1 Katayoka da a komninan, inbilin ni Jose do talkenaw a mangaywan do bahay naw a kāna, “Apnohen mo tabo iyaw kostal daya no makakaktehaya so irek mandan mapno sa, as kapirwa mo a mapabidi so kwarta da saw do hapotaw no irek do irahemaw no kostal da. 2 Pangayen mo paw bāso kwaw a nasokog do pirak do hapotaw no irek do kostalaw no kaadedekeyan daw kontodo kwarta naw a igātang na so irek.” Pinarin no talkenaw iyaw inbilinaw ni Jose dya.

3 Do kapaysesēdang naranaw, napalobōsan dana saw makakaktehaw a maybidi kontodo asno da saw a komwan do yanan da. 4 Dyi pa sa makabawa do syodadaw, as nakabilin ni Jose so talkenaw a mangaywan do bahay naw a kāna, “Malisto ka, ta lakatan mo saw tawo saw a taga Kanaan. Anchan madas mo sa, nyanchiw ibahey mo a kon mo, ‘Āngo ta marahet inbahes nyos maganayaw a kapadagos namen dyinyo? 5 Āngo ta tinakaw nyo iyaw pirakaw a bāso ni āmo ko a bayobaywan na a inoman?* 44:5 Do Hebreo a manyoskripto, abaw chirin a “Āngo ta tinakaw nyo iyaw pirakaw a bāso ni āmo ko?” Nawri a bāso, ki osaren na pa a pangsomar.† 44:5 No dān da a kaosar so bāso mana sabak a pangsomar, ki padohen daw ranomaw do bāso. Somarono, mapado sa so dēkey a lana. No plastaraw a naboya da do hapot no ranom, ki nawriw pangipadto da an āngo mapariparin do masakbayan. Marahmet nyaya a pinarin nyo a maikontra do linteg namen!’ ”

6 Do nakadas daw sira no talkenaw, inbahey naw nawri a inbilin ni Jose. 7 Ki tominbay sa a kon da, “Āngo ta komwan ibahey mo, mo āpo namen? Aysa! Mabawa do aktokto namen a tobotoboyen mo a dyi namen a parinen komwan! 8 Chapatak mo a pinabidi namen dyimo kwartaw a naboya namen do irahemaw no kostal namen saw a pinakayapo namen do Kanaan nawri. Manakaw kami pawri so pirak mana balitok do bahay ni āmo mo? 9 Imom āpo, aran sino dyamen iyaw pakaboyan mo so nawri a bāso a inbahey mo, maparin a dimanen mo. As yamen a nabidin, mayparin kami a tabo a adīpen nyo.”

10 “Naon,” initbay no talkenaw dyira. “Aran komwan bata nyo, ki iyaw pakaboyan ko so bāso, iya lang mayparin a adīpen ko, as libri a komaro danaw kadwan.”

11 Do dāwri, kinalyalisto da no kāda asa dyira a pinagchin kostal da saw, as nakaiwang da sira. 12 Kinapya no talkenaw a chinichwas do kostal da saw, kan pinakayapo nad katotonnganaw a mandad kaadedekeyanaw. Do dāwri, naboya naw bāswaw do kostalaw ni Benhamin. 13 Do kaboya daw sya no makakaktehaw, pinirit daw laylay da a maynamot do oltimo a kamamayo da. Pinirwa da a pinasakay kostal da saw, as nakapaybidi da do syodadaw.

14 Do kawara daw da Joda kan siraw kakakteh naw do bahay ni Jose, abo paw nangayan Jose. Nanyeng sa naycharorōkob do tana a mangipaboya so kapagdāyaw da dya. 15 Binata ni Jose dyira a kāna, “Āngo nyaya pinarin nyo? Chapatak nyo abawri a myan panakabalin ko a mangsomar so pinarin nyowaw.”

16 Tominbay si Joda a kāna, “Āngo maparin namen a ibahey dyimo, mo āpo ko? Āngo chirinen namen dyimo? Māngo kailawlawag namen sya a dyi namen a tinakaw bāso mwaw? Ayya! Si Āpo Dyos mangdōsa dyamen a tobotoboyen mo do nakagatosan namenaya! Dawa, cha kami dya a mayparin a adīpen mo mairāman iyaw nakaboyan daya so bāso mwaw.”

17 Do dāwri, binata ni Jose dyira a kāna, “Engga! Chakey kwabaw komwan! Iyaw nakaboyan daya so bāso, iya lang mayparin a adīpen ko. As inyo a kadwan, ki maybidi kamo di āmang nyo, ta abaw pakaan-anwan nyo.”

18 Do dāwri, naypasngen si Joda do salapenaw ni Jose, as binata na a kāna, “Chāsi mo pa yaken, mo āpo ko, ta torohan mo pa yaken a tobotoboyen mo so dēkey a chimpo a maychirin. Isoli mwaba yaken a maynamot do dyaya a aran matan-ok ka a akmas Paraon mismo. 19 Imom āpo ko, do nakarahan, inyahes mo dyamen a tobotoboyen mo an myan pas āmang mana kakteh namen a mahakay. 20 Ki inatbay namen imo a myan paw āmang namen a malkem dana kan ādi namen a mahakay a naiyanak do kamalkem dana ni āmang namen. Iya danaw sibibyay a anak ni ānang na, ta nadiman danaw ākang naw, as oltimo a chadaw ni āmang namen. 21 Sinpangan na, inbahey mwaw do kachwaw a ahapen namen do salapen mo iyaw ādi namenaya tan maboya mo. 22 As initbay namenaw dyimo mo āpo ko a maparin aba a karwan no adekeyayaw āmang namenaw, ta an komaro, ki madiman si āmang namen. 23 Sinpangan na, inbahey mwaw dyamen a tobotoboyen mo a mapaboya kami aba mirwa dyimo an abo iyaw boridekaw a kakteh namen.”

24 Binata pa ni Joda di Jose a kāna, “Do nakapaybidi namenaw do yananaw ni āmang namen a tobotoboyen mo, inchirin namen iyaw inbahey mwaw. 25 As do kadēkey danaw no kanen namen, tinoboy narana yamen a mirwa a mangay dya a gomātang so kanen namen. 26 Ki inbahey namen dya a makangay kami aba an abo si Benhamin a boridek a kakteh namen, ta maparin aba a mapaboya kami dyimo, an dyi a monot dyamen.

27 “Do dāwri, binata dyamen ni āmang a kāna, ‘Chapatak nyo a dadwa lang iyaw anak namen kan Rakel a baket ko. 28 Arabaw asaw dyaken, kan akmas binata kwaw a sigorādo a pinisapisang no maranggas a animal, as kan naboyak paba nakayapo do dāwri. 29 An ikaro nyo paw ādi nyowaya, as myan marahet a maparin dya, inyo manoroh so kapagmamayo ko a pakayapwan kadimanan ko, ta taywara malkem ako na.’ Nawriw binata ni āmang.”

30-31 Sinpangan na, tinongtong ni Joda a kāna, “Changori, mo āpo ko, an maybidi kami di āmang a tobotoboyen mo, as tokosen namen ādi namenaya, as dya maboya ni āmang namen, sigorādo a madiman. Ta iyaw nyaya adekey, nachitapangan byay na. An komwan, yamen a tobotoboyen mo manoroh anchi so kapagmamayo ni āmang a pakayapwan kadimanan na, ta taywara danaw kamalkem na. 32 Asa pa, inkari kwaw di āmang a yaken mangatbay kan makatoneng do byay no ādi namenaya. Inbahey kwaw dya a an dyi kwa mapabidiw ādi namenaya dya, ki yaken mapagatos a abos pandan.

33 “Dawa, mo āpo ko, aran yaken dana tobotoboyen mo mabidin, ta yaken danaw machitādi di ādi ko a mayparin a adīpen mo. Palobōsan mo pakono ādi namenaya a machipaybidi do aākang na saya. 34 Maypāngo kapaybidi ko di āmang ko an abo ādi namenaya? Maitored kwaba chiban nyaya kalala a maparin di āmang.” Nawriw binata ni Joda.