1 “Nyaw parinen mo dyira tan itatārek mo sa sa Aaron kan pōtot na saw a mahahakay tan magsīrbi sa dyaken a pādi. Mapahap ka so bomaro a bāka kan dadwa a malloko a karniro a abos pakapilāwan. 2 Yapo do mapīno a arinan trīgo, mapanotong ka so tināpay a abos yapo, tināpay a nalaokan so lana, kan mataripis a tināpay a napapotan so lana. 3 Pasdoten mo sa do asa bakag, as kaiyangay mo sira, magrāman saw bomarwaw a bāka kan dadwaw a malloko a karniro. 4 As yangay mo sa Aaron kan siraw potōt naw a mahahakay do asdepanaw do Toldaw a Pachibayabayatan di ĀPO, as kan riyosen mo sa so ranom. 5 Katayoka na, machita mo a hapen saw laylayaw, as kan laylayan mo si Aaron so naabelaw a laylay, kagayaw no epod, iyaw mismwaw a epod, kan pangbarōkongaw, as kan barikīsan mo na so naabel a barīkis a pinarin no sanay. 6 Pangayen mo naw torbanaw do oho na, as paytanen mo masantwanaw a nakitikitan. 7 Manghap ka so lanaw a mangpasanto, kan pasantwen mo do kapado mo sya do oho na. 8 Sinpangan na, yangay mo saw potōt naw, kan laylayan mo sa so naabel a laylay, 9 barikīsan, kan pabedbeden mo tabahos da do oho daw. Iyaw kapādi, ki manayon dana a pangeddeng a para dyira. Komwan, kapatnek mo si Aaron kan siraw pōtot naw a mahahakay.

10 “Somarono, yangay mo iyaw bomarwaw a bāka do salapen no Toldaw a Pachibayabayatan di ĀPO, as si Aaron kan pōtot na saw a mahahakay, ki machita a palapawen daw tanoro da do oho no bomarwaw. 11 Dimanen mo bomarwaw a bāka do salapen ni ĀPO do asdepanaw do Toldaw a Pachibayabayatan di ĀPO. 12 Patahmen mo asaw a kakamay mo do raya, as kapapot mo do sinan olong saw do altaraw. As no pandaw no raya, padohen mo do tokaran no altaraw. 13 Somarono, hapen mo tabo tabaw a mamongos so lalaem, iyaw machikepkepaw do ibaba no atay, kan dadwaw a bato a sitataba, as kan sosohan mo sa do altaraw. 14 Ki iyaw asi, kodit, kan no mimyan naw no bitoka kan chinayi na, ki sosohan mo do gaganaw no kampo. Nyaw dāton a para do gatos.

15 “Sinpangan na, hapen mo asa dyirad mallokwaw a karniro, as si Aaron kan pōtot na saw a mahahakay, ki palapawen daw tanoro da do oho naw. 16 Dimanen mo kan hapen mo raya na, kan iwarsi mo do omdibonaw no altaraw. 17 Somarono, aktekteben mo iyaw mallokwaw a karniro, kan lablaban mo saw lalaem naw kan siraw kokod naw, as padponen mo sa do oho kan kadwanaw a partis na, 18 as sosohan mo sa tābo do altaraw. Nyaw dāton a masosohan do apoy, ki makahwahok so angot di ĀPO.

19 “Hapen mo iyaw chadadwa naw a malloko a karniro, as si Aaron kan pōtot na saw a mahahakay, ki palapawen daw tanoro da do oho na. 20 Dimanen mo kan hapen mo kadwan a raya na, kan papoten mo do tobwan saw no kawanan a tadyinya da Aaron kan pōtot na saw a mahahakay, do kawanan saw a kamangdadakeh no kakamay kan kokod da, as kan iwarsi mo pandanaw do omdibonaw no altaraw. 21 Hapen mo kadwan a raya a myan do altaraw kan kadwan a lana a mangpasanto, as warsyan mo sa Aaron kan pōtot na saw a mahahakay a silalaylay. Tan komwan, mapasanto sa kontodo laylay da saw.

22 “Hapen mo tabaw no nya malloko a karniro, iyaw matabaw a ipos na, iyaw taba a mamongos so lalaem, iyaw machikepkep do ibaba no atay, dadwaw a bato a sitataba, kan iyaw kawanan naw a pā na. (Nya malloko a karniro, ki para do kapatnek siras pādi a magsīrbi.) 23 Yapo do bakagaw a yanan tināpay a abos yapo a myan do salapen ni ĀPO, hapen mo asa tināpay a abos yapo, asa tīnapay a malaokan so lana, kan asa mataripis a tīnapay, 24 kan pangayen mo sa tabo do tanoro ni Aaron kan do tanoro dan pōtot na saw a mahahakay. Patangtangkayagen mo sa a para tangkayag a dāton a para di ĀPO. 25 Hapen mo sa do tanoro daw, as kasosoh mo sira do altaraw. Ināyon mo do dātonaw a masosohan tan makahwahok so angot do salapen ni ĀPO. Nya a dāton do apoy, ki para di ĀPO. 26 Hapen mo barōkongaw no malloko a karniro a para do kapatnek si Aaron a pādi, kan itangkayag mo do salapen ni ĀPO a para do dāton a kapangitangkayag, as nawri dananchiw bīngay mo.

27 “Itatārek mo sa para dyaken siraw partis no malloko a karniro a para do kapatnek so pādi a bīngay da Aaron kan pōtot na saw a mahahakay. Siraw nya partis, ki iyaw barōkong kan pā a naitangkayag. 28 Kanāyon danaw nyaya a bīngay da Aaron kan pōtot na saw a mahahakay a yapo dyirad Israelita. Iyaw nya, ki or-or dan Israelitaw a parinen da di ĀPO a yapo do dāton da saw a pachikapya.

29 “Siraw masantwan saw a laylay ni Aaron, ki dyira danchi no kapotōtan na saw a mahahakay. Paylaylay danchi do kapado so lana a mangpasanto dyira kan do kapatnek sira a pādi. 30 Iyaw pōtot naw a somarono anchi dya a pādi, machita a ilaylay na sa do papito a karaw do kasdep naw do Toldaw a Pachibayabayatan di ĀPO a magsīrbi do Masantwanaw a Yanan.

31 “Machita manghap ka so karni naw no malloko a karniro para do kapatnek so pādi, kan pakbwalen mo do asa masantwan a yanan. 32 Sa Aaron kan pōtot na saw a mahahakay, machita kanen daw karnyaw no malloko a karniro kan iyaw tināpayaw a myan do bakag do asdepenaw do Toldaw a Pachibayabayatan. 33 Machita da kanen saw nawri do kapachipakawan a maparin do kapatnekaw kan kaitatārek sira a para di ĀPO. Ki kanen saba no matarek, ta naibidang dana sa masantwan. 34 An myan panda do karni mana tināpay a para do kapatnek so pādi manda do kamabekas, machita a sosohan. Maparin aba kanen, ta maibidang a masantwan.

35 “Machita a parinen mo di Aaron kan pōtot na saw a mahahakay sigon do tabo a inbilin ko dyimo. Patneken mo sa a pādi do irahem no papito a karaw. 36 Kararaw, machita a idāton mo asa tōro a dāton a pachipakawanan so gatos. As kan machita a mangdalos ka so altaraw do kaparin mo so pachipakawanan so gatos, kan machita mo a padohen lanaw a mangitatārek sya a para di ĀPO. 37 On, do irahem no papito a karaw, parinen mo pachipakawanan so gatos para do altaraw, kan itatārek mo a para dyaken. Tan komwan, taywara a masanto, kan aran āngo a makasalid sya, masantwan anchi.”

38 “Nyaw idāton mo do altaraw a kanāyon do kararaw: dadwa orbon a karniro do asa a katawen. 39 Idāton mo asa an mabekas, kan no asaw, ki idāton mo an maysarisari. 40 Do dāmwaw a orbon a karniro, ināyon mo a idāton asa kakīlo a mapīno a arina no trīgo a malaokan so asa kalitro no pōro a lana no olibo a nalebbek, as kan asa kalitro no palek a inomen a dāton. 41 As do asaw a orbon a karniro, machita a idāton mo an maysarisari dana. Ināyon mo saw arina, lana, kan palek a akmas parinen mo an mabekas tan myan makahwahok a angot a masosohan a dāton a para di ĀPO.

42 “Machita a manda do tabo īto a kapotōtan dan papādi, kanāyon a parinen daw nya masosohan a dāton do asdepan do Toldaw a Pachibayabayatan do salapen ni ĀPO. Dawrinchiw pachibayatan ko dyirad Israelita kan machisisirin akonchi dyimom Moyses. 43 On, dawriw, pachibayatan konchi dyirad Israelita saw, kan iyaw nawri a yanan, ki mapasanto anchi a maynamot do dayag ko.

44 “Itatārek konchiw Toldaw a Pachibayabayatan kan altaraw, kan itatārek konchi sa Aaron kan pōtot na saw a mahahakay a magsīrbi dyaken a pādi. 45 Omyan akonchi dyirad Israelitaw, kan yaken dananchiw Dyos da. 46 Matonngan danchi a yaken, ki ĀPO a Dyos da a nangikaro dyira do tana a Egipto tan maparin a omyan ako dyira. Yaken, ki ĀPO a Dyos da.”