22
1 Maganaganay a pidyen mapsek so pakasaritāan kan āro a kinabaknang,
as no pakahwahokan, maganaganay pa kan pirak mana balitok.
2 Abaw paytarkan mababaknang kan mapopobri,
ta si ĀPO, iyaw Namarin sira tabo.* 22:2 Prob. 14:31; 17:5
3 No mangtokto a nainsirīban, maboya naw dilikādo kan machiwlib,
ki no machononot kapangay nas mayam, kan lak-amen nanchi.
4 Iyaw gon-gona no kapakombaba kan kaanyib di ĀPO,
ki kinabaknang, dāyaw, kan maynam a byay.
5 Siraw nōlok kan aridos, myan sa do rarahan no madyīdo a tawo,
ki no mangannad so inawan na, pachibawan na sa.
6 Nanawhen mo adekey do kosto a ayaman na
tan anchan maypatoneng, dichanan naba.
7 No mabaknang, itorayan naw mapopobri,
as no omōtang, mayparin a adīpen no magpaōtang.
8 No maymoha so dya malinteg, makaāpit so didigra,† 22:8 Job 4:8; Gal. 6:7-8
as kan machipanda danaw kapangamomo na.
9 No madādam a tawo, mabindisyonan anchi,
ta mangibinglay so kanen na do mapobri.
10 Boyawen mo mangoy-oyaw, as kan mabo dananchiw kapaydidiman.
On, kapagsosopyat kan kapangiroromen, ki machipanda sanchi.
11 No madaw so kapangtokto a madadas,
as kan mapakombaba a maychirin, sīten anchi ni āri.
12 Iyaw mata ni ĀPO, aywanan naw kapakatoneng,
ki paāyen naw chirin dan dya mapodno.
13 No masadot, batahen na a kāna, “Aryaw lion do gagan!”
mana “Dimanen da yaken do kalkalsāda!”
14 Iyaw dangoy no machikamalāla mabakes, akmay marahem a aridos.
Nyaw karidosan dan tawotawo saw a mapasoli di ĀPO.
15 Gagāngay no adekey a mapilyo,
ki an baōtan mo, makananawo.
16 No mangidadanes so mapobri tan bomaknang,
mana mangsāgot so mabaknang, tod na lang a pomobri.
Siraw Tatdo a Poho a Nainsirīban a Panyinyirin
17 Mangikāso kan mangadngey ka siras chirin dan mamasīrib,
kan ipasnek mo a iktokto iyaw inanawo ko,‡ 22:17 Prob. 2:2
18 ta makahwahok sanchi dyimo an manakem mo,
an nakasagāna sa tabo a ichirin no bibi mo.
19 Inanawo ko nya saya dyimo sichangori,
tan iyaw talek mo, ki nāw na myan di ĀPO.
20 Nangitolas ako so tatdo a poho a panyinyirin a para dyimo.
Siraw nya, ki myan pamagbaga kan kapakatoneng
21 a mangipaboya dyimo so kosto kan oyod,
tan maitoroh mo oyod a atbay dyirad nanoboyaw dyimo.
-1-
22 Takawan mo sabaw mapobri maynamot ta pobri sa,
mana gondāwayan mo sabaw makachita do pangokoman,
23 ta si ĀPO, mangisakit dyira,
as rārayawen na saw mangrārayawaw sira.
-2-
24 Machisīt kaba do masosolihen a tawo,
kan machikayban kaba do makohat so oho,
25 ta āngonchan mananawo mo dadakay naw,
as matolo ka a masdok.
-3-
26 Machiabrasa kaba a imo asa mangisigorādo,
mana machion a mangbāyad so ōtang no matarek.
27 Ta an abo pagbāyad mo,
hapen danchi aran iyaw ichehan mo.
-4-
28 Paydisen mwabaw adan a mohon do sīgodaw a yanan na§ 22:28 Prob. 23:10
a pinangay da pa no kapoonan mo.
-5-
29 Maboya moriw masiglat a maytarabāko?
Magsīrbi anchi dyirad ar-āri, sira abanchiw sinsinan a tawo.