1 Nyaw pakasaritāan dan kapotōtan saw ni Esaw. No matarek a ngaran na, ki Edom.* 36:1 Gen. 25:30 2 Nangabahay si Esaw so dadwa a mababakes a taga Kanaan a si Ada a pōtot ni Elon a Heteo a tawo, kan si Oholibama a pōtot ni Ana a pōtot ni Sibeon a Hibeo a tawo. 3 Nangabahay pa di Basemat a ādi ni Nebayot† 36:3 Gen. 25:13; 28:9 no mahakayaw a pōtot ni Ismael. 4 Si Elipas, ki anak ni Esaw kan Ada. As si Rewel, ki inyanak ni Basemat. 5 As inyanak ni Oholibama sa Jeos, Jaalam, kan Kora. Siraw nyaw pōtot ni Esaw a nayanak do Kanaan.

6 Do dāwri, inhap ni Esaw siraw babbaket na saw, pōtot na saw, tabo tawotawo na sa do kapamilyaan na, tabo binyay kan kadwan a animal na, as kan tabo a warawara na a inakpeh na do Kanaan, as nachisyay di Jakob a ādi na, kan nangay do matarek a tana. 7 On, komnaro sa Esaw daw, ta malidyatan sa mayrapa do asa yanan do taywara a kāro no binyay da Esaw kan Jakob, as kan manawob pabaw nawri a tana a pamakanan da siras binyay da saw. 8 Dawa, nangay si Esaw mana Edom do katokotokonanaw no Seir.

9 Nyaw pakasaritāan dan kapotōtan saw ni Esaw a kapoonan dan Edomita saw a tawotawo a minyan do katokotokonanaw no Seir. 10 Siraw nyaw pōtot a mahahakay ni Esaw: si Elipas a anak ni Ada a baket ni Esaw, kan si Rewel a anak ni Basemat a baket pa ni Esaw. 11 Myan saw dadima mahahakay a pōtot ni Elipas: sa Teman, Omar, Sepo, Gatam, kan Kenas. 12 Myan paw pōtot ni Elipas a mahakay a mayngaran so Amalek di Timna a minabakes na. Siraw nyaw apoko da mahahakay da Ada kan Esaw. 13 Myan saw apat a mahahakay a pōtot ni Rewel, ki sa Nahat, Sera, Sammah, kan Missa. Siraw nyaw apoko a mahahakay da Basemat kan Esaw.

14 Myan saw tatdwa anak a mahahakay da Esaw kan Oholibama a sa Jeos, Jaalam, kan Kora. Si Oholibama, ki pōtot ni Ana a pōtot ni Sibeon.

15 Siraw nyaw pangpangōlo dan partīdos da a yapo do mahahakay a kapotōtan ni Esaw: Si Elipas, matoneng a mahakay a pōtot ni Esaw, kan siraw nyaw mahahakay a pangpangōlo a pōtot na a sa Teman, Omar, Sepo, Kenas, 16 Kora, Gatam, kan si Amalek. Siraw nyaw pangpangōlo a pōtot ni Elipas a minyan do Edom, kan si Ada āpong da a baket.

17 Myan pa saw mahahakay a pōtot ni Rewel a pōtot ni Esaw, kan nayparin a pangpangōlo dan partīdos da. Sira, ki sa Nahat, Sera, Sammah, kan Missa. Siraw nyaw pangpangōlo a pōtot ni Rewel a minyan do Edom, kan si Basemat āpong da a baket.

18 Myan paw pangpangōlo dan partīdos a yapo do anak da Esaw kan baket na a si Oholibama a pōtot ni Ana. Siraw nyaya a pangpangōlo, ki sa Jeos, Jaalam, kan Kora. 19 Siraw nya tabo pangpangōlo do kapotōtan ni Esaw mana Edom no matarek a ngaran na.

20 Do dawri a tana ni Edom, myan saw tawotawo a sīgod a omyan daw a mayngaran so Horeo a kapotōtan ni Seir. No mahahakay a pōtot ni Seir, ki sa Lotan, Sobal, Sibeon, Ana, 21 Dison, Eser, kan Disan. Siraw pangpangōlo dan Horeo a tawotawo, kan minyan sa do Edom. 22 Siraw dadwa a mahahakay a pōtot ni Lotan, ki sa Hori kan Heman, as iyaw kakteh a mabakes ni Lotan, ki si Timna.

23 Siraw mahahakay a pōtot ni Sobal, ki sa Alban, Manahat, Ebal, Sepo, kan Onam.

24 Myan saw dadwa a mahahakay a pōtot ni Sibeon, ki sa Aya kan Ana. Si Ana, iyaw nakaboya so makohat a akbod do let-ang do kaaywan naw siras asno saw ni āmang na. 25 Si Ana, myan dadwa pōtot na. Iyaw mahakay, ki si Dison. Iyaw mabakes, ki si Oholibama. 26 Siraw mahahakay a pōtot ni Dison, ki sa Hemdan, Esban, Itran, kan Keran.

27 Siraw mahahakay a pōtot ni Eser, ki sa Bilhan, Saaban, kan Akan. 28 Siraw mahahakay a pōtot ni Disan, ki sa Os kan Aran. 29 Siraw nyaw pangpangōlo dan Horeo saw a tawotawo do Edom: sa Lotan, Sobal, Sibeon, Ana, 30 Dison, Eser, kan Disan. Siraw nyaw pangpangōlo dan Horeo saw a tawotawo, sigon do partīdos da a omnidi do tana a Seir mana Edom.

31 Myan saw ar-āri do Edom, kan nagsasarono sa a nagtoray daw sakbay a myan āri dan Israelita saw. 32 No nanōma a āri da, ki si Bela a mahakay a pōtot ni Beor a taga idi a Dinhaba. 33 Do nakadiman ni Bela, nachitādi si Jobab a mahakay a pōtot ni Sera a taga Bosra. 34 Do nakadiman ni Jobab, nachitādi si Hosam a yapo do tana no Teman. 35 Do nakadiman ni Hosam, nachitādi si Hadad a mahakay a pōtot ni Bedad kan taga Abit. Inābak na saw Midyanita a tawo do asa gobat do tana a Moab. 36 Do nakadiman ni Hadad, nachitādi si Samla a yapo do Masrekka. 37 Do nakadiman ni Samla, nachitādi si Saulo a yapo do Rehobot do bīt no oksong a Oprates. 38 Do nakadiman ni Saulo, nachitādi si Baal-hanan a mahakay a pōtot ni Akbor. 39 Do nakadiman ni Baal-hanan, nachitādi si Hadad a taga Paw. No ngaran no baket na, ki Mehetabel a anak ni Matred a anak a mabakes ni Mesaab.

40 No ngarangaran dan pangpangōlo a kapotōtan Esaw, sigon do partīdos da kan yanan da, ki sa Timna, Alba, Jetet, 41-42 Oholibama, Ela, Pinon, Kenas, Teman, Mibsar, 43 Magdiel, kan Iram. Siraw nya, ki pangpangōlo dan Edomita a tawotawo a kapotōtan saw ni Esaw, sigon do partīdos kan yanan da.