal ya nan kayiw? Ya umat hinan nitanom an greyp an hi'on na'alan namin nan bungana ya nganney iyatan nan adolna? On waday usalna an umat hinadan kayiw? 3 Ma''id te adi mabalin an apyon hi umat hi pangipattukan hi kumpulna. 4 Manu te mabalin an mitungu hi'on namaganan mu hi kittang on nagbu ya ma"id ha balana. 5 Ta athidiy niyatan nan adol nan greyp an wa'et na'alan namin di bungana ya ma"id mo ha hilbina an ta'on on itungu onu adi. 6 Ot hiya nan ha"on an na'abbaktun Dios ya alyo' di, Nadan nunhituh ad Jerusalem ya umatdah nan wakal hinan muyung an hay usalda ya on mitungu ya abuh 7 te dusao' dida. Ta ta'on on nihwang di udum i dida hinadan namangulun dinusa' mu dusao' damdama dida ta madadagda. Ot athidiy ato' ta panginnilaanyun ha"on hi Apu Dios. 8 Ot gapu ta inwalongdan mangun'unud i ha"on ya pumbalino' nan bobleyuh adi naboblayan. Ha"on an na'abbaktun Dios di mangalin tuwe.