1 Do kadlawaw sya ni Rakel a abaw anak na di Jakob, nangīmon di Lea a ākang na, as binata na di Jakob a kāna, “An chaskeh mo a madiman ako, torohan mo yaken so anak ko!”

2 Nakasoli si Jakob di Rakel. Dawa, binata na dya a kāna, “Āngo ta komwan ibahey mo dyaken? Dyos akori? An iyaw dya mapaymanganak dyimo, aryoriw maparin ko?”

3 Ki inatbay ni Rakel a kāna, “Namna! An komwan bata mo, cha dya si Bilha a adīpen ko. Kaoknod mo tan makapaymanganak so ibidang ko a anak ko,* 30:3 Do Hebreo a chirin, ki “tan maymanganak do tōd ko.” No chakey na batahen, ki dyira na. Gen. 48:12; 50:23 as kan myan pamilya ko a maynamot dya.” 4 Dawa, intoroh na si Bilha a adīpen na a kinaoknod ni Jakob a akma nay baket. 5 Sinpangan na, nabōgi si Bilha, kan naymanganak so mahakay.

6 Binata ni Rakel a kāna, “Ay, chināsi yaken no Dyos. Nadngey na iyaw no inakdakdaw ko, ta tinorohan na yaken so anak.” Dawa, pinangaran na so Dan.† 30:6 No chakey na batahen “Dan,” ki “nakalmonaw”. 7 Sinpangan na, minirwa a kinaoknod ni Jakob si Bilha a adīpen ni Rakel. Minirwa nabōgi si Bilha, as naymanganak so chadadwa no anak naw, ki mahakay pa. 8 Binata ni Rakel a kāna, “Inpasnek ko nachilomba di ākang ko, ki nangābak ako.” Dawa, pinangaranan naw adekeyaw so Naptali.‡ 30:8 No chakey na batahen “Naptali,” ki “maglomba” mana “may-ābak”.

9 Do kadlaw danaw ni Lea a dyi dana maymanganak, intoroh naw adīpen naw a si Silpa di Jakob a akma nay baket. 10 Sinpangan na, nabōgi si Silpa, as naymanganak so mahakay. 11 Binata ni Lea a kāna, “Ay, magāsat akwaya!” Dawa, pinangaranan nas Gad.§ 30:11 No chakey na batahen “Gad,” ki “magasat”. 12 Sinpangan na, minirwa a kinaoknod ni Jakob si Silpa a adīpen ni Lea. Minirwa dana nabōgi si Silpa, as naymanganak so chadadwa no anak naw di Jakob, ki mahakay pa. 13 Binata ni Lea a kāna, “Ay, masoyot ako na! Sichangori, pangaranan da yaken kapayngay ko saw a mababakes so masoyot.” Dawa, pinangaranan na so Aser* 30:13 No chakey na batahen “Aser,” ki “masoyot”. adekeyaw.

14 Do chimpo no kapagranyi so trīgo, nangay si Ruben do hakawan. Ki do dawri, nakaboya so asa kīta no asin tamek a mayngaran so mandragoras,† 30:14 An kanen kono no mabakes iyaw nyaya asin mandragoras, maydamnay kono a mabōgi. ki nangisabat di ānang na a si Lea. As dawa, do kaboyaw sya ni Rakel, binata na di Lea a kāna, “Torohan mo pa yaken so kadwanaya a mandragoras no anak mwaya.”

15 Ki tominbay si Lea a kāna, “Namna! Sinodib mo naw kadaw ni lakay ko. Manawob pabawri dyimo nawri? Sichangori, āngo paw sodiban mos mandragoras sayan anak kwaya?”

Ki binata ni Rakel dya a kāna, “An torohan mo yaken so mandragoras saya no anak mwaya aket, ipalōbos ko si Jakob a machoknod dyimo anchan mahep.”

16 Do kapaysarisari naw, nawara si Jakob a yapo do hakawan. Binayat ni Lea, as binata na dya a kāna, “Sichahep, yaten mayoknod, ta tinādyan ko so mandragoras sayan anak kwaw kapachoknod mo dyaken.” Dawa, nayoknod sa do dāwri a mahep kan Jakob.

17 Inadngey no Dyos iyaw dasal ni Lea. Dawa, nabōgi si Lea, as naymanganak so asa pa anak a mahakay. Nyaw chadadima a anak da kan Jakob. 18 Dawa, binata ni Lea a kāna, “Tinorohan na yaken no Dyos so gon-gona maynamot do nakaitoroh kwaw so adīpen kwaya di lakay ko.” Dawa, pinangaranan nas Issakar.‡ 30:18 No chakey na batahen “Issakar,” ki “gon-gona”.

19 Sinpangan na, minirwa a kinaoknod ni Jakob si Lea. Minirwa nabōgi si Lea, as naymanganak dana so asa pa a mahakay. Iyaw nyaw chanem no anak da kan Jakob. 20 Binata ni Lea a kāna, “Tinorohan na yaken no Dyos so asa mapateg a sāgot. Changori, anyiben ngata yaken ni Jakob, ta nakaiyanak ako so anem a mahahakay.” Dawa, pinangaranan naw adekeyaw so Sebolon.§ 30:20 No chakey na batahen “Sebolon,” ki “sāgot”. 21 Sinpangan na, minirwa dana naymanganak si Lea, ki mabakes a pinangaranan nas Dina.

22 Ki do dāwri, nawayakan aba no Dyos si Rakel, ta inadngey naw dasal na, kan tinorohan na so chimpo na a maymanganak. 23 Nabōgi si Rakel, as naymanganak so asa mahakay. Binata na a kāna, “Changori, pinakaro no Dyos pakasnesnekan ko maynamot do nakaitoroh naya dyaken so anak.” 24 Pinangaranan naw adekeyaw so Jose,* 30:24 No chakey na batahen “Jose,” ki “marapan pakono pa.” ta binata na a kāna, “Rakoh hahawen kwa torohan na pa yaken no Dyos so asa pa anak a mahakay.”

25 Do nakaiyanak danaw ni Jose, binata ni Jakob di Laban a kāna, “Palobōsan mo na yaken a komaro dya, tan maybidi ako do sīgod a yanan āmang ko. 26 Aran siraw baket ko kan pōtot ko saya, ki palobōsan mo sa, tan komaro kami dya. Ta nakabos danaw chimpo a nakaikāro ko sira dadwa dyimo. On, chapatak mwaya an maypāngo nakapaytarabāko ko dyimo.”

27 Ki tominbay si Laban a katogāngan na a kāna, “Anchi ka pa. An chāsi mo yaken, omyan ka pa dya. Komaro kaba, ta maynamot do bōkod kwa pangancharan, napatakan ko na binindisyonan na yaken ni ĀPO a maynamot do nakayan mwaya dyaken. 28 Na, ibahey mo an papiraw chakey mwa tangdan, ta nawriw itoroh ko dyimo.”

29 Ki tominbay dya si Jakob a kāna, “Engga. Nawri abaw chakey ko. Chapatak mo na an maypāngo nakapaytarabāko ko dyimo, kan māngo nakapaypāro no binyay mo do kaaywan ko sira. 30 Oyod saba āro binyay mo do kawara kwaw, ki taywara naypāro sa sichangori, ta binindisyonan naymo ni ĀPO do aran āngo a ipatarabāko mo dyaken. Changori, ōras dana tan chiban ko kaganayan mismo a pamilya ko.”

31 Ki inyahes ni Laban a kāna, “Naon, ki āngo itangdan ko dyimo?”

Tominbay si Jakob dya a kāna, “Tangdanan mwaba yaken. Ki an makey ka do asaya lang a ibahey ko dyimo, tongtongen ko sa a aywanan arban saya a karniro kan kalding a dyira mo. 32 Sichangori, ipalōbos mwa mangay ako do yanan daw no binyay saw, ta patarken ko sa tabo karniro a dya maynana maydak, tabo orbon saw a karniro a mababaheng kan tabo kalding a malabalabang kan mabochibochit. Sira lang nyayaw akdawen ko a itangdan mo dyaken. 33 Tan komwan, aran mahay mo sa yangay a bisītaen dyaken saya, ki matonngan monchi an malinteg ako mana engga. Ta an myan anchiw maboya mo a kalding a dya labang mana mabochibochit, iyanchiw nyaw maydamnay a pakalasīnan mo an myan tinakaw ko. Masaw dyirad orbon saw a karniro ko an myan maboya mo a maydak.”

34 Initbay ni Laban a kāna, “Naon, komwan ah. Parinen ta iyaw no inbahey mwaya.”

35 Dawa, do dāwri a araw, no pinarin ni Laban, ki pinatarek na tabo malloko saw a kalding a orit-oritan kan malabalabang so maydak kan tabo mabinayi a kalding a mabochibochit kan malabalabang a myan so maydaydak. Pinatarek na pa tabo mababaheng saw a karniro, as nakaitoroh na sira dyirad pōtot na saw a mahakay tan aywanan da sa.† 30:35 As dawa, no dyiran Laban, ki maynana maydak a kīta no karniro, kan maynana mabaheng a kīta no kalding. 36 Inpaikaro na sa tan pachibawa da sa di Jakob, as inpaiyangay na sa do mateng a yanan a ayamen do tatdwa karaw. Ki siraw nabidinaw a arban ni Laban, ki inpaaywan na sa di Jakob.

37 Sinpangan na, nanghap si Jakob so māta a sangasanga no tatdwa kīta no kayo a maydamnay a makochichasan. Kinochikochichasan na tan maychanyidanyidak sangasangaw. 38 Pinangay na saw nakochichasanaw a sangasanga do inoynoman da saw no arban sa kalding kan karniro tan myan do salapen daw an mangay sa a minom. Komwan pinarin na tan matoyen sa, ta magdadakep saw nyaya binyay an mangay sa minom. 39 Sinpangan na, do nakapagdadakep daw no arban saw do salapen daw no sangasanga, natoyen sa, kan naymanganak sa so orit-oritan, mabochibochit, kan malabalabang.

40 Siraw nya orbon no kalding kan karniro, pinatawa sa ni Jakob, as pinasalap na saw pinatawa naw dyirad pangganakan saw a orit-oritan kan maynana mababaheng a dyira ni Laban, tan matoyen sa. Komwan nakapāro na so binyay na, kan pinatarek na sa dyirad binyay saw ni Laban. 41 An mapagran saw matatabaw a mabinayi, pangayen ni Jakob iyaw nakochichasanaw a sangasanga do inoynoman da saw tan maboya da, ta dawriw paydadakpan da. 42 Ki pangayen naba dyirad magogolangaw nya saya sanga. Dawa, dyira dana sa ni Laban magogolangaw, as dyira sa ni Jakob masasalon-at saw. 43 Komwan nakapayparin ni Jakob a taywara mabaknang. Āro saw arban a karniro kan kalding a dyira na. As myan pa saw dyira na a kamilyo, asno, kan adīpen na sa a mahahakay kan mababakes.