1 Do dāwri, pinirwa dana inpakatoneng ni ĀPO minsāhi na di Jonas, kan binata na a kāna, 2 “Mangay ka do Ninebeh a mabīleg a syodad, as iballāag mo dyirad tawotawo saw daw minsāhi a ipakatoneng ko dyimo.” 3 Nagtongpal si Jonas do inbaheyaw ni ĀPO dya, as kan nangay do Ninebeh. Iyaw Ninebeh, ki marahawa a syodad, ta tatdo a karaw a takeyen iyaw karahawa naw. 4 Do nakapakarapitaw ni Jonas, naychasaryan a minidibidi do syodadaw, as insiknan na inpakatoneng dyira a kāna, “Apat a poho a karaw somiknan sicharaw, ki marārayaw anchiw syodadaya a Ninebeh.”

5 Do dāwri, nanganohed saw taga Ninebeh saw do Dyos. Nangikeddeng sa a magayonar kan maylaylay so makersang a mangipaboya so nakapagbabāwi da. Abaw nahabas yapo do mabigbigbig a mandad abos saad.* 3:5 Mat. 12:41; Lk. 11:32

6 Do nakapakarapitaw no dāmag do āryaw no Ninebeh, nānyeng a gominchin do trono naw, binahas naw laylay naw, nakapaylaylay nas mapayas, as kan nakapaydisna na do ahbek.

7 Do dāwri, inpaipakatoneng naw bilin na dyirad tawotawo saw daw do Ninebeh. Nyaw inkeddeng na a kāna, “No nyaya a bilin, ki yapo do āri kan tabo opisyalis na: Abaw tawo mana binyay a koman so aran āngo. Tabo tawotawo, mairāman bāka kan karniro, ki mabaywan a koman mana minom. 8 Tabo tawotawo, ki machita maylaylay so mapayas. Komwan dyirad binyay saw, ki machita ap-apan sa so mapayas. Machita a igodes daw machikakaāsi no tawotawo saw do Dyos, as kan tadyichokodan daw marahet saw a dadakay da kan karanggas da. 9 Ta aranchi a mabāwan makamwamomwaya kapakasoli no Dyos, as magbāliw aktokto na as dyi narana yaten a dimanen.”

10 Do nakaboyaw no Dyos so pinarin daw kan an maypāngo nakatadyichokod da siras marahet saya dadakay da, nagbāliw aktokto na kan dinōsa na pa saba akmas inranta naw dyira.