1 “Mangiwaras kaba so bayataw a dāmag. Machitōnos kaba do marahet a tawo do dya nainkalintegan a kapagtistīgo.* 23:1 Eks. 20:16; 23:7; Deot. 5:20; 19:15-21

2 “Monot kaba do kārwan a mamarin so madi. An myan kāso, as mangtistīgo ka, dyīdohen mwabaw kinalinteg a maynamot do kapachitōnos mo do kārwan, 3 as kan aran mapobri, itatārek mwaba an idarom da.† 23:3 Leb. 19:15

4 “An madongso mo a nakakaro bāka mana asno no kabōsor mo, tiliwen mo, as machita a pabidyen mo dya. 5 An maboya mo asnwaw no tawowaw a mangipsok dyimo a nakaspi a maynamot do rara naw, nonolay mwaba. Basbāli a sidongan mo tawowaw a mapatēnek sya.

6 “Mangtalob kaba so kinalinteg do tawo a mapobri do salapen pangokoman. 7 Machateng ka do mabayataw a kapamagatos, as kan mangdiman kaba so abos gatos mana malinteg a tawo, ta mapakawan ko abaw tawo a nakagatos so akma syay.

8 “Mangrawat kaba so pasoksok, ta bolsekan na saw makaboya kan dyīdohen naw kapaychirin dan malinteg.

9 “Mangidadanes kaba so gan-ganaet. Napadas mo naw kapangdidiw no gan-ganaet. Ta aran inyo, gan-ganaet kamo do tana Egipto.”‡ 23:9 Eks. 22:21; Leb. 19:33,34; Deot. 27:19

10 “Do anem a katawen, maymoha ka do bengkag mo, as kaāpit mo sya.§ 23:10-11 Leb 25:1-7 11 Ki do chapapito naw a katawen, paynahahen mo bengkag mwaw a aradwen kan osaren. As siranchiw mapopobri saw a kapayngay mwa tawo, maparin danchiw manghap so kanen da a tomobo daw, as iyaw panda daw, ki kanen danchin bolaw saw. Komwan met parinen mo do kaobāsan mwaw kan kaolibwan mwaw.

12 “Do anem a karaw, maytarabāko ka. Ki do chapapito naw, maytarabāko kaba tan makaynahah bāka kan asno mo. As komwan dyirad adīpen mo a nayanak do bahay mo* 23:12 Do chirin Hebreo, ki “do anak a mahakay no adīpen mo a mabakes”. Eks. 20:9-11; 31:15; 34:21; 35:2; Leb. 23.3; Deot. 5.13, 14 kan gan-ganaet a maytarabāko dyimo tan myan pangyingyit da.

13 “Magannad kamo do tabo inbahey kwaya dyinyo. Maydasal kamo aba a manawag so ngarangaran dan matatarek saw a dyos, mana aran tod nyo a abneken do bibi nyo.”

14 “Maypitdo do irahem no asa katawen, machita a mangay ka do pagdayāwan mo a mangsilibrar so pista a pangdāyaw mo dyaken. 15 Silibraren mo iyaw Pistaw no Tināpay a Abos Yapo. Akmas inbilin ko dyimo, koman ka so tināpayaw a abos yapo do papito a karaw. On, parinen mo nyaya do naikeddeng a chimpo do bohan no Abib. Ta iyaw nyaya bohan, nakaihtot mwaw do Egipto. As abaw mangay a magdaydāyaw dyaken a abo so dāton.

16 “As silibraren mo paw Pistaw no Kapagāpit† 23:16 Mana “Pistaw no Lawas Saw” (Eksodo 34:22). Sinpangan na, natawag so “Pistaw no Pentekostes” (Ara. 2:1). No āpit da, ki dāwa no trīgo. do manōmaw a āpit a yapo do mohamoha a inmoha mo.

“As silibraren mo Pistaw no Manawdyi a Kapagāpit‡ 23:16 Mana “No Pista no Kapaychichipeh so Tabo Āpit.” Sinpangan na, natawag so “Pistaw no Kapaychabengbengbeng” (Deot. 16:13). Iyaw bohan no Sikchimri a manda do Oktobri. do kapagtapos no tawen, anchan magāpit ka so tabo asi kan dāwa a yapo do inmoha mo. 17 Do maypitdo do asa katawen, tabo a mahahakay, ki machita a mapaboya do salapen ko a magdāyaw dyaken a ĀPO a Dyos.

18 “Mangidāton kaba dyaken so raya§ 23:18 Leb. 1:5, 11, 15 no dāton a binyay a maparayayan so aran āngo a myan so yapo. As iyaw tabaw* 23:18 Iyaw tabaw, ki myan do omdibon no bato saw no binyay. no dāton mo do pista, ki machita a dyi mwa kapyahen a mandan mabekas.

19 “Iyangay mo do bahay ni ĀPO a Dyos mo kagaganayanaw a manōma asi dan imoha mo do tana mo.† 23:19 Eks. 22:29; 34:26; Deot. 26:2-11

“Hotohen mwabaw orbon a kalding do gātas ni ānang na.”

20 “Chiban monchi. Manoboy ako so anghil a manmanma kan inyo a mangbantay dyinyo do kwanan nyo, kan yangay nanchinyo do logaraw a isagāna ko. 21 Anyiben mo kan adngeyen mo a maganay ibahey na. Sokīren mwaba, ta pakawanen nabaw kasōkir mwaw sya, ta ari dyaw no ngaran ko. 22 An adngeyen mo a maganay ibahey naw, kan parinen mo a tabo ibahey ko, kabōsor ko sanchiw kabōsor mo, kan kakontra ko sanchiw mangkontra dyimo. 23 Iyaw anghil kwaw, ki manmanma anchi kan imo, as kan iyangay nanchimo do tana daw no Amoreo, Heteo, Pereseo, Kananeo, Hibeo, kan Jeboseo, kan abohen ko sanchi. 24 Maysasakeb kaba do salapen dan dyos da saw, mana magdāyaw dyira, mana monot do pariparinen da saw. Basbāli a machita a rārayawen mo sa, kan homhomken mo saw masantwanaw a posti a bato a pinatnek da. 25 Dayāwen nyo ĀPO a Dyos nyo. An komwan parinen nyo, bindisyonan konchiw kanen kan inomen nyo, kan paksyaten konchiw ganyit a mangay dyinyo. 26 Abanchiw maalisan dyinyo mana hopes a dya makapaymanganak do tana nyo, as kan torohan konchi inyo so manaro a byay nyo.

27 “Panmanma konchiw pangamomo ko kan imo, as kan paychawawen ko sanchiw tabo tawotawo a mabayat mo. Pagsonoden konchiw tabo kabōsor mo, kan payyayowan danchi imo. 28 Mapanma konchi so betekan do kwanan mo a mapayyayo siras Hibeo saw, Kananeo saw, kan Heteo saw do ayaman mwaw. 29 Ki payyayohen ko saba nānyeng do irahem no asa katawen. Ta an abo tawotawo, mainonolay tanaw kan maypāro sanchiw bolaw saw a animal a mangrārayaw dyinyo. 30 In-īnot a payyayohen ko sa a manmanma kan imo a mandad kapaypāro nyo a mangsākop so tanaya.

31 “Payparinen konchiw pachipandan no tana nyo a yapo do Mabaya a Tāw a komwan do Mediterranean a Tāw,‡ 23:31 Mana “Tāw dan Pilisteo”. as kan yapo do let-ang a mandad oksongaw a Oprates. Iparawat ko sanchi dyinyo tawotawo saw a omyan do tanaw, as kan payyayohen nyo sanchi a manmanma do kwanan nyo. 32 Machitōlag kaba dyira mana dyirad dyos da saw. 33 Paomyanen mo saba do tana mo, ta āngwan paygatosen danchimo so maikontra dyaken. Ta an dayāwen mo saw dyos da, masigorādo a mayparin anchi a asdok dyimo.”