1 Nabyay si Sara so 127 katawen. 2 Sinpangan na, nadiman si Sara do Kiryat-arba (a matawagan pa so Hebron) do tana a Kanaan. Nangay si Abraham do yanan bangkay naw, kan dinongdong-awan na a maynamot do kadiman na.

3 Sinpangan na, kinarwan Abraham bangkayaw ni Sara, as nakangay na nachisarīta dyirad Heteo saw a tawo. Binata na dyira a kāna, 4 “Gan-ganaet ako pa dyinyo do dya tana, ki machiyan ako na dya do tana nyo sichangori. Ki chāsi nyo yaken, ta lākwan nyo pa yaken so tana a pangitabōnan ko si baket ko.”

5 Tominbay saw Heteo saw di Abraham a kon da, 6 “On, mo sir, ta ibidang namen imo a asa mabīleg a prinsipi a myan dyamen. Dawa, itābon mo do kagaganayanaw a pidyen mo iyaw bangkayaw ni baket mo. Aran sino dya, ki masoyot kami a manoroh so chakey mo.”

7 Nagrōkob a nagyāman si Abraham do salapen dan Heteo saw a omidi daw, 8 as nakabata na sya dyira a kāna, “An oyod a chakey nyo a itābon ko dyaw baket kwaya, yangay nyo pa a iyahes di Epron a Heteo a pōtot ni Sohar. 9 Aryaw aschip na myan do Makpela, iyaw pandanaw no bengkag na. Akdawen nyo pa dya a ilāko na dyaken do gagāngayaw a prisyo no tana, ta bayādan ko, as bayādan ko dya do salapen nyo tan mabokōdan ko a pangitabōnan.”

10 Ki myan do dāwri si Epron a mismo a maydisna do naychichipehan daw no kapayngay naw a Heteo do rowanganaw no syodad. Initbay na di Abraham do salapen dan tabo tawotawo. 11 Binata na, “Mo sir, itoroh ko dyimo iyaw bengkagaw kan iyaw aschipaw a myan daw. Itoroh ko dyimo nya do salapen dan kaidyan kwaya tan itābon mo daw baket mwaw.”

12 Do dāwri, minirwa si Abraham a nagrōkob do salapen daw no tawotawo saw a omidi daw, 13 as naychirin di Epron do salapen daw a tabo daw tan aran sira, ki madngey daw nawri a inbahey na. Binata na a kāna, “Adngeyen nyo pa yaken. Bayādan ko tana mwaw, kan rawaten mo pakono nyaya bāyad, tan maparin ko a itābon daw kabahay kwaw.”

14 Tominbay si Epron di Abraham a kāna, 15 “Aran imom sir, adngeyen mo pa yaken. Iyaw nawri a tana, ki magbalor so apat a gasot a pirak.* 23:15 Apat a gasot a kwarta, ki nagistayan apat kan godwa kakīlo karahmet na. Dēkey lang dyaten nawri. Dawa, itābon mo na daw baket mwaw.” 16 Do dāwri, nakey si Abraham. Dawa, kinilo naw apataw a gasot a pirak a iyaw inakdawaw ni Epron do salapen dan Heteo saw a sigon do gagāngay a rokod da a os-osaren dan magnignigosyowaw do dāwri a chimpo.

17 Komwan nakahap ni Abraham so bengkagaw ni Epron do Makpela do dayāen logar a Mamre kontodo iyaw aschipaw kan tabo saw kayokayo saw a myan do irahem na. 18 Tabo Heteo saw a nangay do dawri a nakapaychichipeh da do rowanganaw no syodad, ki napatakan darana a dyira ni Abraham nawri a tana. 19 Katayoka no nawri, intābon Abraham si Sara a baket na do dawri a aschip do bengkag do Makpela a masngen do tana a Mamre a pinangaranan das Hebron do tana a Kanaan. 20 Komwan nakadyira ni Abraham so bengkagaw a myan so aschip a ginātang na dyirad Heteo saw a nayparin a pangitabōnan.