1 Inpakatoneng dana ni ĀPO a Manakabalin do Tābo minsāhi naw di Sakaryas a kāna, 2 “Inahahay ko kasidong ko so Jerosalem maynamot do dya matokod a kadaw ko siras tawotawo naya. Maynamot do kadaw ko, insoli ko saw kabōsor na saw.” * 8:2 Do Hebreo a chirin, ki “Taywara a maīmon ako do Sion. Palālo kaīmon ko dya a myan rakoh a kasoli ko.”

3 Nyaw batahen ni ĀPO a kāna, “Maybidi akonchi do Sion, iyaw tokonaw a naydisnan Timplo, kan omyan akonchi do Jerosalem. As matawagan anchiw Jerosalem so Mapodno a Syodad. As no matawagan so tokon ni ĀPO a Manakabalin do Tābo, ki matawagan anchi so Masantwan a Tokon. 4 Siraw taywara a mangalkem kan babbaket, ki maydisna sanchi do payis no kalkalsāda do Jerosalem a maynahah, as kan maysarokod sa maynamot do kalalakay kan kababbaket da. 5 Mapno dananchiw kalkalsāda saw no syodad so adedekey a maychagtagtal.”

6 Nyaw batahen ni ĀPO a Manakabalin do Tābo a kāna, “Maparin a dyi da anohdan no naakaw saw a nakalāsat a nakapaybidi a tawotawo ko, ki maydamnay lang dyaken nya. 7 Isalākan ko sanchiw tawotawo ko saw yapo do nasyon saw do dāya kan do lāod a nakaiyangayan da. 8 Isabat ko sanchi tan omyan dana sanchi do Jerosalem. Siranchiw tawotawo ko, kan yaken anchiw Dyos da. Itorayan ko sanchi a sipopodno kan sililinteg.”

9 Nyaw batahen ni ĀPO a Manakabalin do Tābo a kāna, “Inyo a makadngey siras nya chirin sichangori do inbahey daw no propīta saw a myan do dāwri, do nakapangay daw so pondasyon no Timplo kwaya, ki payiten nyo kapangtokto nyo tan mapatnek danaw Timplo kwaya. 10 Sakbay do dāwri a chimpo, abaw makakāya manangdan so tawo mana animal. Abaw tod a makangangay do ngayan na a maynamot do kāmo nad kabōsor na, ta pinaysin-iipsok ko sa tabo tawotawo. 11 Ki sichangori, akma paba do nakahabas kaparin ko dyirad tawotawo saya a nakalāsat a nakapaybidi,” batahen ni ĀPO a Manakabalin do a Tābo.

12 “Makapaymoha dana sa sitatalna. Tomobo dananchiw botoh, may-asi dananchiw ōbas da, as āro dananchiw maāpit do tana, as kan asdayen dananchi no hanyit maboslon a apon. Itoroh ko sanchi a tabo nyaya bindisyon do nakalāsat saya tawotawo ko a nakapaybidi. 13 Do nakarahan, inyo a tawotawo no Joda kan Israel, inyo panyinyirin da a naabay no nasyon saya. Ki isalākan konchi inyo, as kan inyo maybadiw a panyinyirin da a mabindisyonan. Dawa, inyo a tawotawo no Joda kan Israel, mamo kamo aba kan tomored kamo.”

14 Tinongtong a binata ni ĀPO a Manakabalin do Tābo a kāna, “Do nakapasoli daw dyaken kapoonan nyo saw, inkeddeng ko didigra dyira, as kan abaw inpaboya ko a kāsi dyira. 15 Ki sichangori, inkeddeng ko naw mamarin so maganay do tawotawo no Jerosalem kan no Joda. Dawa, mamo kamo aba. 16 Siraw nyaw machita parinen nyo: Ichirin nyo oyod do katakatayisa dyinyo. Masaw ipākat nyo kosto a pangeddeng a mapaychachapya do pangokoman nyo. 17 Magpanggep kamo abas marahet a maikontra do kapayngay nyo a tawo, kan chadaw nyo abaw mangipaneknek so bayataw, ta ipsok ko sa tabo nya,” batahen ni ĀPO.

18 Inpakatoneng dana ni ĀPO a Manakabalin do Tābo minsāhi naw dyaken a si Sakaryas a kāna, 19 “No kapagayonar nyo do chapat, chadadima, chapapito, kan chaasa poho naw a kabohan,† 8:19 Do chapat naw a kabohan, ki pakanaknakman das arawaw a nakarakrak no bōyot no Babilonya so ahadaw no Jerosalem kan somindep sa. As kan no chadadima kan chapapito naw a bohan, chiban nyod 7:3, 5. No chaasa poho a bohan, ki pakanaknakman da so nakadibon no bōyot daw no Babilonya so syodadaw a Jerosalem. 2 Ār. 25. 1-4; Jer. 39. 1-2 ki payparinen konchi a maragsak kan makasoyosoyot a pista no tawotawo do Joda. Dawa, machita chadaw nyo kaoyodan kan kapaychapya.”

20 Nyaw batahen ni ĀPO a Manakabalin do Tābo a kāna, “Marapit anchiw chimpo a siraw tawotawo saya a yapo do āro saya a syodad, ki mangay sanchi do Jerosalem. 21 Siranchiw omyanaw do asa a syodad, ki mangay sanchi do matarekaw a syodad, kan bata da a kon da, ‘Mangay kami na insigīda a magdāyaw di ĀPO a Manakabalin do Tābo kan mangdakdaw so bindisyon. Ngay! May ta!’ 22 On, āro sanchi a tawotawo kan mabibīleg a nasnasyon mangay do Jerosalem a magdaydāyaw di ĀPO a Manakabalin do Tābo kan mangdakdaw so bindisyon na. 23 Do dāwri sanchi a araw, asa a pohonchi a tawotawo a yapo do kāda kapaychirin do kāda nasyon, ki mangay a mangdaw‡ 8:23 Do Hebreo a chirin, ki “mangay a mangigpet so kagay no asa a Jodyo”. do asa a Jodyo, kan batahen danchi a kon da, ‘Palobōsan nyo pa yamen a machirayay dyimo, ta nadāmag namenaw a iyaw Dyos, ki myan dyimo!’ ”