1 Do dāwri, iyaw boday, ki kasisikapan dyirad tabo a bolaw a animal a pinarin ni ĀPO a Dyos. Inyahes na do mabakesaw a kāna, “Oyodori a binata no Dyos dyinyo a dyi nyo a kanen aran āngo a kīta no asin kayo do minoyonganaya?”

2 Ki tominbay mabakesaw a kāna, “Engga, ta pinalobōsan naw yamen a koman so aran āngo a asin kayo do dyaya a minoyongan, 3 malaksid do kayowaw a myan do hobok naya, ta baywan na. No inbahey ni Āpo Dyos dyamen, ki an koman kamis asin nawri a kayo mana aran tod namen a masalid, madiman kaminchi.”

4 Ki initbay no bodayaw a kāna, “Pī! Taywaran madiman kamo? 5 Komwan binata no Dyos dyinyo, ta chapatak na do ōras a makakan kamos nawri a asin kayo, ki maywangan anchiw kapanyideb nyo a mayparin a masīrib a akma dya a makapatak so maganay kan marahet.”

6 Do nakaboyaw no mabakesaw so kapintas no kayowaw kan kaganay no asi naw a kanen, binata na do aktokto na a oyod a maganay an mayparin sa a masīrib. As dawa, namoyis so asyaw no kayo, as nakakan na sya kan tinorohan naw lakay naw a myan daw, kan kinan na. 7 Do nakatayoka daw a komninan, nanyeng a naywangan nakapanyideb da a dadwa, as kan natonngan da a silalābos sa. Do dāwri, napaytatachip sa so bohobohongaw no kayowaw a mayngaran so igos a pinangolib das inawan da.

8 Do kamakoyāb danaw, nadngey daw kadagpasaw ni ĀPO a Dyos a mayam do minoyonganaw, ki tomnayo sa do kayokayo saw daw. 9 Ki tinawagan ĀPO a Dyos mahakayaw a kāna, “Adan, āngo pachichibeng mo daw?”

10 Tominbay mahakayaw a kāna, “On, ata, nadngey kwaw kadagpas mo do minoyonganaya, ki mamo ako dyimo, kan tomnayo ako, ata, silalābos akwaya.”

11 Ki inyahes ni ĀPO a Dyos dya a kāna, “Sino nangibahey a silalābos ka? Komninan kawris asyaw no kayo a inbilin ko dyimo a dyi mo a kanen?”

12 Initbay no mahakayaw a kāna, “On, ata, iyaw mabakesaya intoroh mo a rārayay ko, iyaw nanoroh dyaken so asin kayo, kan kinan ko.”

13 Ki inyahes ni ĀPO a Dyos do mabakesaw a kāna, “Āngo ta pinarin mo komwan?”

“On, ata, inallīlaw naw yaken bodayaw. Dawa, komninan ako,” binata no mabakesaw.

14 Sinpangan na, binata ni ĀPO a Dyos do bodayaw a kāna, “Maynamot do dya pinarin mo, imo lang nabay dyirad tabo a animal a maywam kan bolaw. Dawa, yapo sichangori, bodek mo naw payamen mo, as ahbek danaw kanen mo mandad kadiman mo. 15 Paysin-ipsoken konchinyo kan nyaya mabakes, as nāw danchi a maysin-iipsok no kamanganakan na kan kapotōtan mo. On, padesdesen anchi no kamanganakanaya no mabakes oho mo, ki sonyiten monchiw toben naw.”

16 As binata na do mabakesaw a kāna, “Paypalidyaten ko kaynyin do kapagpasikal no kapaymanganak mo. On, padidiwan koymo so kaynyin no kapaymanganak mo. Ki aran komwan, alit nanchi a katngan mwabaw lakay mwaya, kan itorayan nanchimo.”

17 As binata na do mahakayaw a kāna, “Inanohdan mo inbaheyaya ni baket mo, kan kinan mo asi no kayo a baywan ko a kanen mo. Maynamot do dya pinarin mo, abayen konchiw tana. Dawa, yapo sichangori a mandad kadiman mo, machita maytarabāko ka so marahmet tan myan manawob a chabyay mo. 18 Patobohen nanchin tanaw manolok kan malidyat a yayten a tamek. Koman kanchis tomobo a yapo do tana. 19 Maynannget kanchi a maytarabāko so marahmet do tanaya tan myan chabyay mo manda do kapaybidi mo do nakayapwan mo a tana a nakaparinan mo. Yapo kad tana, dawa, maybidi kanchi a tana.”

20 Eba* 3:20 No ōni no “Eba” do Hebreo, ki nagistayan parihas do ōni no “sibibyay”. iyaw inpangaran Adan† 3:20 No chakey na batahen “Adan” do Hebreo, ki “tawo”. so baket naw, maynamot ta iyaw ānang dan tabo tawotawo. 21 Ki namarin si ĀPO a Dyos so laylay a yapo do lālat no animal, as pinaylaylay na sa Adan kan Eba.

22 Sinpangan na, binatan ĀPO a Dyos a kāna, “Changori, myan danaw kapakapatak no tawo so maganay kan marahet a akma dyaten. Dawa, palobōsan ta saba a koman so asin kayo a manoroh so byay tan dyi sa mabyay a abos pandan.” 23 Dawa, binoyaw san ĀPO a Dyos sa Adan kan baket na do Minoyongan no Eden, as pinaytarabāko na sa do tana a nakapotāran no mahakayaw.

24 Do nakakaro daw do Eden, do mangket do dāya no minoyonganaw, inpabantay ni ĀPO a Dyos dyirad sibibyay saw a parswa a naypanyid,‡ 3:24 Eks. 25:18-20; Esek. 1:5-13; Pal. 4:6-9 kan napangay so asa somgesged a apoy a akmay ispāda a nāw na somalasalap do aran dino a pakayapwan, tan abo makapaypasngen do kayowaw a makaitoroh so byay.