1 Nasāpa sa Joswe kan tabo Israelita saw a naybangon do somaronwaw a araw, komnaro sa do Sittim, as kan nangay sa do Oksong Jordan. Dawri sa a nagkampo sakbay sa mamtang. 2 Napahabas tatdo a karaw, minidibidi saw opisyalis do intīro a kampo, 3 kan inmandar da do tawotawo saw a kon da, “Anchan maboya nyo Lebita saw a papādi a maykatkat so Lakāsanaw no Tōlag ni ĀPO a Dyos nyo, maychakatkat kamo a monot dyira. 4 Tan komwan, chapatak nyo ayaman nyo, ta ari kamo payad nangay do dya a ayaman. Ki maypasngen kamo aba do lakāsanaw. Makapanawdyi kamo kan machateng kamo so nagistayan asa kakilomitro.”

5 Inbahey ni Joswe dyirad tawotawo saw a kāna, “Mariyos kamo a mangpasanto so inawan nyo,* 3:5Parinen daw nya a pakaboyan so kadalos kan kasantwan da do salapen no Dyos. Gen. 35:2; Eks. 19:10, 14-15 ta anchan delak mamarin si ĀPO siras makaskasdāaw do salapen nyo.” 6 As binata ni Joswe dyirad papādi saw a kāna, “Katkaten nyo Lakāsanaya no Tōlag, kan panma nyo dyirad tawotawo saya.” Tinongpal da akmas inbahey naw dyira.

7 Binata ni ĀPO di Joswe a kāna, “Sicharaw, irogi ko na padayāwan imo do salapen dan tabo a Israelita tan chapatak da a akmas nakayan kwaw di Moyses, komwan kayan ko dyimo. 8 Ibahey mo dyirad papādi saw a mangisiw so Lakāsanaw no Tōlag a anchan makarapit sa do ngalab naw no oksong, domakwang sa do ranomaw, as kapaytēnek da do oksongaw.”

9 As binata ni Joswe dyirad Israelitaw a kāna, “May kamo dya, kan adngeyen nyo an āngo ichirin ni ĀPO a Dyos nyo. 10 Nyaw mangipaboya dyinyo an maypāngo kapatak nyonchi a iyaw sibibyay a Dyos, ki myan dyinyo. As kan syirto a paksyaten na sanchi do salapen nyo tawotawo a Kananeo, Heteo, Hibeo, Pereseo, Girgaseo, Amoreo, kan Jeboseo. 11 Chiban nyo. Iyaw Lakāsanaw no Tōlag ni ĀPO no intīro a lōbong, ki maiyabtang do Oksong Jordan a manmanma kan inyo. 12 Sichangori, pidyen nyo asa poho kan dadwa a mahahakay, kan tayisa a yapo do kāda trībo saw no Israel. 13 Anchan domakwang sa do ranomaw papādi saw a mangisiw so Lakāsan no Tōlag ni ĀPO no intīro a lōbong, magsardeng anchi a moyog iyaw Oksong Jordan. As iyaw ranomaw a moyog a yapo dwa ato naw, ki mapenpen a mayparin a akmay dyindyin.”

14 Dawa, komnaro saw tawotawo do kampo da a mamtang do Jordan. As siraw papādi a mangisiw so Lakāsan no Tōlag, ki myan sa do panman. 15 Do dāwri a chimpo, ki chimpo no kapagraranyi, kan maglayos paw oksongaw. Apāman a nakadakwang saw papādyaw a nangisiw so Lakāsan no Tōlag do ranomaw, 16 iyaw ranomaw do ato naw, ki nagsardeng a minoyog. Nakpeh ranomaw do midyo a mabawa, do idi a Adam do masngen do Saretan. As iyaw ranom a moyog a mosok do Nadiman a Tāw, ki araba polos. Dawa, nakabtang saw tawotawo do bīt a masngen do Jeriko. 17 Siraw papādyaw a nangisiw so Lakāsan no Tōlag ni ĀPO, ki nāw da naytēnek do mabkohaw a tana do hobok no Jordan a manda do nakapakabtang da do mabkohaw a tana no intīro a nasyon.