3
No Pamagbaga Dyirad Maychakatobo
1 Anak ko, kawayakan mo sabaw innanawo ko,
basbāli a ipateg mo saw bilbilin ko do pōso mo,
2 ta panarohen danchiw tawtawen mo,
kan marapan anchiw kaganay do byay mo.
3 Pachisyayan mwaba polos kadaw kan kapodno.
Isāryo mo sa a akmay alāhas do lagaw mo,
kan itolas mo sa do pōso mo.
4 An parinen mo komwan, makahwahok anchi
do salapen ni Āpo Dyos kan do tawotawo.
5 Talken mo si ĀPO do tābo kapangtokto mo,
kan machinareng kaba do bōkod mo a kapakaāwat.
6 Bigbigen mo si ĀPO do tābo pariparinen mo,
kan palongohen nanchimo do kosto a rarahan mo.
7 Patohosen mwabaw bōkod mo a kinasīrib,
basbāli a chāmo mo si ĀPO, kan dichanan mo marahet.
8 Nya, ki torohan nanchimo so salon-at,
kan pangyit no tohatohang mo.
9 Padayāwan mo si ĀPO do kapanoroh mo so kinabaknang
kan tabo manōma a kagaganayan a maāpit mo.
10 Tan komwan, mapno sanchiw agāmang mo so āpit mo,
kan maglipyas sanchiw angang mo so palek a bayo.
11 Anak ko, chahanyinyi mwabaw kadisiplīna dyimo ni ĀPO,
kan ipsok mwabaw kapaydabdab na dyimo,
12 ta kostohen na sa ni ĀPO siraw chadaw na
a akmas kakosto no asa āmang so anak a chasoyot na.* 3:12 Heb. 12:5
13 Magāsat tawo a maychichwas so kinasīrib,
as kan iyaw no tawo a makahap so kapakaāwat,
14 ta arwaro kan pirak iyaw mahap do kinasīrib,
as rakorakoh kan balitok iyaw maganansya.
15 Mapatpateg kinasīrib kan alāhas.
Aba polos pachiyengayan na a chakey mo.
16 Maynam a byay itoroh no kinasīrib a yapo do kanawan a tanoro na,
as iyaw kaholi a tanoro na, itoroh naw kinabaknang kan dāyaw.
17 Siraw rarahan na, ki magānas sa,
kan tabo ayayaman na, ki matalna.
18 Kinasīrib, akmay kayo a manoroh so byay† 3:18Gen. 2:9; 3:22; Pal. 2:7; 22:2 do mangrawataw sya,
kan magāsat saw nāw daw a siig-igpet dya.
19 Do kinasīrib na, pinarin ni ĀPO tanaya,
as do kapakaāwat na, pinarin naw kahanyihanyitan.‡ 3:19 Sal. 136:5
20 Do kapakatoneng na, pinaboswang na saw akbod do irahem no tana,§ 3:20Gen. 7:11
kan do kapakatoneng na, myan demdem a nakayapwan apon.
21 Anak ko, kaiigpeten mo kosto a kinasīrib kan kapangilāsin.
Ipalōbos mwaba mabo do kapanyideb mo.
22 Siranchiw nyayaw manoroh so byay mo,
kan akma say arkos do lagaw mo.
23 Tan komwan, abanchiw kaparoparwan no kayam mo,
kan abanchiw pakachichadan mo.
24 An makaycheh ka, abanchiw kāmo mo,
as an maypoktad ka, maīmas anchiw kapaynepdep mo.
25 Chamo mwaba an maychihat a myan didigra
mana an myan karārayaw a mangay dyirad marahet,
26 ta si ĀPO, iyanchiw talken mo
kan mapaditdit so kokod mo do pakasdokan mo.
27 Penpenen mwabaw kasidong dyirad makachitaw
an marawa mo somidong dyira.
28 Ibahey mwaba do karoba mo a kon mo,
“Maybidi kanchi. Manoroh ako nanchi dyimo an delak,”
an maparin mo na itoroh sichangori.
29 Mangipangta kaba so karoba mo
a sitatalek a myan a machisngen dyimo.
30 Machidiman kaba do tawo a abos paynamotan
an abo pinarin na aran āngo a mapaynyin dyimo.
31 Apālan mwabaw maranggas a tawo,
kan tahatahan mwabaw aran āngo a kaparin na,
32 ta si ĀPO, ipsopsok naw tawo a nailabay do dyīdyo,
ki chahwahok na saw malinteg a tawo.
33 No abay ni ĀPO, omyan do pamilya no marahet a tawo,
ki bindisyonan na saw pamilya dan malinteg saw a tawo.
34 Oyawen na saw mangoy-oyaw,
ki mangahwahok dyirad mapakombabaw.
35 Siraw masīrib, ki dāyaw tawīden da,
ki siraw abos arang, pakasnesnekan mahap da.