4
No Jerosalem do Nakatayoka no Nakarārayaw Na
1 Ay, āngwa nakabo no balitok so kasileng na!
Iyaw pōrwaw a balitok, ki naypaposasaw dana!
Siraw masantwanaw a bato, ki naychawpit dana sa
do kāda kanto dan kalkalsāda.
2 Siraw mapategaw a mahahakay no Sion
a magbalor so pōro a balitok do nakarahan,
ki sichangori naibidang dana sa a angang
a pinarin dan kakamay no magdamdamili.
3 Aran siraw bolaw saw a chito,
ki pasosohen da saw anak da.
Ki siraw tawotawo kwaw, nayparin sa a maranggas
a akma saw manomanok a ostrich* 4:3 Iyaw “ostrich,” ki kararakohan a manomanok. An mochoy, ki inonolay naw ochoy na a aran matokapan dan kadwan. Job 39:14-18 do let-ang.
4 No rida no tagībi, ki machidket
do kamanghahanyit na do kawaw na.
As machikakaāsi saw adedekey so kanen da,
ki abaw manoroh dyira.
5 Siraw nagpaspasken a mababaknang,
ki maypiypisipis dana sa so kapteng do kalkalsada.
Siraw naylaylay so mapīno kan mangīna a laylay,
ki maychahel dana sa so maisobo da do basōra.
6 Iyaw kadōsa dan tawotawo ko,
ki mangamangay pa kan kadōsa no tawotawo do Sodoma
a narārayaw do apagripat
a dya polos a pinarin tanoro no tawo.† 4:6 Mana “aba polos tanoro a somnidong sya.”
7 Siraw prinsipi‡ 4:7 “Prinsipi” do Hebreo a chirin, ki “Nasireo” (Nom. 6:1-21; Amos 2:11-12). Iyaw Nasireo, ki napatarek a nayparin a asa torayen. Lam. 1:6 no Jerosalem,
ki abos pakapilāwan a maporporo kan yilo,
as kan maydaydak kan gatas.
No inawan da, ki mabayabaya kan mabaya a lawang.
Mataer sa akmas kapintas no sappiro a mangīna a bato.
8 Ki sichangori, mabahebaheng rōpa daw kan īro.
Mailāsin sa paba do kalkalsāda.
Kominbet danaw kodit da a nachidket do tohang da
a nayangyangan a akmay irotong.
9 Maganaganay dana saw nadimanaw do ispāda
kan siraw madimanaw do kapteng
a komkomyoos so bodek a maronronot
do kabo danan maisobo a yapo do hakawan.
10 Do bōkod a tanoro dan māsisyen a mababakes,
ki napīlit sa a nanglaneg siras mismo a anak da
a pinayparin da sa kanen da
do nakarārayaw dan tawotawo ko.
11 Pinabtak dana ni ĀPO tābo kasoli na.
On, pinado naw kataywara no kasoli na.
Napasdeb so apoy do Sion§ 4:11 Siraw taga Babilonya, ki sinosohan daw Jerosalem. 2 Ār. 25:9
a namatawos siras pondasyon na.
12 Siraw ar-āri do tanaya mana aran sino do lōbongaya
ki anohdan daba a myan makasdep
a aran sino a kakontra mana kabōsor
do rowangan na saw no Jerosalem.* 4:12 Inanohdan dan tawotawo no Dyos a abaw makasākop so Jerosalem a maynamot do kari no Dyos. Sal. 46:5; Isa. 37:35
13 Ki naparin do gatogatos dan propīta na sa
kan do gatogatos dan papādi na.
Ta do irahem dan ahad saw no syodad,
napawyog sa so raya dan malilinteg.
14 Changori midibidi dana sa do kalkalsāda
a akma say nabolsekan.
Do kataywara da a namanchaan so raya dan nadiman,
abaw makaitored a mangsalid so laylay da.† 4:14 Nabaywan saw papādi a mangsalid so bangkay tan nāw da maibidang a madalos. Leb. 21:11
15 Inyagay dan tawotawo dyira a kon da,
“Komaro kamo! Malapos kamo!
Maypateng kamo! Saliden nyo aba yamen!”
Dawa, nayyayo sa kan nayadiyadis do nasnasyon,
ki abaw pinalobōsan da a nachiyan dyira.
16 Si ĀPO a mismo napaychawpit sira.
Bibyangan na sa paba.
Apabaw dāyaw a naitoroh dyirad papādi,
kan apabaw anyib a mangay dyirad panglakayen.
17 Mabkohan danaw mata namen a
a manyidechideb so sidong a dya mawara.
Yapo do paytatalamadan namenaw, boyaen namen
kawara no nasyonaw a dya makaisalākan dyamen.
18 Sipsipotan dan kabōsor siraw garaw namen
tan dyi kami a makayam do kalkalsāda.
Masngen danaw tawsan namen.
Nabidang danaw araw namen. Īto danaw pandan!
19 Siraw manglakat dyamen,
ki malyalisto sa pa kan siraw agila do hanyit.
Linakatan da yamen do katokotokonan,
kan pinanaya da yamen a talahen do let-ang.
20 Iyaw pinidi ni ĀPO a pakayapwan anges namen,
ki natolo dyirad asdok da.
Iniktokto namen a an myan kami do anyino na,
ki machipagyan kami dyirad nasnasyon.
21 Sigi, masoyot kan magragsak ka sichangori,
imom Balāsang no Edom‡ 4:21 Edom, ki myan do abagātan a dayāen no Joda. Siraw taga Edom, ki kapotōtan ni Esaw. Dawa, kaliposan da sa no Israel. Ki do dya, kabōsor da sa no Joda. Sal. 137:7-9; Oba. 1:12 a omyan do tana a Os.
Ki mangay panchi dyimo kopaw no kaokom.
Mabok kanchi, kan mabahasan a silalābos.
22 Komabos anchiw kadōsa mom Balāsang no Sion.
Paybabalay nabanchi ni ĀPO kaakaw mo a sibabahod.
Ki dosāen nanchi imo do gatogatos mom Balāsang no Edom,
kan ipakatoneng nanchiw karahet mo.
*4:3 4:3 Iyaw “ostrich,” ki kararakohan a manomanok. An mochoy, ki inonolay naw ochoy na a aran matokapan dan kadwan. Job 39:14-18
†4:6 4:6 Mana “aba polos tanoro a somnidong sya.”
‡4:7 4:7 “Prinsipi” do Hebreo a chirin, ki “Nasireo” (Nom. 6:1-21; Amos 2:11-12). Iyaw Nasireo, ki napatarek a nayparin a asa torayen. Lam. 1:6
§4:11 4:11 Siraw taga Babilonya, ki sinosohan daw Jerosalem. 2 Ār. 25:9
*4:12 4:12 Inanohdan dan tawotawo no Dyos a abaw makasākop so Jerosalem a maynamot do kari no Dyos. Sal. 46:5; Isa. 37:35
†4:14 4:14 Nabaywan saw papādi a mangsalid so bangkay tan nāw da maibidang a madalos. Leb. 21:11
‡4:21 4:21 Edom, ki myan do abagātan a dayāen no Joda. Siraw taga Edom, ki kapotōtan ni Esaw. Dawa, kaliposan da sa no Israel. Ki do dya, kabōsor da sa no Joda. Sal. 137:7-9; Oba. 1:12