No Libro A Roth
No Pakatonngan so Paytābwan no Nya Libro
Iyaw nyaya libro a Roth, ki maynamot do asa mabakes a taga nasyon a Moab. Siraw Moabita, ki yapo do kapotōtan ni Lot a kaanakan ni simna Abraham. Ki no dyos da, ki Chemos, dya iyaw oyod a Dyos.
Do kayan nya istorya a Roth, ki chimpo dan okom sakbay myan āri do Israel a akmas mabāsa do Libro Dan Okom. Nabyay si Roth sigōro do kadama ni Gideon a okom a mangitoray (Ok. 6-8). Siraw Moabita, ki kabōsar dan Israelita. Ki do chimpo Roth, nachikapya sa.
Si Roth, ki nangabahay so asa Israelita. Do nakadiman no lakay na, inpaboya ni Roth iyaw taywara a kadaw na di katogāngan na a mabakes a si Noemi a nabālo dana, as polos a dyi na karwan. Basbāli a inanohdan na paw Dyos dan Israelita (1:16), kan nachonot di katogāngan na a mangay do sīgod a tana na Israel (1:22). Do dāwri, nangabahay so mahakay a mayngaran so Boas a kabagyan no simna lakay ni Noemi. No pachipandan na, nayparin si Roth iyaw āpong do tōd ni Āri Dabid.
Siraw istorya do Libro Dan Okom, mangipaboya siras didigra a napasaran dan tawotawo no Israel, ta tomnadyichokod sa di Āpo Dyos. Ki do libro a Roth, mangipaboya so kabindisyon a nangay do asa gan-ganaet a nanganohed do Dyos no Israel, as nachirāpa dyirad tawotawo na.
Iyaw istorya da Roth kan Boas, mangipaboya pa so kapariho da Boas kan Āpo Jeso-Kristo. Akmas kaalāngon ni Boas a masngen a kabagyan no simna lakay ni Roth (3:9), komwan si Jesos a mangalāngon dyaten a manganohed dya a ibidang a tawotawo na. Iyaw pangārig no nakabāyad ni Boaz so tabo dyiran simna Elimelek (Rot. 4:5-10), ki maipariho do nakabāyad ni Jesos so tabo gatogatos ta tan maisalākan ta (1 Ped. 1:18-19). As akma si Boas a dya masnek a kabahayen si Roth, kan insalākan na yapo do kapobri na, komwan si Jesos a dya masnek a tawagan na yaten so kakteh (Heb. 2:11).
No Naychakarwan no Nya Libro
No kangay ni Elimelek kan pamilya na do Moab, as iyaw kapaybidi ni Noemi kan Roth do Betlehem 1:1-22
No kangay ni Roth do bengkag ni Boas 2:1-3:18
No kapaychabahay da Boas kan Roth 4:1-12
Siraw kapotōtan ni Boas kan Āri Dabid 4:13-22
Roth
1
No Nakangay ni Elimelek kan Pamilya Na do Moab
1 Do chimpo dan ok-okom a mangitoray do tana a Israel,* 1:1 No chimpo dan ok-okom, ki sigōro myan 300 a katawen as nakasarono no nakapangitoray ni Āri Saulo a iyaw dāmo a āri no Israel. myan kapaychapteng do tana daw. Do dāwri, myan asa a mahakay a taga Betlehem do irahem no sākop no Joda a nangay a minyan do tana a Moab kontodo si baket na kan dadwaw a pōtot na a babbaro. 2 Elimelek iyaw ngaran nya mahakay. Noemi iyaw ngaran baket na, kan Mahalon kan Kilion iyaw ngaran dan babbaro da saya. Iyaw nya pamilya, ki yapo do partīdos dan kapoonan ni Eprata a minyan do idi a Betlehem do sākop no Joda. Ki do dāwri a chimpo, nayadis sa Elimelek do tana a Moab kan minyan sa daw. 3 Do dāwri, nadiman si Elimelek kan natokos si baket na a si Noemi kontodo dadwa saw a pōtot na a mahahakay. 4 Siraw dadwaw a pōtot na a mahahakay, ki nangabahay sa so mababakes a Moabita. Orpa iyaw ngaran asaw, kan si Roth iyaw ngaran asaw. Minyan sa do Moab so sigōro asa poho a katawen. 5 Sinpangan na, nadiman si Mahalon kan Kilion. Dawa, si Noemi lang a bālo natokos, ta aran siraw dadwaw a anak na a mahahakay, ki nadiman sa.
No Nakapaybidi ni Noemi kan Roth do Betlehem
6 Do dāwri, do kayan paw ni Noemi do Moab, nadāmag na a si ĀPO, ki binindisyonan na saw tawotawo naw do Joda, ta āro danaw āpit daw. Dawa, nagrobwat si Noemi a komaro do Moab a maybidi do mismo na a tana kontodo siraw dadwaw a manōgang na. 7 Komnaro sa yapo do yanan daw, kan nanakey sa a maybidi do tana a Joda. 8 Ki do kayan daw do rarahan, binata ni Noemi dyirad dadwaw a manōgang na a kāna, “Inyo a anak ko, maybidi kamo na do bōkod nyo a inyapwan. Nolay nyo naw machangay dyaken. Sichangori, si ĀPO pakono mangbindisyon dyinyo do maganayaya a pinarin nyo dyaken a akmas pinarin nyowaw dyirad lalakay nyo saw a nadiman. 9 Si ĀPO pakono manoroh so bindisyon dyinyo tan mirwa kamo a makakabahay kan mangnānam so ragsak do bayo a pamilya nyo.”
Do dāwri, dinadek na sa ni Noemi a pagpakāda na dyira, ki nakalyak sa a tomnanyis dadwaw a manōgang na, 10 kan binata da dya a kon da, “Enggam ānang, machangay kami dyimo a maybidi dyirad kakabagyan mo saw.”
11 Ki initbay ni Noemi a kāna, “Inyo a anak ko, maybidi kamo na. Āngo hahawen nyo an machangay kamo dyaken? Maymanganak ako pawri so mahahakay a tādi dan lalakay nyo saw? 12 On, maybidi kamo na, inyo a anak ko. Aysa, bakbaketan ako naya, kan maparin ako paba mangabahay. Aran myan paw hahawen ko a machoknod sichahep tan maymanganak akos dadwa a mahahakay, 13 mapanaya nyoriw kapaypabaro da? Baywan nyoriw inawan nyo a mirwa a mangabahay? Maparin abaw komwan anak ko. Makpad danaw byay ko kan chakey kwaba matahaman nyo, ta tinadyichokodan na yaken ni ĀPO.”
14 Do dāwri, minirwa dana sa a tomnanyis. Nakatayoka na, dinadek ni Orpa si katogāngan na, as nakapagpakāda na. As si Roth, ki nāw na nachikepkep di katogāngan na. 15 Ki binata ni Noemi dya a kāna, “Chiban pas abīrat mo. Maybidyaya dyirad kakabagyan na saw kan siraw dyos na saw.† 1:15 Mana “do dyos na.” Iyaw dyos dan Moabita, ki Chemos. Nom. 21:29, 1 Āri 11:7 Machonot kabawri dya?”
16 Ki initbay ni Roth a kāna, “Pilīten mwaba yaken a mangkaro dyimo mana maybidi a dya machangay dyimo, mo ānang. Aran dino ngayan mo, machangay ako, as aran dino pagyanan mo, dawriw pagyanan ko. Siraw kakabagyan mo, ki mayparin sanchi a kakabagyan ko, as kan iyaw Dyos mo, ki Dyos ko. 17 Aran dino kadimanan mo, dawrinchiw kadimanan ko, kan dawrinchiw pakaitaneman ko. Si ĀPO pakono mangdōsa dyaken so taywara an ipalōbos ko a myan mapaysyay dyaten malaksid do kadiman ko.”
18 Do nakaboyaw ni Noemi a dyi dana matādyan kapangtokto ni Roth a machangay dya, ninonolay narana.
19 Dawa, siraw nya dadwa a mababakes, ki tinongtong daw nanakey a manda do Betlehem. Do nakapakarapit daw do Betlehem, nasdaāwan tabo a omidi daw, kan sira danaw yanan dangoy da. As siraw mababakes saw do dawri a idi, ki naysin-iiyahes sa a kon da, “Oyodori a iya si Noemi?”
20 Binata ni Noemi dyira a kāna, “Tawagan nyo paba yaken so Noemi, basbāli a tawagan nyo na yaken so Mara,‡ 1:20 No chakey na batahen “Noemi”, ki “magānas”, as no chakey na batahen “Mara”, ki “makpad”. ta iyaw Dyos a Manakabalin do Tābo, ki taywara a pinaypakpad naw byay ko. 21 Do nakakaro ko dya, myan tabo pamilya ko, ki pinaybidi na yaken ni ĀPO kaynaynawan ko na. Āngo ta tawagan nyo pa yaken so Noemi? Si ĀPO, iyaw Dyos a Manakabalin do Tābo, ki pinasabhayan na yaken so taywara a marahmet do byay ko.”
22 Komwan nakapaybidi ni Noemi yapo do tana a Moab, kan nachonot dya si manōgang na a si Roth a Moabita. Do nakapakarapit daw do Betlehem, kasiknan pan kapagāpit da so sebāda.§ 1:22 No plastar no sebāda, ki akmas paray mana trīgo.
*1:1 1:1 No chimpo dan ok-okom, ki sigōro myan 300 a katawen as nakasarono no nakapangitoray ni Āri Saulo a iyaw dāmo a āri no Israel.
†1:15 1:15 Mana “do dyos na.” Iyaw dyos dan Moabita, ki Chemos. Nom. 21:29, 1 Āri 11:7
‡1:20 1:20 No chakey na batahen “Noemi”, ki “magānas”, as no chakey na batahen “Mara”, ki “makpad”.
§1:22 1:22 No plastar no sebāda, ki akmas paray mana trīgo.