1 Do dāwri, si Jetro a pādi do Midyan kan katogāngan ni Moyses, napatakan na tabo pinarinaw ni Āpo Dyos di Moyses kan siraw tawotawo na saw a Israelita, as kan maypāngo nakaikaro ni ĀPO siras Israelita saya do Egipto. 2 Do kachwaw, pinasabat ni Moyses si Sippora a baket na, as si Jetro a katogāngan na, rinawat na iya 3 kan dadwa a pōtot na a mahahakay di Sippora. No ngaran no asa, ki si Gersom,* 18:3 Iyaw ōni no “Gersom” do chirin Hebreo, ki machiyengay do ōni no “gan-ganaet”. Eks. 2:22 ta binata ni Moyses a kāna, “Gan-ganaet akwaya do gan-ganaet a tana.” 4 No ngaran no asaya, ki si Elieser,† 18:4 No chakey na batahen “Elieser” do chirin Hebreo, ki “Dyos ko, ki kinasidong ko”. ta binata na a kāna, “No Dyos ni āmang ko, kinasidong ko. Insalākan na yaken do kadiman dyaken Paraon.”

5 Sa Jetro a katogāngan ni Moyses kontodo sa baket ni Moyses kan pōtot na saw, ki nangay di Moses do let-ang do yananaw a nagkampwan da no Israelita saw a masngen do tokon ni ĀPO. 6 Pinakatonngan ni Jetro si Moyses a kāna, “Yaken si Jetro a katogāngan mo, ki īto kaminchi kāda baket mo kan dadwa saw a anak na a mahahakay.” 7 As dawa, minohbot si Moyses a nangbayat si katogāngan na kan napādyos dya, as nakadadek na sya. Naysinkomosta sa, as nakasdep da do tolda. 8 Do dāwri, inistorya ni Moyses di katogāngan naw tabo pinarin ni ĀPO di Paraon kan siraw taga Egipto saw a somnidong dyirad Israelita saw. Inbahey na paw tabo napasaran da saw a lidyat do rarahan kan maypāngo nakaisalākan sira ni ĀPO.

9 Taywaraw nakasoyot ni Jetro do nakadngey naw a tabo so magaganay saw a pinarin ĀPO a para dyirad Israelita saw do nakaisalākan naw sira do tanoro dan taga Egipto. 10 Binata na a kāna, “Madaydāyaw si ĀPO a nangisalākan dyinyo do tanoro dan taga Egipto kan do toray ni Paraon. On, madaydāyaw si ĀPO do nakaisalākan na siras tawotawo na dyirad taga Egipto saw a nangadīpen sira. 11 Sichangori, chapatak ko na a si ĀPO, ki mabilbīleg kan siraw tabo kadwan saw a dyos, ta pinarin naw nya dyirad mapapangas saw a nangidadanes siras Israelita saya.” 12 Sinpangan na, si Jetro a katogāngan ni Moyses, nangyangay so masosohan a dāton‡ 18:12 Iyaw nya, ki binyay a nasosohan a simememeh. No kadwan a naidāton, ki kanen dan kadwan. kan kadwan pa a maidāton di Āpo Dyos. Nangay sa Aaron kontodo tabo panglakayen dan Israelitaw a nachihanghang so tināpay di katogāngan ni Moyses do salapen ni Āpo Dyos.

13 Do somaronwaw a araw, indisna ni Moyses mangokom a mapaysonong siras kapaydidiman da saw no tawotawo, as kan dinibon da a naychasaryan si Moyses. 14 Do nakaboyaw sya ni Jetro a katogāngan na so tabo pariparinen naw ni Moyses a para dyirad tawotawo saya, binata na a kāna, “Āngo nyaya pariparinen mo a para dyirad tawotawo saya? Āngo ta maychatanyi ka a mangokom a tori saw tabo tawotawowaya do omdibon mo a maychaychasaryan? Samna!”

15 Ki tinbay ni Moyses a kāna, “Naon, ata, yangay daya yahes dyaken tawotawo saya iyaw no chakey ni Āpo Dyos. 16 An myan maydidiman, yangay da sa dyaken, kan yaken mangikeddeng an sino dyiraw kosto. Ipakatoneng ko dyira siraw pangeddeng kan siraw linteg no Dyos.”

17 Inatbay no katogāngan naw ni Moyses a kāna, “Ayya, barok, maganay abaw nya parinen mo. 18 Tod mo a hopahopagen inawan mo ah, kan aran siraw tawotawo saya a mangay dyimo. Taywara marahmet nya tarabāko mo, kan maisabhay mwaba maychatanyi. 19 Anchi ka. Adngeyen mo pa yaken, ta torohan koymo so kadwan a pamagbaga, kan si Āpo Dyos pakono myan dyimo. On, machita a imo pinakainawan dan tawotawowaya do salapen Āpo Dyos, kan imo mangiyasngen di Āpo Dyos so paydidimanan da. 20 Inanawo mo dyira siraw pangeddeng kan siraw linteg, kan ipakatoneng mo dyiraw no kosto a kapaybibyay da kan siraw pagrebbengan a machita parinen da. 21 Ki mamidi kas makarawa saw a mahahakay a yapo do tabo tawotawo saya. On, siraw mahahakay saw, machita a mamo sa do Dyos kan mapagtalkan sa a mangipsok so pasoksok. As kaitongdo mo sira a mangipangōlo so rinībo, ginasot, taydidima poho kan tayisa poho. 22 Nolay mo sa a siraw no nāw da okom no tawotawo saya. Ki siraw malidyat saw a kāso, yangay da dyimo. As siraw maydamnay saw a kāso, sira danaw mangdisisyon. An komwan, mapapaw anchiw no isabhay mo maynamot ta nachipaysabhay sa dyimo. 23 An parinen mo nyaya, kan sigon do inbilin ni Āpo Dyos, makaibtor kanchi. As sira tabo nyaya tawotawo, ki somabat sanchi a myan kaydamnayan no kapangtokto da.”

24 Inadngey ni Moyses si katogāngan na, kan pinarin na tabo binata naw. 25 Namidi siras makarawa saw a mahahakay a yapo do tabo Israelita saya. Pinayparin na sa a pangōlo dan tawotawo saw. Myan saw nangipangōlo so rinībo, ginasot, taydidima poho, kan tayisa poho. 26 Nāw da a nagsīrbi a okom dyirad tawotawo saw. Siraw malilidyat saw a paysonongen, inyangay da di Moyses. Ki an siraw maydamnay saw, sira danaw nakatoneng.

27 Do dāwri, nagpakāda si Moyses di Jetro, as nayam dana si Jetro a somnabat.