1 Do nakakaro daranaw da Laban, tinongtong da Jakob nayam, ki do kayam naw, naychihat a myan asa bonggoy no aanghil no Dyos a nangbayat sya. 2 Do nakaboyaw ni Jakob sira, binata na a kāna, “Ari dyaw kampo no Dyos kan siraw bōyot na saw!” Dawa, pinangaranan naw nyaya logar so Mahanaim.* 32:2 No chakey na batahen “Mahanaim” do chirin a Hebreo, ki “dadwa kampo”. No asaw, ki dyiran Jakob. As iyaw asaw, ki dyira no Dyos.

3 Do katayoka no nawri, nanoboy si Jakob so tobotoboyen na saw a nanmanma kan iya a mangay di Esaw a ākang na do tana a Seir mana Edom. 4 Komwan inbilin na dyira: “Ibahey nyonchi di Esaw a āpo ko a kon nyo, ‘Batahenaw ni Jakob a tobotoboyen mo a nakayapo do nakakaro na di āmang nyo, ki nāw na a minyan di maraan nyos Laban do Mesopotamya a nanda sichangori. 5 Āro iyaw bāka, asno, karniro, kalding, kan adīpen na a mahahakay kan mababakes. Ipakatoneng na dyimo a āpo na, ta aram panchi a chāsi.’ ”

6 Ki do dāwri, do nakapaybidi daw no tinoboy na saw a yapo do Esaw, binata da dya a kon da, “Nangay kami di Esaw a ākang mo, kan ari dana mangay a machibayat dyimo, kan myan nachirayay dya a apat a gasot a mahahakay.”

7 Do nakadngey naw sya, oltimo danaw kāmo ni Jakob kan nakamikamyaba. Dawa, pinaycharwa na saw tawo naw a myan dya, kan siraw karniro, kalding, bāka, kan kamilyo na saw. 8 Komwan pinarin ni Jakob, ta iniktokto na a an gobaten Esaw asaya bonggoy, ayket, maparin a mayyayo paw asaw.

9 Do nakatayoka naw a napaycharwa sira, naydasal si Jakob. As nyaw inakdaw na a kāna, “O, Dyos a dinaydāyaw ni āpong kos Abraham kan daydayāwen ni āmang kos Isaak, adngeyen mo pa yaken. Mo ĀPO, imo nangibahey dyaken a maybidi ako na do tana ni āmang ko kan siraw kakabagyan ko, as imonchiw mangbindisyon dyaken. 10 Abaw kaikaryan ko do tabo dya mabdibdis a kadaw kan tabo kapodno a inpaboya mo dyaken a pachirawatan mo. Sarokod lang sinahabit ko do nakapamtang kwaw do oksongayan Jordan, ki naybidi ako a dadwa so bonggoy. 11 Dawa, machikakaāsi ako dyimo a isalākan mo yaken di Esaw a kakteh ko. Mamo ako dya, ta āngonchan yangay na yamen a gobaten, as dimanen na yamen a tabo kontodo siraw mababakes saw kan adedekey da saw. 12 4Naknakmen mo pakono iyaw kari mo dyaken a bindisyonan mo yaken kan pārohen mo iyaw kapotōtan ko a akmas kāro no anay do kanayan a dya mabidangan.”

13 Do dāwri, minisan pa sa Jakob do Mahanaim a logar. Do kamabekasan na, namidi dyirad binyay na saw, as nakapatawa na so isāgot na di Esaw a kakteh na. 14 Siraw nyaw pinidi na: dadwa gasot a mabinayi a kalding kan dadwa poho a malloko a kalding, dadwa gasot a mabinayi a karniro kan dadwa poho a malloko a karniro. 15 Myan paw pinidi na tatdwa poho a mabinayi a kamilyo a kontodo anak, apat a poho a mabinayi a bāka kan asa poho a maloko a bāka, dadwa poho mabinayi a asno kan asa poho a malloko a asno. 16 Kāda kīta do pinatawa na saw a binyay, ki inpaaywan na dyirad adīpen na saw. Sinpangan na, binata na dyirad adīpen na saw a kāna, “Manma kamo na ah, kan magsasarono kamo, ki mayayateng kamo tan dyi kamo a maysin-aadas.”

17 Binilin naw adīpen naw a manma a mangay a kāna, “Anchan mabayat naymo ni Esaw a ākang ko, as iyahes na, ‘Sino āpo mo? Dino ngayan mo, as kan sino akin dyira siras nyaya binyay a toyohen mo?’ 18 nyanchiw ibahey mo dya a kon mo, ‘Dyira ni Jakob a adipen mo siraw nyaya binyay. Inpaw-it na a sāgot dyimo mo āpo Esaw. Ari saw a manawnawdyi kan yamen.’ ”

19 Masaw inbilin na dyirad chadadwa, chatatdo, kan tabo somarono saw a adīpen a manoyo siras kadwan saw a binyay a sāgot na di Esaw. Binata na dyira a kāna, “Anchan mabayat nyo si Esaw, malit ibahey nyo dya ah. 20 Kawayakan nyo aba ibahey a, ‘Myan saw a manawnawdyi kan yamen, sa Jakob a adīpen mo.’ ” Pinarin ni Jakob nyaya, ta iniktokto naw komwan, “Mahwahok ngata si Esaw do sāgot ko saya a pinanma ko. Ta anchan machisalap ako dya, rawaten nanchi ngata yaken.” 21 Dawa, pinanma narana sa a inpapatoyo sāgot na saw a binyay. As iya, ki minisan pa so asa kahep do nagkampwan daw.

22 Do dāwri a ahep, naybangon si Jakob, as nakahap na siras dadwaw a baket na kontodo saw dadwaw a mababakes a adīpen na kan siraw asa pohwaw kan asa a pōtot na, as nakapamtang na sira do oksongaw a Jabbok. 23 Pinanma na sa pinabtang, as nakapasarono nas tabo kadwan saw a rārayay na, binyay na, kan warawara da saw. 24 Do katayoka no nawri, namtang aba si Jakob, dawa, nabidin a naychatanyi do kabtangaw no oksong.

Do dāwri, naychihat a myan mahakay a nangay a nachigabbo dya a mandad kakalo narana a maysesēdang. 25 Ki do kadlawaw sya no mahakayaw a dyi na mapenpen si Jakob, kinorimes naw atangaw ni Jakob. As dawa, nayhabchis atang naw do nakapachigabbo naw do mahakayaw. 26 Binata no mahakayaw di Jakob a kāna, “Dā pa! Aryan mo na yaken, ta maysesēdang danaya!”

Ki tominbay si Jakob dya a kāna, “Ay! Aryan kwabaymo, an dyi mo yaken a bindisyonan!”

27 Inyahes no mahakayaw a kāna, “Āngo ngaran mo?”

“Jakob,” initbay na.

28 Do dāwri, binata no mahakayaw a kāna, “Sichangori, Jakob pabaw ngaran mo, an dya Israel,† 32:28 No chakey na batahen “Israel,” ki “machigabbo” mana “machilaban do Dyos”. ta nachilāban kad Dyos kan kapayngay mo sa tawo, kan nagballīgi ka.”

29 Inbahey ni Jakob a kāna, “Imom Āpo, ibahey mo pa dyaken an sino ka, kan dino nakayapwan mo.”

Ki tominbay iyaw mahakayaw a kāna, “Āngo ta chakey mwa mapatakan?” Do dāwri, tod narana binindisyonan, as nakakaro na.

30 Binata ni Jakob do aktokto na a kāna, “Ay, nachisalap ako do Dyos. Mapya, ata, aryak paya mabyay!” Dawa, pinangaranan ni Jakob nawri a logar so Penwel.‡ 32:30 No chakey na batahen “Penwel” mana “Penyel” do chirin a Hebreo, ki “rōpa no Dyos.” Eks. 33:20; Ok. 8:8, 9; 1 Ār. 12:25

31 Domnada danaw araw do kakaro ni Jakob do Penwel, ki nakaskaspi a nayam maynamot do nayhabchisaw a atang na. 32 Nyaw siniknanan na a dāgen dan kapotōtan saw ni Israel michan so oyat a myan do atang no binyay a partyen da maynamot ta nyaw kinorimesaw no mahakayaw di Jakob do nakapaggabo daw.