10
No Kari no Dyos a Kaisalākan
1 Akdawen nyo di ĀPO chimoy do chimpo no rayon.
Ta si ĀPO, iyaw mamarin so konem.
Iya, ki manoroh so chimoy do tawotawo
kan mohamoha do bengkag a para do katayitayisa.
2 Siraw didyosen, ki mangibahey sa so allīlaw.
Siraw mangarobōob, ki magparmata sa so bayataw.
Mangibahey sa so tayēnep da sa a palso.
Manoroh sas pangahwahok a abos sirsīrbi.
Dawa, mapāwaw saw tawotawo akmay karniro.
Maidadanes sa do kabo no pastor da.
Batahen ni Āpo a kāna,
3 “Somdeb kasoli ko dyirad dawri a sinpapastor,
kan dosāen konchi siraw nawri a magtotoray.
Ta yaken a ĀPO a Manakabalin do Tābo,
ki aywanan ko arban ko a siraw tawotawo no Joda.
Payparinen ko sanchi a akmas mabīleg saw a kabalyo do paggogobatan.
4 Yaponchi do Joda iyaw bato a panōli.
Yaponchi dyaw pāsok no tolda,
yapo pa dyaw bai a para gobat kan kāda magtoray.
5 Mayparin sanchi a mabibīleg a tawotawo
a mangpitapita siras kabōsor da do hota do kalsāda.
Maynamot ta si ĀPO, ki myan dyira,
machigobat sanchi kan abaken da sanchiw kabōsor daw a nakakabalyo.
6 “Payiten konchiw tawotawo no Joda,
kan isalākan ko sanchiw tawotawo a Israelita.* 10:6 Mana “tawotawo ni Jose”.
Pabidyen ko sanchi a isabat
maynamot ta chāsi ko sa.
Akma ko na sanchiw dya inpoha,
ta yaken ĀPO a Dyos da, as kan atbayen ko dasal da.
7 Siranchiw tawotawo no Israel,† 10:7 Mana “tawotawo no Epraim”. ki mabīleg sanchi a akmay taga-gobat,
kan masoyot sanchi a akmas tawotawo saw a nakaynom so palek.
Maboya danchin anak da sayaw nya kan chasoyot da.
Magragsak sanchi maynamot do pinarin naya ni ĀPO.
8 “Tawagan ko sanchi,
as kakpeh ko sira.
Sigorādo a isalākan ko sanchi,
as kan pārohen ko sanchi a akmas sīgodaw a kāro da.
9 Aran pinaychawpit ko sa do nasnasyon saya,
alit na, manakem danchi yaken do mateng saya tana.
Sira kan anak da saw, ki makalāsat sanchi,
as kan maybidi sanchi.
10 Isabat ko sanchi a mirwa a yapo do Egipto kan do Assirya,‡ 10:10 No kāron tawotawo no Dyos a naikaro a nabahod, ki naiyangay sa do Assirya. Ki myan saw kadwan a nagtālaw mana naiyangay do Egipto.
kan paomyanen ko na sanchi do bōkod da tana.
On, pagyanen ko sanchi do tana a Gilead kan do Lebanon
mandad kapnon intīro a tana do tawotawo ko.
11 Anchan mamtang sa do tāw§ 10:11 Pananahan naw “tāw no Egipto”. no lidyat,
yaken a Āpo, ki abāken konchiw kelsang saw no tāw,
as kan mayachan anchiw kensad naw no Oksong a Nile.
Iyaw pangas no Assirya, ki mapabodis anchi,
as mabonchi no Egipto kapagtoray na.
12 Payiten ko sanchiw tawotawo ko.
Magdāyaw kan magtongpal sanchi dyaken,” bata ni ĀPO.