1 Masāpa do somaronwaw a araw, si Jerobbaal a si Gideon kan tabo saw bōyot naw, naybangon kan nangay sa a nagkampo do payisaw no akbod a Harod. As iyaw kampo dan Midyanitaw, ki myan do payahosonganaw a ammyānanen da kan masngen do paytokonan a More.

2 Nachisisirin si ĀPO di Gideon a kāna, “Taywaraya so kāro mahahakayaya a myan dyimo a osaren ko a pangiparawat siras Midyanitaw dyimo. Āngwan ipangas danchi dyaken no Israelita a naisalākan sa do bōkod da a ayit. 3 Ibahey mo dyirad mahahakayaya a kon mo, ‘Aran sino a mamirpir do kāmo na, maparin naw somabat kan komaro do dya Tokon a Gilead.’ ” Dawa, komnaro dadwa poho kan dadwa rībo a mahahakay, as asa poho dana rībo nabidin.

4 Ki nachisisirin dana si ĀPO di Gideon a kāna, “Ari sa paya āro mahahakayaya dyimo. Yosok mo sa do yanan ranom, kan sagāten ko sa daw a para dyimo. An ibahey ko dyimo a ‘Iyaw nya tawo, machangay dyimo,’ iyaw mangay. Ki an ibahey ko a ‘Dya machangay nya tawo dyimo,’ mangay aba.” 5 Dawa, inyosok san Gideon mahahakayaw do yanan ranom. Nachisisirin si ĀPO di Gideon a kāna, “Patawahen mo sa tabo nanokongayas ranom do kakamay da, as nakatapotapos da sya ininom a akmay chito dyirad tabo maydogodaya a minom.” 6 Tatdo a gasot dyiraw nanokong a minom so ranom do kakamay da. Sira tabo kadwanaw, indogod daw mininom.

7 Nachisisirin dana si ĀPO di Gideon a kāna, “Siraw tatdwaya gasot a nanokong do kakamay daw, osaren ko a mangisalākan dyinyo kan iparawat ko sanchiw Midyanitaw dyimo. Palobōsan mo na sa tabo kadwanaya a somabat.” 8 Dawa, pinasabat ni Gideon saw tabo a Israelita, malaksid dyirad tatdwaw a gasot, as inpapatokos na do nabidin saw tābo no bahon kan trompīta.

Changori, iyaw kampo dan Midyanitaw, ki myan sa do ahbo naw do payahosonganaw. 9 Do dāwri a ahep, inmandar ni ĀPO di Gideon a kāna, “Maybangon ka, raoten mo naw kampo daya, ta iparawat ko na sa dyimo. 10 Ki an chamo mo sa raoten, apen mos Porah a magsirsīrbi dyimo, as kawsok nyo do kampo daw. 11 Madngey monchiw kapagsasarīta da, as maypayit anchiw aktokto mo a mangraot sira.” Do dāwri, minosok si Gideon kan Porah a magsirsīrbi dya do payisaw no kampo a masngen dyirad magbanbantayaw. 12 Siraw Midyanita, Amalekita, kan siraw taga dāyaw, myan sa do payahosonganaw a akmay matokpoh a pangen no kabaga. As mabidangan sabaw kamilyo da, ta akmas kāron anayaw do kanayan.

13 Do nakawaraw ni Gideon, nadngey naw asaw a mahakay a madāma na ibahey tayēnep naw do rārayay naw. Binata na a kāna, “Tinayēnep kwaw a myan asa kamemeh a tināpay a sebāda, ki nabadede a somindep do kampwayan Midyanita. Dinongpar naw so mayit toldaw, ki nabahangswaw kan nakatatāpyaw a narakrak.”

14 Inatbay no rārayay naw a kāna, “Aysa! Abaw matarek a chakey na batahen ah, an dya iyaw ispādaw ni Gideon a pōtot ni Joash a asa Israelita. Inparawat dana sawen ni Āpo Dyos Midyanita kan tabo bōyot da dya!”

15 Do nakadngeyaw ni Gideon so tinayēnep naw kan iyaw chakey naw a batahen, naydogod a nagdāyaw di ĀPO. Sinpangan na, naybidi do kampo daw no Israelita, kan inngēngey na, “Maybangon kamo! Ta si ĀPO, inparawat narana sa dyinyo Midyanitaw.” 16 Pinaychatdo ni Gideon saw tatdwaw a gasot a mahahakay a binīngay, as pinenged na sa so trompīta kan angang a soho lang myan do irahem.

17 Binata na dyira a kāna, “Chiban nyo yaken, as tolāden nyo yaken. Anchan makarapit ako do payisaw no kampo da, parinen nyo akmas parinen kwaw. 18 Anchan alopan ko kan tabo rārayay ko sayaw trompīta namen saw, alopan nyo sanchiw trompīta nyowaw do omdibonaw no kampo, kan iyagay nyonchi a kon nyo, ‘Para di ĀPO kan para di Gideon!’ ”

19 Si Gideon kan siraw asaw a gasot a myan dya, nakarapit sa do payisaw no kampo sakbay no kaabak no mahep, do katatayoka daw a naytatādi no magbanbantay saw. Inalopan daw trompīta da saw, kan inapsa daw angang da saw a inigpet da. 20 Siraw tatdwaw a bonggoy, inalopan da saw trompīta daw, kan inapsa daw angang da saw. Kinemkeman da sa tabo soho daw do kaholyaw a kakamay da, inigpet da do kawananaw a kakamay daw trompītaw alopan da, as kan inyagagay da a kon da, “Ispāda a para di ĀPO kan para di Gideon!” 21 Ranan a naytēnek no kāda mahakay ni Gideon do naikeddengaw a yanan na do omdibonaw no kampo, nayyayo dana sa tabo Midyanitaw a mangagagay do kāmo da. 22 Do nakaalop daw no tatdwaw a gasot so trompīta daw, pinaglalaban sa ni ĀPO do ispāda daw siraw tabo kabōsor da saw. Nayyayo saw kabōsor daw a manda do Bet-sitta a lomongo do Serera a manda do pachipandan no Abel-mehola a masngen do Tabbat. 23 Do dāwri, siraw Israelitaw a yapo do trībo no Naptali, Aser, kan tabo Manasses, ki natawagan sa, kan linakatan da saw Midyanitaw. 24 Tinoboy ni Gideon tobotoboyen na saw a mangay do intīro a katokotokonan no Epraim a mangibahey dyira a kāna, “Mosok kamo a manggobat siras Midyanitaw, kan balaten nyo sa do Oksong Jordan kan do dedēkey saw a ok-oksong a manda do Bet-bara tan dyi sa makapamtang.” Dawa, sira tabo mahahakayaw no trībo no Epraim, ki natawagan sa, as sinākop daw Oksongaw a Jordan kan siraw dedēkayaw a ok-oksong a manda do Bet-bara. 25 Tiniliw da saw dadwaw a pangpangōlo dan Midyanita a sa Oreb kan Seeb. Diniman da si Oreb do bato a mayngaran so Oreb, as diniman da si Seeb do pamīsanaw so ōbas a mayngaran so Seeb. Tinongtong daw nanglakat siras Midyanitaw, as inyangay daw ohwaw ni Oreb kan Seeb di Gideon a myan do kabtangaw no Oksong Jordan.