1 Namarin sa Besalel so lakāsan a yapo do kayo a akasya. No kanaro na, ki tatdo a kadapan kan sasyam a kapolgāda, as dadwa a kadapan kan tatdo a kapolgāda so kawbong, kan dadwa a kadapan kan tatdo a kapolgāda so kakarang. 2 Kinalopkopan da so pōro a balitok do irahem kan do hapot, as kan linistonan da so dikorasyon a balitok bibi naw. 3 Nanyīpo sa so apat a sinan singsing a balitok, as nakaiparaot da sira do apataw a kokod na. Bali, dadwa a sinan singsing do maychamībit naw. 4 Sinpangan na, namarin sa pa so iisiw sa a yapo do kayo a akasya, kan kinalopkopan da sa so balitok. 5 As inyōsok da sa do sinan singsing saw do maychamībit naw no lakāsanaw tan pangisiwan sya.

6 Namarin sa pa so tohong no pachipakawanan so gatos a pōro a balitok. As no kanaro na, ki tatdo a kadapan kan sasyam a kapolgāda, kan dadwa a kadapan kan tatdo a kapolgāda so kawbong. 7 As namarin sa pa so dadwa a sinan parswa a naypanyid do nachīpo a balitok do maybītaw a tobwan no tohong naw. 8 Bali, naymorong sa a lānang do tohong naw. 9 Siraw panyid daw, ki binolay da a pinatohos tan inabongan daw tohong naw. Naysalapan daw tohong naw.

10 Namarin sa pa sa Besalel so lamisaan a yapo do kayo a akasya. As no kanaro na, ki tatdo a kadapan, asa kan godwa a kadapan so kawbong, kan dadwa a kadapan kan tatdo a kapolgāda so kakarang. 11 Kinalopkopan da so pōro a balitok, as kan binarikīsan d so dikorasyon a balitok do naynyopos naw. 12 Linebleban da so tatdo a kapolgāda so kawbong a naynyopos, kan binarikīsan da so dikorasyon a balitok. 13 Namarin sa pa so apat a sinan singsing a balitok a para do lamisaanaw, as nakaiparaot da sira do apataw a sōli na do yananaw no kokod na. 14 Siraw sinan singsing saw, ki pinangay da sa do masngenaw do lebleb naw a pachiosōkan iisiw saw. 15 Namarin sa pa so iisiw a yapo do kayo a akasya, as kinalopkopan da so balitok, as kan siraw nyaw naosar a pangisiw so lamisaanaw. 16 Namarin sa pa so tatakan sa kan bāso sa a para do insinso a yapo do pōro a balitok, as kan pronggo sa kan sabak sa a naosar para do kapado so maidāton.

17 Namarin sa pa sa Besalel so pamadatōkan so soho a yapo do nachīpo a pōro a balitok. Namarin sa pa so lānang a disnan na, atngeh na, bāso na sa a akmay sabong, bōsel na sa, kan bosak na sa do pamadatōkanaw so soho. 18 Anem sanga na. Bāli, taytotdo do maybīt naw. 19 Kāda asa do anemaw a sanga, ki myan tatdo a nagsasarono a sinan bāso a napōtar akmas sabongaw no almendras a myan sa so bōsel kan bosak. 20 Iyaw atngeh naw, ki myan nagsasarono a apat a bāso a napōtar a akmas sabongaw no almendras a myan so bōsel kan bosak. 21 Myan asa bōsel do ibaba naw no kāda asa dyirad tatdwaw a kaparis a sangsanga na. 22 Siraw bōselaw, sangasanga saw, kan pamadatōkanaw so soho, ki lānang sa a naparin do nachīpo a pōro a balitok.

23 Namarin sa pa so papito a soho a pinangay da do pamadatōkanaw so soho, as kan namarin sa pa so panopit so soho kan pangayan saw so oreb do pōro a balitok. 24 Iyaw pamadatōkanaya so soho kontodo tabo rimīnta na, ki naparin do tatdo a poho kan dadima kakīlo a pōro a balitok.

25 Namarin sa pa sa Besalel so altar a yapo do akasya a kayo a paysosohan so insinso. Kwadrado a asa kan godwa a kadapan so kanaro, kan asa kan godwa a kadapan so kawbong, kan tatdo a poho kan anem a kapolgāda so kakarang. Siraw sinan olongaw, ki lānang kan altaraw. 26 Kinalopkopan da so pōro a balitok do rabaw naw, nangdibon do payis naw, kan siraw sinan olongaw, as kan binarikīsan da so dikorasyon a balitok do naynyopos naw. 27 Namarin sa pa so dadwa sinan singsing a balitok para do altaraw do ahbwaw no dikorasyon. Pinaybīt daw pamaosōkanaw siras iisiwaw a pangatkatan. 28 Namarin sa pa so iisiw a yapo do kayo a akasya, as kinalopkopan da so balitok.

29 Namarin sa pa sa Besalel so masantwan a lana a pangpasanto kan madalos a mabanglo a insinso a nasagesagel a akmas kaparin no sanay a mamariparin so bangbanglo.