8
Si Jesos, Katotohosan a Pādi Ta do Bayo a Tōlag
1 No pontos no chakey namen a ibahey dyinyo sichangori, ki iyaw nya: Ari dana dyaten Katotohosanaw a Pādi ta, kan ari a maydisna do mangket do kawanan no tronwaw no Dyos no Katatan-okanaw a Āri do hanyit a machipagtoray dya. 2 Ari daw a mangtongpal so rebbeng no katotohosanaw a pādi do salapen no Dyos do oyod a yanan a pagdayāwan so Dyos. As no pagdāyawanaya, ki pinatnek no Dyos a mismo, kan tawo abaw napatnek sya.* 8:2 No bata na do chirin Griego, ki “tabirnakolo” mana “tolda.” Eks. 25-27; Heb. 9:1-7
3 Kāda katotohosan a pādi do dya tana, ki natongdo a manoroh di Āpo Dyos so dāton daw a binyay kan siraw kadwan a rigālo dan tawotawo tan mapakawan dana sa. As dawa, nyaw paynamotanaya a machita a myan dāton ni Jesos a Katotohosan a Pādi ta. 4 Amnan myan pa sawen si Jesos do tanaya, ayket, makapagpādi aba, ta ari sayaw sīgod a papādi a mangidāton so binyay daya sigon do binata naw do linteg. 5 Ta iyaw kapagsīrbi daya a kinapadi, ki ladāwan kan anyino lang no myanaya do hanyit. Ta aran si Moyses do kaychowa do sakbay naw a mapatnek so pagdayāwan da a tabirnakolo, ki inbilin ni Āpo Dyos dya a kāna, “Annadan mo tan maparin mo iyaw pormaw a akmas naipaboyaw dyimo do tokon.”† 8:5 Eks. 25:9, 40; 26:30; 27:8 6 Iyaw kapagsīrbyaw a rinawat ni Āpo Jesos, ki maganaganay pa adayo kan iyaw kapagsīrbyaw no sīgodaw a papādi do tanaya a maynamot ta si Jesos danaw mangpasigorādo so bayowaw a tōlag a inpākat ni Āpo Dyos dyirad tawotawo. Iyaw nyaya bayo a tōlag, ki naibasar do matarek kan mayīyit a kari kan iyaw adanaw.
7 Ta an abo sawen pagkorāngan no nanmaw a tōlag, sigorādo a machita pabaw katādi na. 8 Ki machita maynamot ta myan kōrang no kapanganohed dan tawotawo. Dawa, binata no Dyos do naitolasaw do Masantwan a Tolas a kāna,
“Ītonchiw araw a kapamarin kos bayo a tōlag
dyirad tawotawo saya do Israel kan siraw kapotōtan Jodah.
9 Ki akma pabanchi so nakapachitōlag kwaw
dyirad kapoonan da saw
do arawaw a nakaisongsong ko sira a inkaro do Egipto.
Tinongpal dabaw kapachitōlag ko dyira.
As dawa, ninonolay ko sa, kānan Āpo.
10 Komwan anchiw bayo a kapachitōlag ko dyirad tawotawo saw do Israel.
Ta do katayoka anchi no nawri sa a araw,
ki kapyahen ko sanchiw linteg ko do aktokto da,
kan itolas ko sanchi do pōso da tan dyi da sa mawayakan.
Yaken anchiw Dyos da a dayāwen da,
as kan ibidang ko sanchi a tawotawo ko.
11 Machita pabanchi a manginanawo sa so kaidyan da
mana mangibahebahey dyirad kakakteh da sa so maynamot do kapatak so Dyos,
ta chapatak darananchi yaken a tabo,
somiknan do kabobodisan so sīrib a mandan kasisirīban.
12 Pakawanen ko sanchi do marahet saya a kaparin da,
kan nakmen ko pa sabanchiw gatogatos da dyaken.”‡ 8:12 Jer. 31:31-34
13 Iyaw no nakapaychirinaya no Dyos a maynamot do bayowaya a nakapachitōlag na, ki inbidang narana adan nanmaw. As no chakey na batahen omnadan, ki machita matadyan, ta apabaw sinpaspangan na kan īto danaw kabo na.