1 Do dāwri, abaw pōtot ni Abram, ta hopes pa si Sarai a baket na. Ki myan adīpen ni Sarai a asa mabakes a yapo do Egipto a mayngaran so Agar. 2 Binata ni Sarai di Abram a kāna, “Abayaw intoroh ni ĀPO dyaken a anak ko. Maganay āno an oknoden mo si Agar a adīpen ko? Ta an mapaymanganak mo, iyanchiw anak naw, ki ibidang ko a anak ta.” Do dāwri, ki nakey si Abram do inbaheyaw ni baket na. 3 As dawa, do chaasa poho naw a katawen ni Abram do tana naw a Kanaan, ki inhap ni Sarai a baket na si Agar a adīpen na a taga Egipto, as kan intoroh na di Abram, kan nayrapa sa. 4 Do dāwri, nayoknod sa Abram kan Agar, ki nabōgi si Agar. Ki do nakadidiwaw syan Agar a nabōgi, ki tod narana dyābat si Sarai.

5 Dawa, binata ni Sarai di lakay na a kāna, “Imo akin gatos do kabwayan anyib dyaken Agar.* 16:5 Mana “Imo makatoneng do madiaya kalidyalidyat dyaken ni Agar.” Yaken mismo a nanoroh dyimo. Sichangori, maynamot do nakapatak naw sya nabōgi, ki ipsok na yaken. Si ĀPO pakono mangipaboya an sino dyaten kosto, an imo mana yaken.”

6 Ki tinbay ni Abram a kāna, “Ara, ta adīpen mwaya! Parinen mo chakey mo dya.” Dawa, linidyalidyat ni Sarai si Agar nandad nakapayyayo na.

7 Sinpangan na, napaboya iyaw anghil ni ĀPO† 16:7 Iyaw anghil ni ĀPO, ki asaba a naparswa, an dya Dyos a mismo. Gen. 16:13 di Agar do kayan naw do asaw a akbod do let-ang do rarahanaw a mangay do idi a Sor. 8 Ki binata na dya a kāna, “Agar a adīpen ni Sarai, dino nakayapwan mo, kan dino kwanan mo?”

Ki tominbay si Agar a kāna, “On, ata, payyayowan ko āmo kwaw a si Sarai.”

9 Ki binata no anghil ni ĀPO dya a kāna, “Maybidi ka kan palobōsan mwa iyaw mangitoray dyimo.” 10 Binata na pa dya a kāna, “Torohan konchimo so āro a kamanganakan mo, kan abanchiw makabidang sira. 11 Mabōgi kas changori, as maymanganak kanchis mahakay. Ki pangaranan monchis Ismael,‡ 16:11 No chakey na batahen “Ismael” do chirin Hebreo, ki “madngey no Dyos”. ta inadngey ni Āpo katanyis mwaw do kalidyatan mo. 12 Maybibyay anchi a akmay bolaw a asno§ 16:12 Iyaw bolaw a asno, ki madoldog. Job 39:5-8; Ose. 8:9 a dya makananawo, as kontraen na sanchiw tabo a tawotawo, as komwan a kontraen danchi iya. As maynamot ta machidiman sa dyaw kakabagyan naw, karwan na sanchi.”

13 Dawa, binata ni Agar do aktokto na, “Aysa! Oyodori a naboya ko Dyos a makaboya dyaken, kan aryak paya sibibyay?” Dawa, pinangaranan nas ĀPO a naychirin dya so “Dyos a Makaboya.” 14 Nawriw pinangaranan tawotawo so bobonaw a myan do naypayawanaw no Kades kan Bered so “Bobon no Sibibyay a Dyos a Makaboya Dyaken.”* 16:14 Mana “Beer-lahai-roi”.

15 Sinpangan na, naymanganak si Agar so asa mahakay, kan pinangaranan Abram pōtot naw so Ismael. 16 Wawaho a poho kan anem a katawen si Abram do dāwri.