1 Si Abimelek a pōtot ni Jerobbaal, nangay do Sikem dyirad kakabagyan ni ānang na. Binata na dyira kan tābo partīdos ni ānang na a 2 iyahes da do salapen dan tābo panglakayenaw do Sikem* 9:2 Mana “dyirad tabo tawotawo do Sikem”. a kon da, “Āngo chakakey nyo? Kaitoray da dyinyo no papito saw a poho a pōtot ni Jerobbaal, mana asa lang a tawo? Naknakmen nyo a yaken, ki yapo do tohang kan asi nyo.”

3 Siraw kakabagyanaw ni ānang na, ki siraw pinakainawan na a nangibahey so inchirin naw dyirad panglakayenaw do Sikem. As siraw panglakayenaw, pinipya da a inonotan si Abimelek, ta binata da a kon da, “Iya, ta.” 4 Intoroh da dyaw papitwaw a poho a kapidāso a pirak a yapo do timplo ni Baal-berit. Inosar ni Abimelek pirakaw a pinanangdan so siras napawnot naw a abos sirsīrbi kan tarantādo. 5 Nangay do bahay ni āmang na do Oprah, as dawri do hapotaw no asa bato, diniman na saw papito a poho a kakakteh na a mahahakay a siraw pōtotaw ni Jerobbaal. Ki nadiman aba si Jotam a boridek a pōtot ni Jerobbaal, ta tomnayo. 6 Sinpangan na, naychichipeh sa tābo panglakayenaw a yapo do Sikem kan Bet-millo, as nangay sa do yananaw a masantwan a logo a kayo do Sikem.† 9:6 Gen. 35:4 Dawriw pinayparinan da āri si Abimelek.

7 Do nakadāmagaw so nya ni Jotam, somnonget do tōtokaw no Tokon a Gerisim, as nakaingēngey na sya dyira a kāna, “Adngeyen nyo yaken, inyo a panglakayen Sikem, tan adngeyen inyo no Dyos. 8 Do naypisa, nangay saw kayokayowaw a mamidi so āri a para dyira. Binata da do olibwaw a kayo a kon da, ‘Magāri ka dyamen.’

9 “Ki binata no olibwaw a kayo dyira a kāna, ‘Namna, penpenen koriw mamarin so lana a maosar a pammadāyaw dyirad dyos saw kan tawotawo tan itorayan ko saw kayokayo? Pī!’

10 “Somarono, binata dan kayokaywaw do igosaw a kayo a kon da, ‘Ngay, may ka magāri dyamen.’

11 “Ki inatbay san igosaw a kayo dyira a kāna, ‘Aysa, mayhāt ako nawri a omsi so maganay kan matami saw a asi ah, tan itorayan ko saw kayokayo? Pī!’

12 “Somarono, binata dan kayokaywaw do ōbasaw a kon da, ‘Ngay, may ka magāri dyamen.’

13 “Ki initbay no ōbasaw dyira a kāna, ‘Ayya, ibhes koriw mamarin so palek a mapasoyot siras dyos saw kan tawotawo, tan itorayan ko saw kayokayo? Pī!’

14 “Dawa, binata dan tabo kayokayo saw do kamanadyitaw a kon da, ‘Ngay, imo paw mangay a magāri dyamen.’

15 “Initbay no kamanadyitaw dyirad kayokayowaw a kāna, ‘An oyod a chakey nyo yaken a mayparin a āri nyo, may kamo a machikāmang do abongan kwaya. Ki an chaskeh nyo, gomilāyab pakono kamanadyitaya, as sosohan na saw sidro a kayokayo do Lebanon.’ ”

16 Tinongtong ni Jotam a kāna, “Changori, oyod kamo paro a mapodno kan madāyaw do nakapatnek nyowaya si Abimelek a āri? Masingpet kamori di Jerobbaal kan pamilya na, kan pinarin nyoriw maikari dya? 17 Ta si āmang ko, nachigobat a para dyinyo. Inposta naw byay na a nangisalākan dyinyo dyirad Midyanita. 18 Ki changori, nachiribīldi kamo na do pamilya ni āmang ko. Diniman nyo sawen papito saw a poho a mahahakay a pōtot na do asaw a bato, as kan pinatnek nyo si Abimelek a anak no binaket naw a kasidong a āri no Sikem, ta nyo. 19 Na, an mapodno kan madāyaw kaparin nyo sichangori dyirad Jerobbaal kan pamilya na, chasoyot nyo pakono si Abimelek kan chasoyot na pakono inyo. 20 Ki an dya komwan, mohtot pakono apoy yapo do Abimelek, as sosohan na saw panglakayenaw no Sikem kan Bet-millo. Mohtot pakono paw apoy yapo do panglakayenaw no Sikem kan Bet-millo, as sosohan das Abimelek!” 21 Do dāwri, nagtālaw si Jotam a nayyayo do Beer kan minyan daw, ta chamo naw kakteh naw a si Abimelek.

22 Nagtoray si Abimeleck do Israel so tatdo a katawen. 23 Sinpangan na, nanoboy Dyos so marahet a ispirito a mapaysyay sa Abimelek kan siraw panglakayenaw no Sikem, kan linipotan sa di Abimelek. 24 Nyaw naparin tan iyaw karanggasaw a pinarin dad papito saw a poho a pōtot ni Jerobbaal, ki machibahes di Abimelek a kakteh da a nangdiman sira kan siraw panglakayenaw no Sikem a napatoretored dya. 25 Do kaipsok daw di Abimelek, siraw panglakayenaw no Sikem, nanoboy sa so mahahakay do tōtok saw no tokotokon‡ 9:25 Tokon a Gerisim kan Tokon a Ebal. a mangsaneb sya, kan takawan daw aran sino a homabas. Ki naipadāmag nya di Abimelek.

26 Do dāwri, nayadis si Gaal a pōtot ni Ebed do Sikem kontodo siraw kakakteh naw a mahakay, kan tinalek da no panglakayenaw do Sikem. 27 Asa karaw, nangay saw tawotawo do kaobāsanaw a mamolas so ōbas, as pinayparin daw ōbasaw a palek, as kan nagpista sa do irahemaw no timplo no dyos da.§ 9:27Timplo no Baal-berit. Do kayan daw a koman kan minom, inabay da si Abimelek. 28 Binata ni Gaal a pōtot ni Ebed a kāna, “Namna, sino si Abimelek, kan sino ta a Sikem ta dawa, magsīrbi ta dya? Nagsīrbi abawriw pōtot ni Jerobbaal kan Sebol a opisyal na dyirad tawotawo ni Hamor a āmang ni Sikem?* 9:28 Gen. 33:19; 34 On, āngo ngarod ta magsīrbi ta di Abimelek? 29 Aysa, an yaken sawen mangitoray dyirad dya saya tawotawo, pakarohen ko si Abimelek. Ibahey ko dya a kon ko, ‘Pārohen mo bōyot mo, as may ka machigobat, ah!’ ”

30 Do nakadngeyaw ni Sebol a iyaw torayen do idyaw so inchirinaw ni Gaal a pōtot ni Ebed, komnohat a nakasoli. 31 Sililimed a nanoboy siras tobotoboyenaw di Abimelek do Aromah† 9:31 Ok. 9:41 a kāna, “Si Gaal a pōtot ni Ebed kan siraw kakakteh naw a mahakay, ki nangay sa do Sikem kan mangpaklaklal sa siras omidyaw a magribīldi dyimo. 32 Dawa, anchan mahep, may ka kan tawo mo saw a magdāan a magsaneb do bengkag saw. 33 Anchan maysesēdang an delak, maybangon kamo kan raoten nyo idyaw. Anchan mohtot si Gaal kan tawo na saw a machigobat dyinyo, parinen nyo aran āngo a chakey nyo dyira.”

34 Dawa, nangay sa Abimelek kan tabo tawo na saw do kamahep do masngenaw do Sikem. Dinaānan da sa saneben, kan pinaychapat daw bonggoy da. 35 Do nakaboyaw ni Abimelek kan tawo na saw si Gaal a pōtot ni Ebed a minohtot kan naytēnek do rowanganaw no idi, nayhohtot sa do tinaywan daw. 36 Do nakaboyaw sira ni Gaal, binata na di Sebol a kāna, “Chiban pa! Tori sayaw tawotawo a mosok do tōtok sayan tokotokon!”

Ki tinbay ni Sebol a kāna, “Aysa, maboya mwaya anyino dan tokotokon sayaw akmayay tawotawo.”

37 Ki minirwa a naychirin si Gaal a kāna, “Chiban pa! Tori sabaw tawotawo a mosok do bakrang naya no tokotokon, kan asaya bonggoy yapo do rarahanaw a mamangket do logo a kayo no manalādo saw?”

38 Sinpangan na, binata ni Sebol dya a kāna, “Asyo pangas mwaw? Imo abawriw nakabataw a, ‘Namna, sino si Abimelek ta dawa, magsīrbi ta dya?’ Sirabawriw tawotawowaw a indadanes mo? Changori, mohtot ka pa machigobat dyira!”

39 Dawa, indaōlwan ni Gaal saw mahahakayaw no Sikem a minohtot kan nachigobat sa di Abimelek. 40 Linakatan ni Abimelek si Gaal. Do nakapagsonod daw no taga Sikem, āro naychalbalba a nabigaran a mandad rowanganaw no idi. 41 Naybidi si Abimelek a minyan do Aromah. As si Sebol, pinaksyat na si Gaal kan siraw kakakteh naw do Sikem.

42 Do somnaronwaw a araw, siraw tawotawowaw no Sikem, ki nangay sa do bengkag saw. Do nakadāmagaw syay ni Abimelek, 43 inhap naw tawo na saw, as nakapaychakarwa na sira do tatdo a bonggoy, as nakapagdāan da do bengkagaw. Do nakaboya naw siras tawotawowaw a mohtot do idi, nayhohtot sa kan diniman da sa. 44 Sa Abimelek kan bonggoy naw in-godes daw nayyayo a nangay a nagbantay do asdepanaw do rowanganaw no idi. As siraw dadwaw a bonggoy, rinaot da sa tabo tawotawowaw do bengkag saw kan diniman da sa. 45 Naychasaryan sa Abimelek a nachigobat dyirad omidyaw do Sikem a mandad nakasākop kan nakadiman da siras tawotawowaw daw. Rinakrak ni Abimelek iyaw idyaw kan winarisan na so asin.‡ 9:45 No chakey na batahen, ki nāw na narakrak.

46 Do nakadāmag daw sya tabo no panglakayenaw no Pagwanawanan no Sikem, somindep sa a nachikāmang do kōtaw no timplo no Baal-berit.§ 9:46 Iyaw nya timplo, ki 32 kamitro so kanaro kan 28 kamitro so kawbong, kan myan bato a dyindyin na a 5 kamitro so katokpoh. 47 Naipadāmag di Abimelek a siraw panglakayenaw no Pagwanawananaw no Sikem, ki naychipeh sa daw. 48 Dawa, somnonget sa kontodo tabo tawo na saw do Tokon a Salmon. Nanghap so wasay, as nangwasay so sangasanga, kan insabhay na. Do dāwri, inmandar na dyirad bōyot na saw a alistwan da toladen iyaw pinarin naw. 49 Dawa, kāda asa dyirad tawo naw, ki tinolad da si Abimelek do nakapanongeh daw so sangasanga. Katayoka na, inopo da a pinanareng do dyindyinaw no kōta, as nakasilmot da sya. Dawa, nadiman saw tabo tawotawo do irahem no Pagwanawanan no Sikem. No bidang da a nadiman daw, ki makalo a asa rībo a mahahakay kan mababakes.

50 Katayoka nya, nangay sa Abimelek do Tebes. Dinibon da, as nakasākop das idyaw. 51 Ki do irahem no nawri a idi, myan mahnyi a pagwanawanan. Dawriw nagkamītan dan tabo mahahakay, mababakes kan panglakayen. Intolbek da do irahem, as nakangay da do tohos do yananaw no atep. 52 Nangay si Abimelek do pagwanawananaw a nangdarop sira. Ki do nakapaypasngen do asdepanaw no pagwanawanan tan sosohan na, 53 inasday no asaw a mabakes iyaw bakesaw no gilingan, as nanaho iyaw ohwaw ni Abimelek kan napsaw yanga naw.* 9:53 2 Sam. 11:21

54 Inalistwan na a tinawagan iyaw barwaw a taga-sahabit so armas naw, as nakaimandar na sya dya a kāna, “Asōten mo ispāda mwaya, as kadiman mo dyaken tan dyi danchi a ibahey a kon da, ‘Mabakes iyaw makadiman sya.’ ” Dawa, binagkong no barwaw, kan nadiman si Abimelek.

55 Do nakaboya daw no Israelitaw a nadiman dana si Abimelek, somnabat dana sa tabo. 56 Komwan nakabahes no Dyos di Abimelek do marahetaw a pinarin na di āmang na do nakapangdiman naw siras papitwaw a poho a kakakteh na. 57 Pinadidiwan pa no Dyos siraw tawotawowaw no Sikem so tabo karahet da do mismo a inawan da. Natongpal dyira iyaw abayaw ni Jotam a pōtot ni Jerobbaal.