1 Myan mahakay a yapo do katokotokonan no Epraim a mayngaran so Mikah. 2 Binata na di ānang na, a kāna, “Nadngey ko nakaabay mwaw so tawowaw a nanakaw dyimo so asa rībo kan asa gasot a pidāso a pirak. Yakenaw nawri a tawo, as aryaw dyaken.”

Binata ni ānang na a kāna, “Si ĀPO pakono mangbindisyon dyimom anak ko!” 3 Do dāwri, pinabidi naw asaw a rībo kan asa gasot a pidāso a pirak di ānang na, binata ni ānang na a kāna, “Itatārek ko pirak kwaya a para di ĀPO a yapo do kakamay ko a para do anak ko tan dya maabay, as mapaparin akonchi so nakitikitan a didyosen kan nachīpo a didyosen.”* 17:3 Eks. 20:4 Pabidyen konchi dyimo.

4 Do nakapabidyaw ni Mikah so pirak di ānang na, inhap ni ānang naw dadwaw a gasot a pidāso a pirak kan intoroh na do manyichipwaw a napayparin sya a didyosen. Napangay didyosenaw do bahay ni Mikah.

5 Iyaw nya mahakay a si Mikah, napatnek so pagdaydayāwan na. Namarin pas laylay no matohosaw a pādi a mayngaran so epod, kan bolto saw a para bahay. Tinongdo naw asaw dyirad pōtot na mahahakay a pinayparin a pādi. 6 Do dāwri a chimpo, abaw āri do Israel. Siraw tabo a tawotawo, pinarin daw aran āngo a ibidang da a kosto.

7 Do dāwri pa a chimpo, myan baro a Lebita a yapo do Betlehem do Joda. 8 Komnaro daw a maychichwas so matarek a pagyanan na. Do kapanakey naw, nakarapit do bahay ni Mikah do katokotokonan no Epraim. 9 Inyahes ni Mikah dya a kāna, “Dino nakayapwan mo?”

Inatbay na a kāna, “Yaken, ki asa Lebita a yapo do Betlehem do Joda. Maychichwas ako so pagyanan.”

10 Binata ni Mikah a kāna, “Na, machiyan ka pa dyaken, ah. Mayparin ka pa a mamagbaga† 17:10 Do chirin Hebreo, ki “āmang”. kan pādi ko, as torohan koymo so asa poho a pidāso a pirak do kāda tawen, ikhang, kan kanen mo.” 11 Nachi-on iyaw barwaw a Lebita a machiyan dya, kan nayparin a akmay asa dyirad pōtot naw a mahahakay. 12 Pinatnek ni Mikah iyaw Lebitaw a nayparin a pādi na. Minyan iyaw Lebitaw do bahay ni Mikah. 13 Binata ni Mikah a kāna, “Changori, chapatak ko na a parinen anchi ni ĀPO maganay dyaken, ta myan dyaken asa Lebita a pādi ko.”